Ног азы къӕсӕрыл — ног хӕдзар

0
37

Республикӕйы Сӕргълӕууӕг БИТАРТЫ Вячеслав кадджын уавӕры радта ног хӕдзары дӕгъӕлтӕ Нигколты бинонтӕн ӕмӕ уымӕй сӕххӕст кодта Цӕгат-Кавказы федералон зылды УФ-йы Президенты ӕххӕстбарджын минӕвар Александр МАТОВНИКОВЫ уынаффӕ.

Ацы аз 22 январы Александр Матовников фембӕлд «Бӕллицты зазбӕлас», зӕгъгӕ, ацы уӕрӕсейаг акцийы архайӕг 13-аздзыд Нигколты Давидимӕ. Лӕппу йӕ райгуырдӕй фӕстӕмӕ тох кӕны уӕззау низимӕ. Уӕд ын Александр Матовников балӕвар кодта, лӕппуйӕн йӕ царды уавӕртӕ чи фӕрогдӕр кодта, ахӕм ӕцонвадатджындӕр коляскӕ, стӕй планшет. Рынчын сывӕллон йӕ рыйгуырдӕй абоны бонмӕ йӕ ныййарджытимӕ цард бирӕфатерон хӕдзары фарӕстӕм уӕладзыджы, ӕмӕ, кӕй зӕгъын ӕй хъӕуы, йе ‘нӕниздзинады уавӕрмӕ гӕсгӕ йӕ гӕнӕнтӕ уыдысты тынг къуындӕг. Уымӕ гӕсгӕ Александр Матовников бабар кодта бинонтӕн сӕ фатер уӕллаг уӕладзыгӕй фыццӕгӕммӕ раивын. Ӕмӕ афӕдз дӕр нӕма рацыд, афтӕмӕй Уӕрӕсейы Президенты ӕххӕстбарджын минӕвары ныхас ӕххӕстгонд ӕрцыд — республикӕйы Сӕргълӕууӕг бинонтӕн радта ног фатер, ӕмӕ Ног азы къӕсӕрыл сӕ бӕллиц сӕххӕст. Дӕгъӕлтӕ дӕтгӕйӕ, Битарты Вячеслав арфӕ ракодта ӕмӕ сын загъта:

— Уӕ бӕллиц, стӕй Александр Матовниковы куырдиат кӕй сӕххӕст, уый нӕхицӕн дӕр къаддӕр ӕхсызгон нӕу. Ӕнӕнизӕй дзы цӕрут бирӕ азты дӕргъы, уӕ кӕстӕр уӕхи фӕндиаг уӕд.

Давиды ныййарӕг — Фӕсивӕды социализацийы центры психолог  Нигколты Зӕлинӕ — республикӕйы Сӕргълӕууӕгӕн арфӕ кӕнгӕйӕ, загъта, ӕнхъӕл дӕр кӕй нӕ уыд, сӕ фӕндон афтӕ тагъд сӕххӕст уыдзӕн, уымӕн.

— Стыр арфӕ кӕнын республикӕйы разамындӕн ӕмӕ Александр Матовниковӕн, нӕ куырдиат ӕнӕдзуаппӕй кӕй нӕ баззад, уый фӕдыл. Стӕй арфӕ кӕнын хӕрзаудӕн фонд «Быть добру»-йӕн, уымӕн ӕмӕ нӕм ӕппӕты фыццаг телефонӕй уыдон ӕрбадзырдтой ӕмӕ нын нӕ фыстӕг куырдиатимӕ Мӕскуымӕ уыдон арвыстой. Арфӕ кӕнын се ‘ппӕтӕн дӕр, — загъта ныййарӕг мад.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here