Таурӕгъон богалы кадӕн

0
62

Ирыстоны спортивон кад фыццагдӕр дунейыл чи айхъуысын кодта, уыцы таурӕгъон лӕгтӕй иу уыд ССР Цӕдисы спорты сгуыхт мастер Хъуылаты Бадзи.

Хъуылаты Бадзи уӕгъдибар хъӕбысхӕстӕй уыд Советон Цӕдисы цыппар хатты чемпион, къорд хатты уыд Уӕрӕсейы чемпион, 1955 азы ссис дунеон Универсиадӕйы уӕлахиздзау, 1956 азы та Олимпаг хъӕзтыты рамбылдта ӕвзист майдан. Уый уыд Ирыстоны спортсменты фыццаг ахӕм стыр ӕнтыстдзинад.

Хъуылаты Бадзи дӕс азы дӕргъы уыд Советон Цӕдисы иугонд командӕйы капитан. Йе стыр спортивон ӕнтыстдзинӕдты тыххӕй йын саккаг кодтой «Советон Цӕдисы спорты сгуыхт мастер»-ы кадджын ном. Уыцы кадджын номӕй Ирыстоны спортсментӕй фыццагдӕр хорзӕхджын чи ссис, уый уыд Хъуылаты Бадзи.

Бадзи йе ‘ппӕт цард дӕр сбаста спортимӕ. Бирӕ азты тынг зӕрдиаг куыст фӕкодта нӕ республикӕйы стадион «Спартачы», уый фӕстӕ та спортивон галуан «Манеж»-ы директорӕй. Уый уыди ӕцӕг таурӕгъон богал. Йе ‘мбӕлттӕ Бестауты Алымбег, Дзахсораты Тауызбег, Бекмӕрзты Михал, Кучиты Аслӕнбег, Тедеты Елхъан, Киситы Юри ӕмӕ иннӕтимӕ акъӕртт кодтой Ирыстоны фӕсивӕдӕн фӕндаг спорты стыр бӕрзӕндтӕм.

2008 азы Бадзи цардӕй куы ахицӕн, уӕд, бирӕ азты разамынд цы спортивон галуанӕн лӕвӕрдта, уымӕн лӕвӕрд ӕрцыд Хъуылаты Бадзийы ном. 19 декабры галуанмӕ ӕрбацӕуӕны размӕ цы фӕз ис, уырдӕм ӕрбацыдысты йӕ хиуӕттӕ, йе ‘мбӕлттӕ, йе ‘мкусджытӕ, спортуарзджытӕ. Уыцы бон спортивон галуанмӕ бахизӕн къулыл гомгонд цыд Бадзийы номарӕн фӕйнӕг йӕ сурӕтимӕ.

Фӕйнӕг кадджын уавӕры гомкӕныны мадзалы архайдтой РЦИ-Аланийы Хицауады Сӕрдар Тускъаты Таймураз, Дзӕуджыхъӕуы бынӕттон администрацийы сӕргълӕууӕг Фӕрниаты Тамерлан, нӕ республикӕйы физкультурӕ ӕмӕ спорты министр Хуыгаты Алан, Хъуылаты мыггаджы минӕвӕрттӕ. Тускъаты Таймураз ӕмӕ Уӕрӕсейы сгуыхт тренер Тауытты Валери сӕ раныхӕсты фӕнысан кодтой, Хъуылаты Бадзи Ирыстоны спортивон историйы цы стыр фӕд ныууагъта ӕмӕ, йӕ ном йӕ удӕгасӕй таурӕгъон кӕй ссис, уыдӕттӕ. Номарӕн фӕйнӕг байгом кодтой Тускъаты Таймураз ӕмӕ Бадзийы чызг Зӕлинӕ.

Хъуылаты мыггаджы номӕй, ацы мадзал арӕзт кӕй фӕрцы ӕрцыд, уыдонӕн зӕрдиаг арфӕ ракодта Хъуылаты Уырысби.

Бадзийы бинойнаг Хъуылаты-Санаты Азӕ йӕ арфӕйы ныхасы загъта: «Стыр бузныг зӕгъын нӕ бинонты номӕй Битарты Вячеславӕн, Тускъаты Таймуразӕн ӕмӕ ма сӕ фарсмӕ чи ӕрбалӕууыд, уыдонӕн, ацы номарӕн цӕмӕй срӕвдз уа, ууыл кӕй бацархайдтой, уый тыххӕй. Бузныг зӕгъын скульптор Сабеты Георгийӕн дӕр. Уый Бадзийӕн йӕ цырт саразӕг уыд ӕмӕ та ныр дӕр бацархайдта зӕрдиагӕй. Бадзи сыл цардаудӕн кӕнӕд».

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here