Дзукъаты Давид рамбылдта ӕвзист майдан

0
18

Налцыччы дӕс боны дӕргъы боксӕй цыдысты Уӕрӕсейы фыццаг бынат бацахсыныл ерыстӕ фӕсивӕды (19-22-аздзыдты) ‘хсӕн.

Ирыстонӕй ерысты архайдтой, амӕй размӕ ӕрыгӕтты ‘хсӕн нӕ бӕстӕйы фыццаг бынӕттӕ чи ахста, уыцы дыууӕ боксеры Борис Карибян ӕмӕ Дзукъаты Давид. Хъыгагӕн, нӕ курдиатджын боксер Борис Карибянӕн ацы хатт йӕ архайд нӕ фӕрӕстмӕ ӕмӕ ӕгӕр раджы кӕй фӕхӕрд, уый аххосӕй ӕнӕ хӕрзиуӕгӕй баззад.

Ӕндӕр хуызы рауад Сланты Владимиры хъомылгӕнинаг Дзукъаты Давиды архайд. Давид фӕд-фӕдыл фӕуӕлахиз цыппар ныхмӕлӕууӕгыл. Уыдонӕй дыууӕйы рамбылдта нокауттӕй, дыууӕйӕ та зынгӕ тыхджындӕр уӕвгӕйӕ. 75 кг онг уӕзы хӕцгӕйӕ, кӕронбӕттӕны Давиды ныхмӕлӕууӕг уыд белгородаг тыхджын боксер Никита Воронов. Ӕртӕ раунды дӕр се ‘хсӕн цыд ахъаззаг тох ӕмӕ тӕрхонгӕнджытӕн ӕнцон нӕ уыд фӕуӕлахизуӕвӕджы равзарын. Ӕппынфӕстаг фылдӕр хъӕлӕстӕ лӕвӕрд ӕрцыд Никита Вороновӕн ӕмӕ уый ссис Уӕрӕсейы чемпион, Дзукъаты Давид та бацахста 2-аг бынат. Давиды куы бафарстам: «Разы дӕ тӕрхонгӕнджыты фӕндимӕ?», уӕд дзуапп радта: «Ахӕм ерысты алцыдӕр ӕрцӕуы. Цӕмӕй тӕрхонгӕнджытӕ дызӕрдыг ма кӕной, уый тыххӕй мӕ хъуыд дӕрзӕгдӕр уӕвын ӕмӕ фылдӕр цӕфтӕ ныккӕнын. Хъыгагӕн, мын уый нал бантыст. Никита Воронов тыхджын ныхмӕлӕууӕг у ӕмӕ уыд тынг къӕрцхъус. Мӕн ма, чи зоны, бахъыгдардта ерысты хӕд размӕ иу чысыл кӕй арынчын дӕн, уый дӕр. Ӕз уымӕй мӕхи нӕ раст кӕнын, фӕлӕ ныр лӕмбынӕгдӕр хъуыды кӕндзынӕн ерысты агъоммӕ».

Йӕ хъомылгӕнинаджы архайды тыххӕй Сланты Владимир зӕгъы: «Давид Налцыччы, ӕнӕмӕнг, хорз бокс равдыста. Йӕ цыппар ныхмӕлӕууӕджы дӕр ӕнӕдызӕрдыгӕй куы рамбылдта, уӕд йӕхимӕ ӕркӕсын кодта, куыд специалистты, афтӕ спортуарзджыты дӕр. Мӕнмӕ гӕсгӕ, кӕронбӕттӕны Давид Никита Вороновӕй лӕмӕгъдӕр нӕ уыд, фӕлӕ ахӕм уавӕры тӕрхонгӕнджытӕн дӕр ӕнцон нӕ вӕййы уӕлахиздзауы равзарын. Цы ӕрцыдис, уый раздахӕн нал ис, ӕмӕ ныр хъуыды кӕндзыстӕм нӕ фидӕны ерыстыл. Давид хӕрзӕгъдау ӕмӕ куыстуарзаг лӕппу у, ӕмӕ нӕ уырны, нырма йе стырдӕр уӕлахизтӕ разӕй кӕй сты, уый».

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here