Хӕлардзинады аллей

0
31

Цӕгат Ирыстоны Парламенты депутат Быценты Станиславы хъӕппӕрисӕй Турчы фӕзынд хӕлардзинады аллей. Мӕздӕджы районы ӕвзонг дзюдоисттӕ дзы ныссагътой 33 назбӕласы талайы.

Мӕздӕджы физкультурон-дзубӕхгӕнӕн комплекс «Чемпион»-ы спортивон секцийы уӕнгтӕ дунеон турниры архайдтой туркаг горӕт Караманы. Семӕ ацыд парти «Иугонд Уӕрӕсе»-йы бынӕттон хайады нымӕрдар, физкультурон-дзӕбӕхгӕнӕн комплексы директор Быценты Станислав дӕр. Дыууӕ бӕстӕйы ӕхсӕн бастдзинӕдтӕ кӕй фидар кӕнынц, уый кадӕн Быцены-фырт бахаста Турчы Хӕлардзинады аллей саразыны фӕндон.

Туркӕгтӕ йӕ фӕндоныл ӕхсызгонӕй сразы сты. Бынӕттон университеты студентты городокы аллейы талатӕ ныссадзын хаст ӕрцыд турниры программӕмӕ, ӕмӕ йӕ сӕххӕст кодтой кадджын уавӕры. Фыццаг тала ныссадзыны бар радтой Быцены-фыртӕн. Ирыстойнаг командӕйы алы уӕнг дӕр ныссагъта Ирыстонӕй ласт фӕйнӕ ӕртӕ талайы.

— Ацы хъӕппӕрисӕн ис стыр ахадындзинад. Нырӕй фӕстӕмӕ нӕ горӕты уыдзӕн алы адӕмыхӕттыты минӕвӕртты хӕлардзинады кадӕн бӕлӕстӕ садзыны ӕвӕджиауы ӕгъдау, — загъта Караманы мэр.

— Мӕздӕггаг ӕвзонг дзюдоисттӕ мын мӕ фӕндон сӕххӕст кодтой, ӕмӕ сын зӕгъын бузныг. Хӕдзарӕй рацӕугӕйӕ, мах вӕййӕм нӕ мыггаджы, республикӕйӕ рацӕугӕйӕ та — Ирыстоны минӕвӕрттӕ. Фӕсарӕнты уӕвгӕйӕ, нӕ паддзахады кад хъахъхъӕнӕм, ӕмӕ алы уӕрӕсейагмӕ дӕр ацы хъуыддаджы стыр бӕрнондзинад кӕй хауы, нӕ кӕстӕртӕ уый хъуамӕ сӕ зӕрдыл дарой. Ныртӕккӕ не ‘мбӕстӕгтӕй бирӕтӕ цӕрынц Турчы, Мӕздӕджы районы та ис туркӕгты-месхетинӕгты стыр ӕхсӕнад. Хӕлардзинад хъуыддагӕй ӕвдисӕм. Нӕ хӕс у нӕ бастдзинӕдтӕ фидар кӕнын, ӕндӕр адӕмыхӕттыты минӕвӕрттимӕ хӕларӕй цӕрын, — загъта Быцены-фырт.

Республикӕмӕ ӕрбаздӕхгӕйӕ, Станислав фембӕлд Мӕздӕджы районы туркаг ӕхсӕнады разамонӕг Мехриали Саражовимӕ ӕмӕ йын ракодта ӕвӕджиауы лӕвар — Турчы ӕлхӕд Хъуыран.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here