Йӕ фӕндыр уарзтыл зарыд…

0
127

УФ-йы сгуыхт ӕмӕ РЦИ-Аланийы адӕмон артисткӕ Реуазты Симӕйы райгуырдыл ӕххӕст кӕны 90 азы.

Реуазты Симӕ… Ацы сылгоймаджы ном Ирыстоны дзыллӕтӕй бирӕтӕн у уарзон ӕмӕ зынаргъ. Уый йӕ уӕздандзинадӕй, ирд курдиатӕй, аивадӕн ӕрдхӕрӕны лӕггадӕй рӕсугъд ном скодта йӕхицӕн. Йӕ фӕндыры алы зӕл дӕр йӕ уд ӕмӕ зӕрдӕйау нывӕзт уыд фыдӕлтыккон уӕздандзинады ӕмӕ райгуырӕн уӕзӕгмӕ сыгъдӕг уарзты тӕгтӕй.

Реуазты Симӕ райгуырд ӕрыдоны. Йӕ ныййарджытӕ уыдысты зонд ӕмӕ зӕрдӕйы хаттӕй хъӕздыг, нымад хистӕртӕ. Йӕ фыд Гамбол йӕ рӕстӕджы каст фӕцис ӕрыдоны дины семинар, зарыд ацы ахуыргӕнӕндоны хоры. Фӕстӕдӕр афтыд Германмӕ ӕмӕ уым дӕр ӕнтыстджынӕй каст фӕцис уӕлдӕр скъолатӕй иу. Ирыстонмӕ куы ссыд, уӕд кад ӕмӕ радӕй цард ӕрыдоны. Афтӕмӕй Симӕ хъомыл кодта, ахуырадӕн, музыкӕйӕн, чиныгӕн стыр аргъ кӕм кодтой, ахӕм фӕллойуарзаг бинонты ӕхсӕн.

Ирон фӕндыр Симӕ бауарзта йӕ сабибонтӕй фӕстӕмӕ. Аст къласы каст куы фӕцис, уӕд Цӕгат Ирыстоны хицауады уынаффӕмӕ гӕсгӕ арӕзт ӕрцыд республикӕйы паддзахадон радиойы адӕмон инструментты оркестр ӕмӕ Симӕ цыппӕрдӕсаздзыдӕй ист ӕрцыд ног аивадон къордмӕ. Йӕ фыццаг ахуыргӕнӕг уыд зындгонд музыкант ӕмӕ оркестры дирижер Леон Давыдов. Симӕимӕ ма оркестры къӕсӕрӕй фыццаг хатт чи бахызт ӕмӕ йе сфӕлдыстадон азфысты ирд фӕд чи ныууагъта, уыдон уыдысты далафӕндырыл цӕгъдджытӕ Дзугаты Кимӕ ӕмӕ ӕгайты Сериффӕ (Дзеппӕ). Фӕстӕдӕр оркестрӕн йӕхи мидӕг ацы курдиатджын чызджытӕй арӕзт ӕрцыд музыкалон трио. Адӕм сӕ буцӕн хуыдтой «Кимӕ, Симӕ, Серафимӕ». Кӕд адӕм хӕсты рӕстӕг ӕмӕ уый фӕстӕ азты бирӕ зындзинӕдтӕ ӕййӕфтой, уӕддӕр сын аивад басгуыхт ныфсдӕттӕг ӕмӕ ӕнцой, сӕ зӕрдӕты сын гуырын кодта хуыздӕр цардыл ӕууӕнк, сагъта сыл разӕнгардгӕнӕн базыртӕ. Уымӕн хорз ӕвдисӕн уыд, оркестр уыцы азты радиойы, комкоммӕ эфиры ӕмӕ хъӕуты бирӕ концерттӕ кӕй лӕвӕрдта, уый.

Симӕ, оркестры кусгӕйӕ, йӕхи равдыста зонындзинӕдтӕм тырнӕг, музыкӕйы, алы зарӕджы, мелодийы хъуыды зӕрдӕйӕ арф банкъарыныл чи архайдта, ахӕм музыкантӕй, курдиатджын фӕндырдзӕгъдӕгӕй. Йӕ зӕрдӕйы ахастӕн ын стыр аргъ кодта Леон Давыдов. Уый фӕндӕй Фыдыбӕстӕйы Стыр хӕсты фӕстӕ Симӕ бацыд Дзӕуджыхъӕуы музыкалон училищӕмӕ ӕмӕ дзы райста домбрӕйыл цӕгъдӕджы дӕсныйад. Курдиатджын фӕндырдзӕгъдӕгӕй, арӕхстджын музыкантӕй Симӕйы базыдтой Мӕскуыйы, грампластикӕтӕ уадзӕг фирмӕ «Мелодия»-йы редактортӕ ӕмӕ звукорежиссертӕ дӕр. Уыдон ын йӕ рӕсугъд фӕндыры цагъд, куыд хицӕнӕй, афтӕ адӕмон инструментты национ оркестримӕ иу ӕмӕ дыууӕ хатты нӕ ныффыстой. Дисы сӕ ӕфтыдта Симӕйы ӕрмдзӕф, стӕй ахъаззаджы куыстхъомдзинад. Уымӕн ӕмӕ сын йемӕ кусын уыд бӕрӕгбонау ӕхсызгон. Уыдон хорз ӕмбӕрстой, йӕ фӕндырдзагъд йӕ зӕрдӕйы ӕрфытӕй кӕй гуыры, уый. Ӕрӕджы мын Гӕздӕнты Булат Симӕйы тыххӕй афтӕ радзырдта:

— Реуазты Симӕйы фӕндырдзагъды мелодикон арӕзт уыд тыннывӕндӕгау аив ӕмӕ рӕсугъд. Иу зӕлӕй йӕ бон уыд ӕнӕхъӕн фӕлгонц, цард, ӕрдз, адӕймаджы миддуне равдисын, зӕрдӕйы цинтӕ ӕмӕ сагъӕстӕ зӕгъын. «Дзиго»-йы зарӕджы цагъд тынг цыбыр уыд, фӕлӕ йӕ Симӕ фӕуӕрӕхдӕр, фӕрӕсугъддӕр кодта. Фыццаг уыцы хуызы ацагъта зындгонд композитор Юровы мелодитӕ. Симӕ фӕндырдзагъды аивады уыдис тынг бӕлвырд адӕймаг. Алы музыкалон уацмысӕн дӕр адӕймаджы зӕрдӕмӕ хицӕн фӕндаг кӕй ис, уый зыдта ӕмӕ йӕм ардта йӕхи «дӕгъӕл». Ӕмӕ йӕ арӕхстджынӕй гом кодта.

Сӕрмагондӕй зӕгъын ӕмбӕлы йӕ удыхъӕды тыххӕй. Симӕ уыд ӕрдзӕй уӕздан, фырнымд ӕмӕ хиуылхӕст адӕймаг. Йӕ цардӕмбал Есиаты Сулейман та тугӕй, удыхъӕдӕй, ӕгъдауӕй уыд Симӕйау мадзура, йӕ сӕр сӕрмӕ чи хӕссы, ӕвзӕрдзинад ракӕнын йӕ фӕсонӕрхӕджы дӕр кӕмӕн нӕй, ахӕм нӕртон лӕг. Симӕ ӕмӕ Сулейманы ӕхсӕн уыд диссаджы фӕрнджын бастдзинад, сыгъдӕг ӕмӕ табуйаг уарзондзинад. Уый абон дӕр ӕмбисонды дӕнцӕгӕн хӕссинаг у ӕрыгон бинонтӕн. Кӕрӕдзимӕ сӕ ахаст цас фидар ӕмӕ бӕллиццаг уыд, уый цӕстӕнгасӕй дӕр ӕвдыстой. Уӕдӕ цины, зианы рӕстӕг сӕ ӕгъдау раттынмӕ дӕр ничи ӕмбылдта. Кӕд сӕ дыууӕ дӕр царды зындзинӕдтӕ бавзӕрстой, уӕддӕр сӕ удыхъӕд баззад сыгъдӕгӕй, хъысмӕтӕй уыдысты райгонд, сӕ фӕзминаг кӕстӕртӕй та — буц.

Реуазты Симӕйӕн стыр аргъ кодтой оркестры музыканттӕ се ‘ппӕт дӕр. Йӕ уӕздандзинад ӕмӕ курдиатӕн ын кодтой табу. Йӕ курдиат алывӕрсыг уыд. Уый канд адӕмон иструментты оркестры нӕ куыста, фӕлӕ бирӕ хорз фӕсивӕды сахуыр кодта йӕ дӕсныйадыл. Симӕ удыхъӕдӕй ӕмӕ курдиатӕй куыд рӕсугъд адӕймаг уыдис, уыцы хуызы ахуыр кодта йӕ бирӕ хъомылгӕнинӕгты дӕр. Уыдон дӕр йӕхийау сты уӕздан, курдиатӕй ӕмӕ зондӕй — хъӕздыг музыканттӕ. Ирон фӕндырдзагъды сусӕгдзинӕдтӕ базонын кӕй фӕнды, аивадимӕ йӕ цард сбӕттынмӕ чи хъавы, уыцы фӕсивӕдӕн Симӕ ракодта йӕ рӕстӕджы ахъаззаджы лӕвар. Мыхуыры рауагъта, йӕхӕдӕг кӕй ӕрхъуыды кодта, стӕй профессионалон ӕгъдауӕй кӕуыл бакуыста, уыцы цӕгъдтыты нотӕты ӕмбырдгонд. Абон уыцы чиныг ссис агургӕ ӕмӕ ӕнӕаргӕ хӕзна.

Реуазты Симӕ кӕддӕриддӕр, куыд жюрийы уӕнг, афтӕ архайдта фӕндырдзӕгъдджыты республикон конкурсты. Ам дӕр йӕхи ӕвдыста тынг уӕзданӕй. Конкурсы архайӕг-иу йӕ цагъды истӕмӕй куы фӕрӕдыд, уӕд ын-иу Симӕ йӕ рӕдыд ӕмбарын кодта лӕгъзӕй, тызмӕг, схуыст ныхас дзы никуы ничи фехъуыста.

Симӕ къорд зӕрдӕмӕдзӕугӕ зарӕджы ныффыста Чеджемты ӕхсары, Кокайты Тотрадзы ӕмдзӕвгӕтыл. Зарынц сӕ, куыд профессионалон, афтӕ хӕдахуыр зарӕггӕнджытӕ дӕр. Арӕх фӕзӕлынц радиойӕ ӕмӕ телеуынынадӕй.

Ацы бонты зындгонд музыканты райгуырдыл ӕххӕст кӕны 90 азы. Кӕд не ‘хсӕн нал ис, уӕддӕр йӕ ном цӕры нӕ дзыллӕйы зӕрдӕйы. Йӕ бирӕ ахуырдзаутӕ та йын йӕ курдиаты рухс зынг таудзысты фӕлтӕрты зӕрдӕты.

Гасанты Валери

ОСТАВЬТЕ ОТВЕТ

Please enter your comment!
Please enter your name here