Ерыстӕ ног азы хӕдразмӕ

0
16

Нӕ республикӕйы афӕдзы фӕстаг бонтӕ, куыд алы аз, афтӕ та ацы хатт дӕр хъӕздыг рауадысты спортивон ерыстӕй. Ӕппӕты фылдӕр ерыстӕ цыдысты уӕгъдибар хъӕбысхӕстӕй ӕрыгӕттӕ ӕмӕ фӕсивӕды ‘хсӕн.

20 декабры Октябрыхъӕуы 3-аг хатт цыдысты Уӕрӕсейы сгуыхт тренер Лалыты Лавренты номарӕн турниры ерыстӕ ӕрыгӕтты (17 азы онг) командӕты ӕхсӕн.

Турнир аразджытӕ уыдысты Горӕтгӕрон районы бынӕттон администраци ӕмӕ РЦИ-Аланийы Физкультурӕ ӕмӕ спорты министрад. Ӕдӕппӕт ерысты архайдтой аст командӕйы. Уыдонӕй дыууӕ уыдысты Горӕтгӕроны районӕй иннӕтӕ та: Алагиры район, Рахизфарсы район ӕмӕ Дзӕуджыхъӕуы цыппар командӕйы: «Андиаты Сосланы номыл скъола», «Лӕгӕй-лӕгмӕ хӕстыты скъола», «Ӕвзонг Уӕрӕсе», «ӕрыгӕтты республикон спортивон скъола».

Командон ерыстӕ кӕдфӕнды дӕр вӕййынц цымыдисаг. Спорты ветеран, Таджикистаны сгуыхт тренер Едзаты Виктор тынг зӕрдиагӕй касти ӕрыгӕтты ерыстӕм ӕмӕ йӕ куы бафарстам: «Ерыстӕ дӕ зӕрдӕмӕ цӕуынц?» Уӕд дзуапп радта: «Ӕз ӕрыгӕтты архайдмӕ кӕсын тынг уарзын. Ам фенӕн вӕййы бирӕ ӕнӕнхъӕлӕджы фӕзындтытӕ. Уӕлдайдӕр ма ерыстӕ командон куы вӕййынц, уӕд уый та ноджы цымыдисагдӕр у. Командон ерыстӕ ахъаз сты ӕрыгон спортсменты бӕрнондзинадыл ахуыр кӕнынӕн. Ацы ран богал афтид йӕхи ӕнтыстдзинадыл нӕ тох кӕны, фӕлӕ ма дзуапдӕттӕг у йӕ командӕйы иумӕйаг бӕрӕггӕнӕныл дӕр. Уымӕ гӕсгӕ ам мах федтам бирӕ цымыдисаг фембӕлдтытӕ».

Командӕтӕ дихгонд уыдысты дыууӕ дӕлкъордыл. Дӕлкъорд «А»-йы 1-аг бынат бацахста Горӕтгӕрон районы 1-аг командӕ, 2-аг та ссис Алагиры районы командӕ.

Дӕлкъорд «В»-йы 1-аг бынатмӕ рацыд Рахизфарсы районы командӕ, 2-аг бынат та бацахстой Андиаты Сосланы номыл скъолайы хъомылгӕнинӕгтӕ.

Афтӕмӕй, 3-аг бынат бацахсыныл ерыс кодтой Алагир ӕмӕ Андиаты Сосланы номыл скъола, 1-аг бынат бацахсыныл та фембӕлдысты Горӕтгӕрон ӕмӕ Рахизфарсы районты командӕтӕ. 3-аг бынатыл ерыстӕ ахицӕн сты Алагиры районы богӕлтты пайдайӕн 7:3 хыгъдӕй.

1-аг бынатыл ерысты Рахизфарсы районы ӕрыгон богӕлттӕ фыццаг фондз фембӕлды фӕд-фӕдыл куы рамбылдтой, уӕд бирӕтӕ загътой, ныр ерысы уӕлахиздзау бӕрӕг у, зӕгъгӕ. Фӕлӕ, ӕвӕдза, спортивон ерыстӕ цымыдисаг уымӕй вӕййынц, ӕмӕ дзы адӕймаджы зӕрдӕйы ӕвиппайды гуырын кӕнынц алыхуызон монцтӕ ӕмӕ ӕнкъарӕнтӕ. Афтӕ рауад ацы командон ерысты дӕр.

Горӕтгӕрон районы богӕлттӕ 45,48,51,55 ӕмӕ 60 кг онг уӕзты куы фӕхӕрд сты ӕмӕ хыгъд 0:5 Рахизфарсы пайдайӕн куы сси, уӕд фысымты богӕлттӕн сӕ ныфс нӕ асасти ӕмӕ атындзыдтой беслӕйнӕгты баййафынмӕ. Фысымтӕн ма бантыст ӕртӕ уӕзы фӕуӕлахиз уӕвын, фӕлӕ уӕддӕр сӕ къухы нал бафтыд уазджыты командӕйы баййафын, ӕмӕ кӕронбӕттӕны фембӕлд дӕр ахицӕн 7:3 хыгъдӕй Рахизфарсы районы ӕрыгон богӕлтты пайдайӕн. Афтӕмӕй, Лалыты Лавренты 3-аг номарӕн турниры уӕлахиздзаутӕ ӕмӕ призон бынӕттӕ бацахсджытӕ систы: Рахизфарсы (1-аг), Горӕтгӕрон (2-аг) ӕмӕ Алагиры (3-аг) районты командӕтӕ.

Ӕртӕ фыццаг бынаты бацахсӕг командӕтӕн майдантӕ ӕмӕ кубоктӕй уӕлдай лӕвӕрд ӕрцыд ӕхцайы премитӕ дӕр 50, 30 ӕмӕ 20 мин сомы.

Уымӕй уӕлдай ма сӕрмагонд лӕвӕрттӕй хорзӕхджын систы Хъулаты Арсен («Хуыздӕр техникон цӕттӕдзинад равдисӕг») ӕмӕ Цхуырбаты Станислав («Уӕлахизмӕ тырнындзинад»).

Лалыты Лавренты фырт Георги сӕ бинонты номӕй зӕрдиаг арфӕ ракодта Горӕтгӕрон районы бынӕттон администраци ӕмӕ нӕ республикӕйы Физикон культурӕ ӕмӕ спорты министрадӕн, турнир саразынмӕ кӕй баххуыс кодтой, уый тыххӕй.

21 декабры Беслӕны 25-ӕм хатт цыдысты Уӕрӕсейы сгуыхт тренертӕ Дзӕгъойты Рамазан ӕмӕ Наниты Оледжы номарӕн турниры ерыстӕ, фӕсивӕды (21 азы онг) ‘хсӕн. Турниры цы 160 богалы ерыс кодтой, уыдоны ‘хсӕн уыдысты Кӕсӕг-Балхъары республикӕйы минӕвӕрттӕ дӕр.

Ерыстӕ кадджын уавӕры гом кӕнгӕйӕ спортсментӕн, уазджытӕн ӕмӕ спортуарзджытӕн зӕрдиаг арфӕ ракодтой: Рахизфарсы районы сӕргълӕууӕг Фрайты Сослан, Дзӕгъойты мыггаджы хистӕр Дзӕгъойты Петр, РЦИ-Аланийы Парламенты депутат Гуытъиаты Вячеслав, ерысты сӕйраг тӕрхонгӕнӕг, Уӕрӕсейы сгуыхт тренер Багаты Вячеслав.

Куыд алы хатт, афтӕ та ныр дӕр беслӕйнӕгтӕ бацархайдтой ерыстӕн хорз уавӕртӕ саразыныл, ӕмӕ богӕлттӕ дӕр равдыстой сӕ хуыздӕр гӕнӕнтӕ. Гауызтыл кӕрӕдзийы ивгӕйӕ, цыдысты амӕй-ай цымыдисагдӕр тохтӕ. Богӕлттӕй бирӕтӕ равдыстой хорз техникон цӕттӕдзинад ӕмӕ уӕлахизмӕ тырнындзинад. Уӕдӕ хъӕбысхӕст цӕмӕй рӕсугъд вӕййы, ахӕм ӕппӕрстытӕ ӕмӕ ӕнӕнхъӕлӕджы фӕзындтытӕ дӕр гыццыл нӕ уыд сӕ архайды.

Ерысты архайдтой, ныридӕгӕн сӕ карӕнты ‘хсӕн Уӕрӕсейы ӕмӕ ма фӕсарӕнты дӕр зындгонд чи у, къорд ахӕм богалы.

Ӕппӕты рогдӕр уӕзы (57 кг) кӕронбӕттӕны 1-аг бынатыл тохы фембӕлдысты Горӕтгӕрон районы минӕвӕрттӕ Къаболаты Таймураз ӕмӕ Дзауров Алик. Сӕ хъазуатон фембӕлд ахицӕн 3:2 хыгъдӕй, Къаболаты Таймуразы пайдайӕн.

61 кг онг уӕзы тынг сӕрӕн хӕст ракодта Хъызынты Дзамболат (Дыгуры район). Дзамболат кӕронбӕттӕны зынгӕ цӕттӕдӕр разынд алагираг богал Годызты Хетӕгӕй ӕмӕ бацахста 1-аг бынат ӕнӕкъуылымпыйӕ.

Тынг зӕрдӕмӕдзӕугӕ хӕст кодта Зехъеты Ислам. Йӕ ныхмӕлӕуджытӕй Исламы ӕрхъуыдыджын, цырд ӕмӕ бирӕвӕрсыг архайды ныхмӕ фӕлӕууын ничи бафӕрӕзта ӕмӕ бацахста 1-аг бынат. 2-аг бынатмӕ рацыди Гаджиты Аслан (Андиаты Сосланы номыл скъола). Зехъеты Ислам (ӕрыгӕтты республикон спортивон скъола) сыгъзӕрин майдан ӕмӕ дипломӕй уӕлдай, хорзӕхджын ссис сӕрмагонд приз «Хуыздӕр техникон цӕттӕдзинад равдисӕг»-ӕй.

70 кг онг уӕзы хорз цӕттӕдзинад равдыстой Калоты Сослан (ӕрыгӕтты республикон спортивон скъола) ӕмӕ Кӕсӕг-Балхъары республикӕйаг богал Резуан Кажаров.

Кӕронбӕттӕны сӕ фембӕлд рауад тынг хъазуатон. Дыууӕ богалы дӕр уыдысты уӕлахизы аккаг, фӕлӕ спортивон амонд фӕци Кажаровы фарс, ӕмӕ уый рамбылдта 4:2 хыгъдӕй. Резуан Кажаровы тренер Закире Желдашевы Дзӕгъойты мыггаг схорзӕхджын кодтой сӕрмагонд лӕварӕй.

74 кг онг уӕзы дӕр турниры уӕлахиздзау ссис Кӕсӕг-Балхъары республикӕйы минӕвар Абдар-Рахман Кумыков. Уый кӕронбӕттӕны фембӕлд Андиаты Сосланы номыл скъолайы хъомылгӕнинаг Хъарданты Мӕхӕмӕтимӕ ӕмӕ йын бантыст ӕртӕ хатты фӕйнӕ иу баллы рамбулын. Сӕ тох ахицӕн 3:0 хыгъдӕй Кумыковы пайдайӕн, ӕмӕ уый бацахста фыццаг бынат.

Йӕ ӕппӕт ныхмӕлӕуджытӕй дӕр зынгӕ цӕттӕдӕр разынд Чертыхъоты Руслан (Горӕтгӕрон район). 79 кг онг уӕзы Руслан ӕнӕкъуылымпыйӕ фӕуӕлахиз и цыппар ныхмӕлӕууӕгыл ӕмӕ кӕронбӕттӕны 11:1 хыгъдӕй рамбылдта йӕ ныхмӕлӕууӕг Гӕбуты Асланӕй (Алагиры район).

86 кг онг уӕзы кӕронбӕттӕнмӕ рацыдысты Багаты мыггаджы дыууӕ богалы Арслан ӕмӕ Алан. Дыууӕйӕ дӕр рамбылдтой сӕ фӕйнӕ цыппар ныхмӕлӕууӕгӕй ӕмӕ хъуамӕ фембӕлдаиккой 1-аг бынатыл тохы. Уыцы фембӕлд нал рауад ӕрдӕгкӕронбӕттӕны хӕцгӕйӕ Арслан кӕй фӕцӕф, уый тыххӕй, ӕмӕ 1-аг бынат бацахста Багаты Алан. Рахизфарсы районы сӕргълӕууӕг, Европӕйы ӕмӕ Уӕрӕсейы раздӕры чемпион Фрайты Сослан, Багаты Арсланы уый размӕ цы лӕгдзинад равдыста, уый тыххӕй схорзӕхджын кодта сӕрмагонд лӕвар «Уӕлахизмӕ тырнындзинад»-ӕй.

Горӕтгӕрон районы богӕлттӕ ӕлборты Арсен ӕмӕ Зассеты Арсен кӕронбӕттӕны фембӕлдысты 1-аг бынат бацахсыныл ерысы. Ацы фембӕлды ӕлборы-фырт уыди зынгӕ цӕттӕдӕр ӕмӕ фӕуӕлахиз 11:1 хыгъдӕй.

97 кг онг уӕзы 1-аг бынатмӕ рацыд Коцойты Тамерлан (Рахизфарсы район), 2-аг та ссис Плиты Ацӕмӕз («Ӕвзонг Уӕрӕсе»).

Уӕззау уӕзы (125 кг онг) йӕ рӕстӕджы ӕнтыстджынӕй хӕцыди Наниты Олег. Ацы уӕзы ӕрыгӕтты ‘хсӕн уыди дунейы 1-аг бынат бацахсӕг, фӕсивӕды ‘хсӕн та уыд Европӕйы чемпион. Наниты бинонтӕ уӕззау уӕзы фӕуӕлахизуӕвӕгӕн скодтой сӕрмагонд лӕвар. Уыцы лӕвар ӕмӕ уӕззау уӕзы уӕлахиздзауы сыгъзӕрин майдан ӕмӕ кубок райста Хосонты Азӕмӕт (Рахизфарсы район). Азӕмӕтӕн кӕронбӕттӕны тыхджын ныхкъуырд радта Саулохты Нодар (Андиаты Сосланы номыл скъола). Сӕ ерысы хыгъд уыди 2:1 Хосоны-фырты пайдайӕн. Уӕлахиздзау ӕмӕ призон бынӕттӕ бацахсӕг богӕлттӕ: Хосонты Азӕмӕт, Саулохты Нодар, Къӕбысты Дэвид ӕмӕ Хуыбылты Олегӕн хӕрзиуджытӕ ӕмӕ лӕвӕрттӕ саккаг кодта Наниты Оледжы ‘фсымӕр Алан.

Дзӕгъойты Рамазан ӕмӕ Наниты Оледжы бинонтӕн сӕрмагонд лӕвӕрттӕ ракодта Фрайты Сослан.

Йӕхи номӕй цалдӕр лӕвары скодта дунейы 2 хатты чемпион Сидахъаты Зауырбег дӕр.

Дзӕгъойтӕ ӕмӕ Наниты бинонтӕ зӕрдиаг арфӕтӕ ракодтой ерыстӕ саразджытӕн, тренертӕн, спортсментӕн. Рамазан ӕмӕ Оледжы рухс нӕмттӕ кӕй нӕ рох кӕнынц, ӕмӕ алы аз дӕр ӕнӕзивӕгӕй сӕ номарӕн турнирмӕ кӕй сӕмбӕлынц, уый тыххӕй.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here