Йӕ хӕдбындур курдиат — цинхӕссӕг

0
23

Адӕймаджы царды ӕрцӕуы ахӕм цаутӕ, ӕмӕ йын йӕ хъысмӕтӕн тӕрхонгӕнӕг чи разыны. УФ-йы сгуыхт ӕмӕ РЦИ-Аланийы адӕмон артист Хуыгаты Суренӕн театр йӕ царды цин кӕй суыдзӕн, йемӕ йӕ цард кӕй сбӕтдзӕн, уый рабӕрӕг, суанг скъолайы ма куы ахуыр кодта, уӕдӕй. Уым архайдта драмон къорды. Цы спектаклты-иу хъазыд, уыдонӕй-иу йӕ фыццаг рацыдӕй дӕр бӕрӕг уыд, дӕсны артист дзы кӕй рауайдзӕн, уый.

Афтӕ, йӕ скъолайы ахуыры азтӕ куы фесты,уӕд иу ахӕмы йӕ райгуырӕн хъӕуы сӕрдыгон хос карста, ӕмӕ йӕ къухтӕм бахауд газет. Фидӕны актер дзы бакаст, Хуссар Ирыстоны Хетӕгкаты Къостайы номыл паддзахадон театр кӕй ӕрвиты ӕрыгон лӕппуты ӕмӕ чызджыты Мӕскуымӕ Щепкины номыл театралон институты ахуыр кӕнынмӕ. Ӕмӕ уӕд хӕрдысайраг лӕппу Сурен сфӕнд кодта йӕ амонд бафӕлварын. Ӕмӕ ӕрцыд Цхинвалмӕ.

Ӕвзарӕн къамисы уыдысты уӕды рӕстӕджы Хуссар Ирыстоны театры артисттӕ, семӕ мӕскуыйаг уазӕг, номдзыд артист ӕмӕ рухстауӕг Владимир Смирнов. Лӕппу сын бакаст ӕмдзӕвгӕтӕ, прозаикон уацмысӕй скъуыддзаг, акафыд ӕмӕ азарыд. Къамисы зӕрдӕмӕ фӕцыд ӕрыгон лӕппуйы сфӕлдыстадон арӕхстдзинад, Суренӕн йӕ фӕлварӕн фӕрӕстмӕ. Афтӕмӕй 1971 азы Таугазты Аслан, Къадзты Филипп, Тадтаты Фатимӕ, Быценты Циснари, Джиоты Галинӕ, Уалыты Вадим, Тедеты Аринӕ ӕмӕ ма ӕндӕр курдиатджын цӕхӕрцӕст фӕсивӕдимӕ ацыд Мӕскуымӕ.

— Щепкины номыл театралон институты алы ахуыргӕнӕджы фӕлтӕрддзинад дӕр нын уыд зонды хос, хиуыл ӕнӕрынцойӕ кусынӕн, сфӕлдыстады ног гӕнӕнтӕ агурынӕн нын сӕ алчидӕр хорз гӕнӕнтӕ арӕзта. Уӕлдай тынгдӕр ныл узӕлыд нӕ курсы аивадон разамонӕг Владимир Смирнов. Уый-иу арӕх афтӕ дзырдта, институты уӕхи ахуыр кӕнут, царды цы хъуыддаг равзӕрстат, уым зӕрдиагӕй кусыныл. Театр магусаты нӕ уарзы, — дзуры нын Сурен, — актерӕн йӕ миддунейы цы ис, уый хъуамӕ равдиса, театралон институты нӕ ахуыр кодтой сфӕлдыстадон хуызы «мидхъизӕмар кӕнын». Мӕскуыйы Чысыл театры амӕй ай хуыздӕр актертӕ сты Щепкины номыл театралон институты рауагъдонтӕ. Нӕ ирон уӕздандзинадыл, ӕгъдау ӕмӕ ӕфсармыл сӕ цӕст ӕрӕвӕрдтой ахуыры фыццаг бонтӕй нӕ ахуыргӕнджытӕ ӕмӕ нӕм уӕлдай хорз цӕстӕй кастыты.

Сурен, стӕй иннӕ ирон фӕсивӕд сӕ хистӕрты ӕмӕ ирондзинады фарныл къӕм абадын никуы бауагътой. Ӕнувыдӕй куыстой се сфӕлдыстадон авналӕнтӕ фӕуӕрӕхдӕр кӕныныл. Суинаг актерӕн йе сфӕлдыстадон азфыст райдыдта, дипломон сценикон куыстыты дунеон драматургийы классикон спектаклты сӕйраг фӕлгонцты кӕй ахъазыд, уымӕй.

Классикон спектаклты хъазгӕйӕ, актер алывӕрсыгӕй кӕй рӕзы, йӕ миддуне хъӕздыгдӕр, йӕ сценикон къахдзӕфтӕ та фидардӕр кӕй кӕнынц, уый Сурен бамбӕрста театралон институты ахуыр кӕнгӕйӕ дӕр. 1977 азы театралон сезоны артист фыццаг хатт рацыд Хуссар Ирыстоны Хетӕгкаты Къостайы номыл паддзахадон театры сценӕмӕ. Уайтагъдӕр йӕхимӕ ӕркӕсын кодта театры хистӕр ӕмӕ астӕуккаг фӕлтӕры артистты ӕмӕ аивадуарзджыты. Йӕ бакаст, йе сныхасӕй, сценӕйы йӕ арӕхстджын архайдӕй се ‘ппӕты зӕрдӕмӕ дӕр фӕндаг ссардта. Йӕ фыццаг рол та дзы уыд Гаглойты Владимиры пьесӕмӕ гӕсгӕ ӕвӕрд спектакл «Хилачъы фидар»-ы. Ацы спектаклы фӕрцы ӕвиппайды рабӕрӕг, Сурен фылдӕр героикон-романтикон сфӕлдыстадон уагыл хӕст кӕй у, уый.

Ӕрмӕстдӕр дыууӕ сезоны ахъазыд Сурен ацы театры, фӕлӕ дзы иу рол иннӕйы хуызӕн нӕ уыд. 1980 азы та йӕ ӕрбахуыдтой кусынмӕ Цӕгат Ирыстоны Тӕбӕхсӕуты Балойы номыл Ирон академион театрмӕ. Ам ын уӕлдай арӕхстджындӕрӕй уыд архайын героикон-романтикон ролты. Уымӕ гӕсгӕ дзы йӕ рӕстӕджы номдзыд артист Уататы Бибо хуымӕтӕджы нӕ загъта, цӕхӕрцӕст Солӕман йӕ фӕстӕ театры ныууагъта йӕ хорз фӕдон, Советон Цӕдисы адӕмон артист Тӕбӕхсӕуты Балойы, мӕнӕн та ме сценикон хъайтартӕн дарддӕр цард чи дӕтдзӕн, уый у Хуыгаты Сурен.

— Дзӕуджыхъӕумӕ куы ӕрцыдтӕн, уыцы рӕстӕг мын ме сфӕлдыстадон тыхтыл ныфс ӕфтыдтой, хистӕр ӕфсымӕры цӕстӕй мӕм кастысты нӕ театры хистӕр ӕмӕ астӕуккаг фӕлтӕр Тӕбӕхсӕуты Балойӕ райдай ӕмӕ Хуырымты Уырызмӕгӕй фӕу. Уыдон тынг тыхджын артисттӕ уыдысты, сӕ алы сныхас, сценӕйы сӕ архайд мӕнӕн уыд зонды хос, — дзуры Сурен.

Нӕ театры сценӕйы Сурен цы сурӕттӕ сарӕзта, уыдонӕн сӕ фыццӕгтӕй иу уыд Гаглойты Владимиры пьесӕмӕ гӕсгӕ ӕвӕрд спектакл «Зӕххон Хуыцӕуттӕ»-йы Саламы рол. Ацы спектаклы ӕвдыст ӕрцыд нӕ адӕмы фӕразондзинад, фӕллойгӕнӕг сылгоймӕгты, зӕронд лӕгты сагъӕстӕ ӕмӕ тухитӕ Фыдыбӕстӕйы Стыр хӕсты ӕмӕ уый фӕстӕ азты. Сценӕйы йӕ цал хатты ӕвдыстой, уал хатты залы къухбакӕнӕн нӕ уыд, адӕм ӕнхъӕлмӕ кастыты йӕ алы равдыстмӕ дӕр. Ӕмӕ спектакл ӕнтыстджын кӕй рауад, уым уыд авторы, режиссер Бекъойты Розӕйы ӕмӕ амӕй ай курдиатджындӕр артистты иумӕйаг ӕнтыст. Ацы спектаклы иттӕг ирдӕй нывӕст ӕрцыд фӕлтӕрты ӕхсӕн бастдзинад, кӕрӕдзиуыл сӕ аудынад, царды цыфӕнды зынты сӕрты дӕр ӕмцӕдис архайды фӕрцы кӕй хизынц, уый.

Нӕ театры сценӕйы ма Сурен сарӕзта сӕйраг ролтӕ ахӕм спектаклты: Максим Горькийы «Царды бын»-ы — Васька Пепел, Хетӕгкаты Къостайы «Фатимӕ»-йы — Ибрагим, Шекспиры “Къарол Лир»-ы — Эдгар ӕмӕ Алкивиад, Лев Толстойы «Власть тьмы»-йы — Никитӕ, Чеховы «ӕртӕ хойы» — Соленый, Хуыгаты Георы «ӕрдхорд ӕфсымӕртӕ»-йы — Хъазан, Туаты Дауыты «Сидзӕргӕс»-ы — Атто, Годжыцаты Исахъы «Сидзӕрты мӕсыг»-ы — Бадри, Еврипиды «Медея»-йы — Ясон, Плиты Грисы «Чермен»-ы — Чермен…

Нӕ театры атисттӕ Бетъырбух ӕмӕ Мӕскуыйы сӕ спектаклтӕ куы ӕвдыстой, уӕд-иу театралон критиктӕ ӕмӕ аивадуарзджытӕ Сурены сценикон архайдӕн, фӕлгонц аразыны мадзӕлттӕй куыд арӕхстджынӕй пайда кӕны, йӕ хъайтары сурӕт раргом кӕнынмӕ куыд дӕсны у, уыцы миниуджытӕн скодтой аккаг аргъ. Дунеон театралон фестивал «ӕнӕ арӕнты сценӕ»-йы та Тедеты Георгийы пьесӕмӕ гӕсгӕ ӕвӕрд спектакл «Авд хуры рухс»-ы сӕйраг — Батойы фӕлгонц кӕй сарӕзта, уый тыххӕй йын лӕвӕрд ӕрцыд фестивалы сӕрмагонд хорзӕх.

Сурен Ирон театры сценӕйы сарӕзта 50 фӕлгонцӕй фылдӕр. Ӕмӕ дзы иу иннӕйы хуызӕн нӕу. Ӕмхуызон хорз ын ӕнтысы, куыд драмон, афтӕ комедион ӕмӕ трагикон спектаклты архайын. Йӕ рӕстӕджы театры ӕвӕрд чи ӕрцыд, уыцы комедион спектаклтӕй иу уыд Чеджемты Георы пьесӕмӕ гӕсгӕ ӕвӕрд спектакл «Цола». Ам Сурен ахъазыд схъӕл, ӕнӕрвӕссон Гуыргъохъойы ролы. Бакастӕй уыд аив, фӕлӕ Сурены хъайтары фӕлгонц ӕппӕрццӕг миниуджытӕй цас дзаг у, уый бӕрӕг кӕны спектаклы сӕйраг архайӕг Цола. Ам ныхмӕвӕрд сты ӕппӕрццӕг ӕмӕ ӕвӕрццӕг фӕлгонцтӕ. Уыцы спектаклы Сурен-Гуыргъохъойы удыхъӕдыл Дзыкъуылайы ракурынмӕ «ерысы» фӕуӕлахиз вӕййы фӕлмӕн, уарзӕгой зӕрдӕйы хицау, миддунейӕ ӕмӕ цыргъзонддзинадӕй ӕххӕст Цола.

Уыцы спектаклӕй уӕлдай ма Сурен зӕрдӕмӕдзӕугӕ комедион сурӕттӕ сарӕзта Хуыгаты Георы «Мӕ усы лӕджы»- Хъӕриу, Шкадуайы «Кукла»-йы — Ардонбей, Туаты Дауыты «Пӕсӕйы фӕндон»-ы — ӕхсарбег.

Нӕ киностудийы аивадон кинонывтӕй цалдӕры — «Буйный Терек», «И оглянулся путник», «Гибель Отрара», «В одной связке», «Дезертир»-ы — ирдӕй разынд Сурены актерон курдиат.

Сурен у, йе сфӕлдыстадон фӕндагыл иу ран чи нӕ лӕууы, ӕдзухдӕр йӕхиуыл чи кусы, ахӕм курдиатджын артист. Йӕ цард сценӕимӕ кӕй сбаста, ууыл никуы фӕфӕсмон кодта. Ӕмӕ дзы нырмӕ цы сурӕттӕ сарӕзта, уымӕй стыр цин хӕссы аивадуарзджытӕн. Йӕ юбилейы фӕдыл ын мах, газет «Рӕстдзинад»-ы редакци, зӕрдиагӕй арфӕ кӕнӕм. Ног сфӕлдыстадон уӕлахизтӕ бафтӕнт дӕ къухы!

Гасанты Валери

ОСТАВЬТЕ ОТВЕТ

Please enter your comment!
Please enter your name here