Ерыстӕй ссардтой Кӕсойты Сократы рухс ном

0
50

Ацы аз ССР Цӕдисы сгуыхт тренер, дунеон къласы спорты мастер самбо ӕмӕ дзюдойӕ Кӕсойты Сократы райгуырдыл сӕххӕст 80 азы. Хъыгагӕн, 21 азы размӕ Сократы цард ӕвирхъауӕй аскъуыд.

Ӕртӕ азы размӕ йӕ кӕддӕры хъомылгӕнинӕгтӕ, йӕ хиуӕттӕ ӕмӕ ӕмбӕлттӕ сарӕзтой йӕ номарынӕн ерыстӕ самбойӕ. Турнир райрӕзти, ӕмӕ йӕм ныр Дзӕуджыхъӕумӕ цӕуын райдыдтой сыхаг республикӕтӕй ӕмӕ Уӕрӕсейы иннӕ рӕттӕй дӕр. 21-22 декабры Кӕсойты Сократы 3-аг номарӕн турнир цыди спортивон комплекс «Динамо»-йы. Архайдтой дзы Цӕгат ӕмӕ Хуссар Ирыстоны, Кӕсӕг-Балхъары, Цӕцӕны, Мӕхъӕлы, Хъалмыхъы республикӕты, Астрахан ӕмӕ Волгограды облӕстты ӕрыгон (2003-2004 азты гуырд) самбисттӕ.

Ерыстӕ аразӕг сты Дзӕуджыхъӕуы бынӕттон администраци ӕмӕ спортивон клуб «Ирыстоны самбо».

Турнир гом кӕнгӕйӕ спортсментӕ ӕмӕ уазджытӕн зӕрдиаг арфӕтӕ ракодтой: Дзӕуджыхъӕуы бынӕттон администрацийы сӕргълӕууӕг Фӕрниаты Тамерлан, Кӕсойты Сократы фырт Станислав ӕмӕ ерысты сӕйраг тӕрхонгӕнӕг ветеранты ӕхсӕн дунейы чемпион Сихъоты Николай.

Самбойӕ ерыстӕ рауадысты тынг зӕрдӕмӕдзӕугӕ. Хорз цӕттӕдзинад равдыстой къорд ӕрыгон самбисты, куыд ирыстойнӕгтӕ, афтӕ нӕ уазджытӕ дӕр. Сихъоты Николай ӕрыгӕттӕ цы арӕхстдзинад равдыстой, уый тыххӕй загъта: «ӕнӕмӕнг азӕй-азмӕ ӕрыгон самбистты цӕттӕдзинад хуыздӕргӕнгӕ цӕуы. Ацы ран мах федтам, ныридӕгӕн хорз сгуыхтдзинӕдтӕ чи равдыста, ахӕм цалдӕр лӕппуйы. Зӕгъӕм, йӕ карӕнты ‘хсӕн Уӕрӕсейы 1-аг бынат чи бацахста, уыцы астрахайнаг самбист Иван Спиваков 50 кг онг уӕзы кӕронбӕттӕны фӕхӕрд Козаты Аланы хъомылгӕнинаг Андиаты Сӕрмӕтӕн тынг хъазуатон тохы. 65 кг онг уӕзы дӕр ерыс кодтой цалдӕр ӕмдых самбисты. Ам Мӕхъӕлы республикӕйы минӕвар, ацы аз Уӕрӕсейы 2-аг бынат бацахсӕг Беслан Кациев ссис турниры уӕлахиздзау. Иу ныхасӕй, нӕ номдзыд спортсмен ӕмӕ тренер Касойты Сократы номарӕн турнир рауад цымыдисаг».

Турниры уӕлахиздзаутӕ систы: 42 кг — Алимбег Шадов (Кӕсӕг-Балхъары республикӕ), 46 кг — Алексей Кожихов (Хъалмыхъы республикӕ), 50 кг — Андиаты Сӕрмӕт (йӕ тренер Козаты Алан), 55 кг — Колыты Тамерлан (йӕ тренер Колыты Игорь), 60 кг — Дзотты Давид (йӕ тренер Колыты Игорь), 65 кг — Беслан Кациев (Мӕхъӕлы республикӕ), 70 кг — Даниил Костюков (Волгограды облӕст), 75 кг — Ногъайты Олег (Хуссар Ирыстон), йӕ тренер Хъоцыты Тамерлан), 87 кг — Джафар Алиев (Хъалмыхъы республикӕ), + 87 кг — Муслим Якубов (Цӕцӕны республикӕ).

Командӕты ‘хсӕн 1-аг бынат бацахстой Цӕгат Ирыстоны самбисттӕ. Нӕ лӕппутӕ фондз хатты бацахстой 1-аг бынӕттӕ, фондз хатты рацыдысты 2-аг бынӕттӕм, аст хатты та уыдысты 3-аг бынӕтты. Командон 2-аг бынат бацахстой Волгограды облӕсты самбисттӕ, 3-аг та ссис Кӕсӕг-Балхъары командӕ.

Уӕлахиздзаутӕ ӕмӕ призон бынӕттӕ бацахсджытӕ хорзӕхджынгонд ӕрцыдысты майдантӕй, кубоктӕй, дипломтӕй ӕмӕ грамотӕтӕй. Фыццаг бынӕттӕ бацахсджытӕн ерыстӕ аразджытӕ саккаг кодтой сӕрмагонд лӕвӕрттӕ.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here