Хъӕздыг уыд уӕлахизтӕй сӕ афӕдз

0
67

Ирыстоны спортсментӕ ацы аз дӕр та сӕ иузӕрдион фарсхӕцджытӕн скодтой бирӕ дзаджджын лӕвӕрттӕ.

Афӕдзы дӕргъы нӕ лӕппутӕ ӕмӕ чызджытӕ цы бирӕ бӕрнон ерысты архайдтой спорты дӕсгай хуызтӕй, уым кӕдфӕнды дӕр уыдысты хуыздӕрты ӕхсӕн. Ирыстонмӕ Уӕрӕсейы, Европӕйы ӕмӕ дунейы алы рӕттӕй здӕхтысты хӕрзиуджыты хъӕздыг хуынтимӕ.

Иннӕ аз — Олимпаг хъӕзтыты аз, ӕмӕ кӕд нырма бӕрӕг нӕма у Уӕрӕсейы Олимпаг командӕйы хъысмӕт, уӕддӕр алы спортсмен дӕр фӕтырны уыцы дунеон спорты ӕппӕты кадджындӕр ерысты йӕ хъару ӕмӕ арӕхстдзинад равдисынмӕ. Цӕмӕй Олимпаг хъӕзтытӕм бахауай, уымӕн та равдисын хъӕуы стыр хъомысдзинад ӕппынкъаддӕр афӕдзы дӕргъы дунеон стырдӕр ӕмӕ бӕрнондӕр ерысты.

Олимпаг хъӕзтыты спорты хуызтӕй Ирыстоны спортсментӕ афӕдзы сӕйрагдӕр ерысты ӕдӕппӕтӕй рамбылдтой 157 сыгъзӕрин майданы, куыд ас спортсменты, афтӕ ӕрыгӕттӕ ӕмӕ фӕсивӕды ӕхсӕн ерысты дӕр.

Ӕппӕты фылдӕр ӕмӕ стырдӕр ӕнтыстдзинӕдтӕ равдыстой нӕ богӕлттӕ уӕгъдибар хъӕбысхӕстӕй. Уӕрӕсейы чемпионаты фыццаг бынӕттӕ бацахстой Байаты Давид, Сидахъаты Зауырбег, Найфонты Артур ӕмӕ Байцаты Владислав. Конд ӕрцыдысты Уӕрӕсейы иугонд командӕмӕ.

Дунеон чемпионаты Байаты Давид ӕмӕ Сидахъаты Зауырбег бацахстой фыццаг бынӕттӕ, Найфонты Артур та рамбылдта 3-аг бынат.

Дунеон кубок рамбулыныл ерысты 1-аг бынат бацахстой Байцаты Владислав, Байаты Давид, Сидахъаты Зауырбег, Уалыты Владислав. Уымӕй уӕлдай ма Уалыты Владислав ссис Европӕйы чемпион, Сидахъаты Зауырбег та фӕуӕлахиз Европӕйы спортивон хъӕзтыты дӕр.

Дунеон чемпион Цӕболты Хетӕг 1-аг бынат бацахста ӕфсӕддонты дунеон хъӕзтыты.

Фӕсивӕды ‘хсӕн Европӕйы чемпионтӕ систы Уалыты Радик (23 азы онг), Цӕкулаты Батырбег (23 азы онг), Багаты Алан (21 азы онг), Соттиты Аслӕнбег (21 азы онг).

21-аздзыд фӕсивӕды ‘хсӕн Уӕрӕсейы 1-аг бынӕттӕ Багаты Алан ӕмӕ Соттиты Аслӕнбегӕй уӕлдай бацахстой Хӕдарцаты Алик, Куыдзойты Алан, Хуыбылты Ален.

Сӕрӕнӕй сӕхи равдыстой нӕ ӕрыгон богӕлттӕ: Тыджыты Сослан, Багаты Арслан, Засеты Арсӕмӕг, Бестауты Андрей, Цхуырбаты Батырбег, Фадзайты Марат, Суанты Хъантемыр. Уыдон уӕлахиздзаутӕ систы Уӕрӕсейы ӕмӕ ӕрыгӕтты ‘хсӕн Европӕйы ерысты.

Грекъаг-ромаг хъӕбысхӕстӕй Европӕйы хъӕзтыты уӕлахиздзау сси Хъӕбӕлоты Зауыр. Фӕсивӕды (23 азы онг) Уӕрӕсейы ерысты 1-аг бынат бацахста Беккуызарты Руслан. Теблойты Давид ӕмӕ Хъарданты Азӕмӕт уӕлахиздзаутӕ систы ӕппӕтдунеон скъоладзауты хъӕзтыты, Тыбылты Георги та 1-аг бынат бацахста Цӕгат Кавказы федералон зылды чемпионаты фӕсивӕды (21 азы онг) ӕхсӕн.

Уӕззау атлетикӕйӕ Уӕрӕсейы чемпион сси Наниты Тимур, Тъуриты Тимӕ та 1-аг бынӕттӕ рамбылдта Уӕрӕсейы чемпионат ӕмӕ кубок рамбулыныл ерысты. Уӕрӕсейы кубок рамбулджытӕ систы Хъайтыхъты Аллӕ ӕмӕ Хуыгаты Хетӕг дӕр. Годжыцаты Дмитри ӕмӕ Гаситы Мария Уӕрӕсейы чемпионтӕ систы фӕсивӕды ‘хсӕн. Гусалты Зӕлинӕ, Челӕхсаты Мария ӕмӕ Соттиты Янӕ та 1-аг бынӕттӕ бацахстой ӕрыгӕтты ‘хсӕн Уӕрӕсе ӕмӕ Европӕйы чемпионатты.

Дзюдойӕ Уӕрӕсейы командӕимӕ Европӕйы чемпион ссис Тасойты Инал. Уымӕй уӕлдай ма Инал Японы фӕуӕлахиз дунеон турнир «Стыр згъӕрхуд»-ы. Уӕрӕсейы командӕимӕ ма Европӕйы чемпион сси Хуыбецты Алан дӕр. Лӕппынӕгты Аслан та     1-аг бынат рамбылдта ӕфсӕддонты дунеон чемпионаты.

Фӕсивӕды (21 азы онг) ‘хсӕн Европӕйы Кубок ӕмӕ чемпионаты 1-аг бынӕттӕ бацахста Елбачиты Георги. Ацы кары ма Европӕйы Кубок рамбулӕг систы Гамосты Давид, Таймазты Мӕдинӕ ӕмӕ Хуыбылты Ирэнӕ. Уымӕй уӕлдай ма Ирэнӕ 1-аг бынат рамбылдта Европӕйы ӕрыгӕтты (21 азы онг) чемпионаты.

Боксӕй Европӕйы фӕсивӕды (22 азы онг) чемпионаты уӕлахиздзау ссис Абайты Алан, Хетъеты Орнеллӕ ӕмӕ Дзукъаты Давид та бацахстой 2-аг бынӕттӕ.

Сылгоймӕгты ‘хсӕн уӕгъдибар хъӕбысхӕстӕй Европӕйы 1-аг бынат бацахсыныл ерысты фесгуыхт Танделаты Аминӕ, Кӕсӕбиты Алинӕ та     1-аг бынат бацахста Уӕрӕсейы чемпионаты.

Ноджыдӕр ма иу Олимпаг программӕмӕ хауӕг спорты хуыз, тхэквондойӕ Уӕрӕсейы, Европӕйы ӕмӕ Дунеон кубокы 1-аг бынат бацахсыныл ерысты фесгуыхтысты Цакъоты Сӕрмӕт, Гуырцъыты Георги, Танделаты Георги, Челӕхсаты Анисия ӕмӕ Черчесты Аминӕ.

Олимпаг хъӕзтыты спорты хуызтӕй ӕппӕты ӕрыгондӕртӕ сты каратэ ӕмӕ грепплинг. Ирыстойнаг спортсментӕй ацы спорты хуызтӕй фесгуыхтысты Хъоцыты Алинӕ, Бозырты Георги ӕмӕ Тедеты Тимур. Алинӕ каратэйӕ      1-аг бынат бацахста Уӕрӕсейы чемпионаты, грепплингӕй та Бозырты Георги дунейы чемпион ссис 41-45-аздзыд спортсменты ‘хсӕн. Дунейы чемпионаты фӕсивӕды (18-19-аздзыд) ‘хсӕн 2-аг бынат бацахста Тедеты Тимур.

Ирыстойнаг спортсментӕн се сгуыхтдзинӕдтӕ гыццыл нӕ уыдысты, йе ‘нӕниздзинад хъыгдард кӕмӕн у, уыцы спортсменты ерысты. Уӕрӕсейы, Европӕйы ӕмӕ дунеон стырдӕр ерысты ирыстойнаг спортсментӕ афтид сыгъзӕрин майдантӕ рамбылдтой 60-йӕ фылдӕр.

Ногӕй та дунеон чемпионаты уӕлахиздзау ссис нӕ таурӕгъон тхэквондист Гӕззаты Спартак. Армспортӕй Уӕрӕсейы, Европӕйы ӕмӕ дунеон чемпионатты фесгуыхтысты Мӕлдзыгаты Алинӕ, Дыгъуызты Малхаз, Биазырты Валери, Хъамболты Артур, Артем Лихачев, Дзугаты Марат, Таматы Георги.

Рог атлетикӕйӕ ирыстойнӕгтӕ Сланты Виктория, Галазты Юлианнӕ, Хынцӕгты Альберт, Мӕргъиты Георги, Хынцӕгты Хетӕг, Кобесты Чермен, Кокайты Алан, Гаглойты Тимур ӕмӕ сӕ иннӕ ӕмбӕлттӕ рамбылдтой 8 сыгъзӕрин, 7 — ӕвзист ӕмӕ 9 — бронзӕ майданы Уӕрӕсейы чемпионаты. Уымӕй уӕлдай ма Хынцӕгты Альберт ӕфсӕн къори ӕппарынӕй сси дунейы чемпион.

Нӕ спортсментӕ ма дунейы чемпионаты рамбылдтой 5 ӕвзист ӕмӕ 4 бронзӕ майданы.

Армспортӕй Уӕрӕсейы чемпион инвалидон спорты ссис нӕ зындгонд  хъайтар Дзӕрӕхохты Батрадз.

Уӕзхъус спортсменты ерысты уӕлдай ӕнтыстджынӕй сӕхи равдыстой нӕ хъӕбысӕйхӕцджытӕ. Дзебысаты Вячеслав, Бадриаты Натан, Хуыгаты Хъазыбег, Гаглойты Азӕмӕт, Артем Платов систы Уӕрӕсейы чемпионтӕ. Уымӕй уӕлдай ма Дзебысаты Вячеслав, Бадриаты Натан ӕмӕ Хуыгаты Хъазыбег фесгуыхтысты Европӕйы чемпионаты дӕр.

Рог атлетикӕйӕ дӕр нӕ ацы къорды спортсментӕ уыдысты ӕнтыстджын. Анастасия Клечкина 1-аг бынӕттӕ бацахста Уӕрӕсейы, Европӕйы ӕмӕ дунеон чемпионатты. Уӕрӕсейы ӕмӕ Европӕйы чемпион ссис Денис Федоренков, Кирилл Филиппов та Уӕрӕсейы чемпионы ном рамбылдта хъилимӕ хӕрдмӕ гӕпп кӕнынӕй.

Гобиты футболистты командӕ «Алани» ссис Уӕрӕсейы чемпион. Нӕ футболисттӕ: ӕлбегаты Георги, Елойты Марат, Гӕздӕнты Сослӕнбег, Гурам Чкареули, Тыбылты Аслан ӕмӕ Никӕ Миракишвили та ма Уӕрӕсейы иугонд командӕимӕ систы дунейы чемпионтӕ, церебралон параличӕй хъыгдард чи баййӕфта, уыцы спортсменты ‘хсӕн.

Олимпаг хъӕзтытӕм чи нӕ хауы, уыцы спорты хуызтӕй дӕр Ирыстоны спортсменты ӕнтыстдзинӕдтӕ сты раппӕлинаг. Афтид сыгъзӕрин хӕрзиуджытӕ нӕ армрестлертӕ, кикбоксертӕ, сумоисттӕ рамбылдтой 50-йӕ фылдӕр. Уымӕй уӕлдай ма нӕ кӕстӕртӕ ӕнтыстджынӕй сӕхи равдыстой рӕттыл хъӕбысхӕстӕй, лӕгӕй-лӕгмӕ тохты хуызты, шахмӕттӕй хъазынӕй.

Ирыстойнаг ӕвзонг спортсментӕ 12-ӕм хатт систы уӕлахиздзаутӕ, Анапӕйы цы ӕппӕтуӕрӕсеон ӕрвылазон хъӕзтытӕ фӕцӕуы лӕгӕй-лӕгмӕ тохты хуызтӕй, уым.

2019 азы нӕ республикӕйы цыди къорд ерыстӕ спорты цалдӕр хуызӕй. Цӕгат Кавказы фыццаг хатт цыдысты Европӕйы 1-аг бынат бацахсыныл ерыстӕ боксӕй фӕсивӕды (22 азы онг) ӕхсӕн. Дзӕуджыхъӕуы уыцы ерысты архайдтой Европӕйы 39 бӕстӕйы 240 боксеры.

Уымӕй ссӕдз боны фӕстӕдӕр 5-6 апрелы Дзӕуджыхъӕуы уӕгъдибар хъӕбысхӕстӕй цыдысты Уӕрӕсейы 1-аг бынат бацахсыныл ерыстӕ фӕсивӕды (21 азы онг) ӕхсӕн. Стӕй та Цӕгат Кавказы федералон зылды 1-аг бынат бацахсыныл ерыстӕ шахмӕттӕй ӕмӕ боксӕй.

Хъӕздыг уыд спортивон ерыстӕй ӕнӕхъӕн аз дӕр Ирыстон. Уӕрӕсейы чемпионат мини-гольфӕй, ХХ ӕппӕтуӕрӕсеон адӕмон хъӕзтыты ӕмӕ спорты хуызты фестивал, ӕппӕтуӕрӕсеон турниртӕ уӕгъдибар хъӕбысхӕстӕй, культурон-спортивон фестивал «Сабыр Кавказ», уӕгъдибар хъӕбысхӕстӕй дунеон турнир «Алантӕ», профессионалон боксы изӕр.

Уыцы спортивон ерыстӕ домдтой ӕмбӕлгӕ уавӕртӕ, ӕмӕ та нӕ республикӕ ацы хатт дӕр сарӕхст нӕ бирӕ уазджыты раз ма фӕкъӕмдзӕстыг уӕвыныл.

Нӕ спортсменты афӕдзы фӕллӕйттыл афӕлгӕсгӕйӕ, зӕгъын хъӕуы уый, ӕмӕ нӕ кадджын спортсментыл кӕй бафтыд ног нӕмттӕ. Уӕрӕсейы спорты сгуыхт мастеры кадджын ном лӕвӕрд ӕрцыд Сидахъаты Зауырбег ӕмӕ Уалыты Владиславӕн. Дунеон къласы спорты мастеры ном райстой Байаты Миланӕ, Дыгъуызты Малхаз ӕмӕ Артем Лихачев (се ‘ппӕт дӕр — армспортӕй).

Спорт ӕмӕ физикон культурӕйы рӕзтӕн ахъаз чи у, ахӕм бирӕвӕрсыг спортивон спорткомплекстӕ ӕмӕ фӕзтӕ фӕзынд нӕ республикӕйы алы рӕтты. Уый у арфӕйаг хъуыддаг, ӕмӕ сӕ саразыныл зӕрдиагӕй чи архайы, уыдонӕн ног азы фылдӕр бантысӕд.

Хуыцауы фӕндӕй Дунеон Олимпаг хъӕзтыты комитетмӕ хорз зонд ӕрцӕуӕд, ӕмӕ, Уӕрӕсейы спортсментӕн цы цӕлхдуртӕ сӕвӕрдтой Олимпаг хъӕзтытӕм фӕндагыл, уыдон ист куыд ӕрцӕуой. Уырны нӕ, уыцы цъаммардзинад ӕрхъуыдыгӕнджыты фӕнд куы нӕ ацӕуа, уӕд иннӕ аз Японы сӕйраг горӕт Токиойы Олимпаг хъӕзтыты уӕлахиздзауты ӕхсӕн кӕй уыдзысты Ирыстоны спортсментӕ дӕр.

БАСКАТЫ Уырызмӕг

ОСТАВЬТЕ ОТВЕТ

Please enter your comment!
Please enter your name here