Олгинскӕйӕгтӕ разыйӕ баззадысты республикӕйы Сӕргълӕууӕгимӕ фембӕлдӕй

0
104

Ног азы фӕлладуадзӕн бонты республикӕйы Сӕргълӕууӕг Битарты Вячеслав Цӕгат Ирыстон-Аланийы Хицауады уӕнгтимӕ, районы разамындимӕ сарӕзта къорд фембӕлды Рахизфарсы районы хъӕуты ӕмӕ горӕт Беслӕны цӕрджытимӕ. Ӕндӕрӕбон ахӕм фембӕлд уыдис Олгинскӕйы хъӕуы цӕрджытимӕ. Фембӕлды райдайӕны Битары-фырт Ног азы арфӕтӕ ракодта, хъӕуы Культурӕйы хӕдзары цы бирӕ адӕм ӕрӕмбырд, уыдонӕн.

Йӕ разныхасы загъта, дарддӕр дӕр Хицауады уӕнгтимӕ кӕй араздзысты фембӕлдтытӕ республикӕйы цӕрджытимӕ, цӕмӕй хуыздӕр зоной адӕмы риссаг фарстытӕ ӕмӕ сӕ куыст аразой цӕрджыты ӕнӕлыггонд фарстытӕ, куыд гӕнӕн ис, афтӕ тагъддӕр ӕмӕ хуыздӕр сӕххӕст кӕнынмӕ. Республикӕйы Сӕргълӕууӕг ракуырдта ӕмбырды архайджытӕй, цӕмӕй уал ӕм радтой, ӕгас хъӕубӕстӕн ахсджиагдӕр цы фарстытӕ сты, уыдон. Хицӕн адӕймӕгтӕн ӕрмӕст сӕхимӕ цы фарстытӕ хауы, уыдон дӕр ӕнӕ дзуаппӕй нӕ баззайдзысты. Ӕмбырды фӕстӕ алкӕмӕ дӕр байхъусдзӕн, сахат хъӕуа, дыууӕ сахаты хъӕуа, алкӕй хицӕн фарстытӕн дӕр цӕттӕ у дзуапп раттынмӕ.

Адӕм тынг рагӕй ӕнхъӕлмӕ кастысты ацы фембӕлдмӕ, ӕмӕ кӕд залы къух бакӕнӕн нӕ уыд, уӕддӕр ӕнӕсыбыртт ӕмӕ ӕхсызгонӕй хъуыстой алы фарстдӕттӕгмӕ дӕр.

Фыццаг ныхасы бар райста хъӕуы хистӕр цӕрджытӕй иу, Цыргъ обауы кувӕг лӕг Токаты Тотрадз. Уый цыбырӕй радзырдта, хъӕуы зӕххытӕ федералон исбонадмӕ кӕй хауынц, ӕмӕ сӕ хицӕн адӕймӕгтӕ кӕй пайда кӕнынц, хъӕуы фӕлварӕн хӕдзарад раджы кӕй фехӕлд, ӕмӕ дзы цы бирӕ цӕрджытӕ фӕллой кодтой, уыдон ӕгуыстӕй кӕй баззадысты.

Ноджы ма Токайы-фырт дӕнцӕгӕн ӕрхаста, хъӕуы бынмӕ цы дыргъдон уыд, уый йе ‘мбӕлттимӕ кӕй ссыгъдӕг кодтой, кӕй дзы фӕлвӕрдтой куысты бынӕттӕ байгом кӕныныл, фӕлӕ сын ӕй ныртӕккӕйы разамонджытӕ кӕй байстой, фӕлварӕн хӕдзарады хуымзӕххытыл нымад нӕ уыдысты, афтӕмӕй. Битарты Вячеслав Тотрадзӕн дзуапп дӕтгӕйӕ, хъӕуы цӕрджытӕн фехъусын кодта, уыцы ахсджиаг фарсты фӕдыл кӕй ныхас кодта федералон оргӕнты разамындимӕ, суанг бӕстӕйы Президент Владимир Путинимӕ дӕр ӕмӕ уыдонӕй кӕй райста разыйы дзуапп. Дарддӕр дӕр архайын хъӕуы зӕххытӕ федералон исбонӕй республикон исбонмӕ райсыныл, цӕмӕй сӕ пайда кӕной ӕмӕ дзы кусой хъӕуы цӕрджытӕ. Уыцы хъуыддаг ӕнцонтӕй нӕ цӕуы, фӕлӕ Вячеслав зӕрдӕ бавӕрдта хъӕуы цӕрджытӕн, уыцы хъуыддагыл ноджы зӕрдиагдӕрӕй кӕй бацархайдзӕн, уымӕй.

Олгинскӕйы кӕддӕры диссаджы Культурӕйы хӕдзар ӕдзӕллаг уавӕрмӕ кӕй ӕрцыд, цы бирӕ алыхуызон къордтӕ дзы кусы, уыдонӕн фадӕттӕ кӕй нӕй, суанг ма дзы зымӕгон хъармгӕнӕнтӕ дӕр кӕй нӕй, алыхуызон музыкалон инструменттӕй цух кӕй сты, уыцы фарстытӕ аиуварс кӕныны тыххӕй ӕххуыс куырдта Культурӕйы хӕдзары директор Алыккаты Ларисӕ.

Республикӕйы Сӕргълӕууӕг зӕрдӕ бавӕрдта 2021 азы Культурӕйы хӕдзар хаст кӕй ӕрцӕудзӕн федералон программӕмӕ ӕмӕ кӕй ӕрцӕудзӕн бындурон цалцӕггонд. Бахӕс кодта ӕмбырды республикӕйы культурӕйы министр Къубалты Эльбрусӕн, цӕмӕй уал бынӕттон бюджеты ссара финансон фӕрӕзтӕ  10 дала фӕндыры балхӕнынӕн ӕмӕ хъӕуы адӕмон театр, иннӕ хихъӕппӕрисадон къордты дарддӕры куыстӕн сӕ уавӕртӕ фӕрогдӕр кӕнынӕн.

Скъолайы директор Тебиаты Батрадз йӕ раныхасы цы бирӕ ахсджиаг фарстытӕ фӕбӕрӕг кодта, уыдонимӕ уыдысты: хъӕуӕн районы центр Беслӕнимӕ ӕвзӕр транспортон бастдзинӕдтӕ кӕй ис, уый аххосӕй ахуыргӕнджытӕ къуылымпытӕ ӕййафынц, физикӕ, англисаг ӕвзаг ӕмӕ физкультурӕйы ахуыргӕнджытӕ сӕм нӕ фаг кӕны ӕмӕ транспорты аххосӕй нӕ цӕуынц кусынмӕ суанг Беслӕнӕй дӕр.

Уыцы фарстыты фӕдыл Битарты Вячеслав ӕмбырды бахӕс кодта республикӕйы промышленност ӕмӕ транспорты министр Хайдарбек Бутов ӕмӕ хъӕуы администрацийы сӕргълӕууӕг Дзлиаты Таймуразӕн, цӕмӕй транспортон бастдзинад районы центримӕ цыбыр рӕстӕгмӕ нывыл саразой. Ахуыргӕнджытӕ кӕй нӕ фаг кӕны, уый тыххӕй та радта ахӕм амынддзинад, цӕмӕй хъӕуы хицау ссара зӕххы хӕйттӕ ӕмӕ дзы саразой хӕдзӕрттӕ, хъӕуы иудадзыг чи кусдзӕн ӕмӕ цӕрдзӕн, ахӕм ахуыргӕнджытӕн. Хӕдзӕрттӕ цыбыр рӕстӕгмӕ саразыны хӕс та йӕхимӕ райста республикӕйы хъӕууон хӕдзарады ӕмӕ хойраджы министр Уазиты Хъазыбег.

Олгинскӕйы цӕрджытӕ республикӕйы Сӕргълӕууӕджы размӕ цы ӕнӕлыггонд фарстытӕ рахастой, уыдонӕй иу уыд сывӕллӕтты цӕхӕрадоны ӕдзӕллаг уавӕр дӕр. Битарты Вячеслав хъӕуӕн зӕрдӕ бавӕрдта, 120 сывӕллоны бынаты кӕм уа, ахӕм ног рӕвдауӕндон фидӕн аз хъӕуы арӕзт кӕй ӕрцӕудзӕн, уымӕй дӕр.

Ӕмбырды архайджытӕ хъаст кодтой, доны хӕтӕлтӕ кӕй ивынц, уый тыххӕй хъӕуы уынгтӕ ноджы тынгдӕр кӕй фехӕлдысты, сӕйраг уынджы тротуартӕ кӕй нӕй ӕмӕ сывӕллӕттӕ скъоламӕ цӕугӕйӕ, фӕндаджы астӕуты кӕй цӕуынц, уынгты ӕхсӕвыгӕтты цырӕгътӕ кӕй нӕ судзынц, уыдӕттӕй.

Ацы фарстытӕ дӕр фӕстӕдӕрмӕ нӕ аргъӕвта Битарты Вячеслав.

РЦИ-Аланийы фӕндӕгты хӕдзарады комитеты сӕрдар Солиты Тариэлӕн районы бынӕттон хиуынаффӕйады администрацийы сӕргълӕууӕг Беркъаты Константин ӕмӕ хъӕуыхицау Дзлиаты Таймуразӕн бабар кодта, цӕмӕй ӕппӕт уыцы фарстытӕ дӕр иуварсгонд ӕрцӕуой.

Хъӕуы цӕрджытӕ стыр разыйӕ баззадысты Битарты Вячеславы зӕрдӕвӕрӕн ныхӕстӕй. Ныфс сӕ бацыд, сӕ царды уавӕртӕ кӕй фӕхуыздӕр уыдзысты, уымӕй. Ӕмбырды кӕронбӕттӕны, хъӕуы хорздзинӕдтыл зӕрдиагдӕрӕй архайджытӕй иу — Ахъиты Албег хъӕубӕсты номӕй зӕрдӕбын арфӕтӕ ракодта РЦИ-Аланийы Сӕргълӕууӕг Битарты Вячеславӕн ӕмӕ, республикӕйы Хицауадӕй ӕмӕ районы разамындӕй йемӕ цы уазджытӕ уыд, уыдонӕн дӕр.

Ӕмбырды фӕстӕ ма Битарты Вячеслав дыууӕ сахаты бӕрц ныффӕстиат, хицӕн адӕймӕгтӕй хи фарстытӕ кӕмӕ уыд, уыдонимӕ. Алкӕмӕн дӕр дзы радта бӕстон ӕмӕ бӕлвырд дзуаппытӕ.

Касаты Батрадз

ОСТАВЬТЕ ОТВЕТ

Please enter your comment!
Please enter your name here