Гӕналдоны ком

0
9

Уӕрӕсейы зӕххыл Сӕнайы хохы сӕрмӕ схизынӕн уӕлдай бӕзгӕдӕр маршрут цӕуы Гӕналдоны комыл. Фыццагдӕр 1889 азы ауылты уырыссаг ӕфсӕддон топограф Андрей Пастухов фӕцыд ацы хӕххон бӕрзӕндмӕ, бынӕттон цӕрӕг Царахаты Тепсарыхъо та йын уыдис фӕндагамонӕг. Уыдон цыппар метры дӕргъӕн сырх тырыса ӕрсагътой Сӕнайы хохы цъуппыл, ӕмӕ йӕ фенӕн уыдис Дзӕуджыхъӕуӕй дӕр.

Ацы маршрутыл цӕугӕйӕ, бӕлвырддӕр та, Майлийы ӕмӕ Хъолайы цъититы дӕллаг кӕрон сты Хъӕрмӕдоны тӕвд суӕртты гуырӕнтӕ. Бынӕттон цӕрджытӕ ӕмӕ фӕндаггӕттӕн уыдон зындгонд сты XIX ӕнусӕй фӕстӕмӕ, ӕмӕ дзы сӕхи дзӕбӕх кодтой алыхуызон низтӕй, уӕлдайдӕр ӕндыснӕгӕй. Гӕналдоны комы астӕуккаг хайы та дӕллаг тӕвд суӕрттӕ ӕнхъӕвзынц. Уӕ зӕрдыл уын куы ӕрлӕууын кӕнӕм, уӕд 1951 азы ам байгом дзӕбӕхгӕнӕн бынат, фӕстӕдӕр та дзы ӕппӕтцӕдисон санатори «Хъӕрмӕдон» арӕзт ӕрцыд уӕды рӕстӕджы зындгонд дохтыр Дзгойты Уырызмӕджы хъӕппӕрисӕй.

Хъыгагӕн, ацы ком зындгонд у, адӕмы зӕрдӕхӕлд чи фӕкӕны, ахӕм мӕлӕтхӕссӕг зӕйтӕй дӕр. Фӕстаг фыдбылыз, куыд зонут, афтӕмӕй ӕрцыд 2002 азы 20 сентябры, ӕмӕ ныр дӕр ма Хъолайы ӕнусон ихтӕ ӕххӕстӕй нӕма стадысты Гӕналдоны комы иуӕй-иу рӕтты.

Уымӕй уӕлдай нӕ фыдӕлтӕй бирӕ таурӕгътӕ баззад Сӕнайы хохы равзӕрды тыххӕй. Иуы дзырдӕуы ӕрдхӕрдтӕ — хъӕбатыртӕ Сӕна ӕмӕ Эльбрусы карз тохы фӕдыл. Уыдон фӕбыцӕу сты, Сӕнайы фырт Бештау Эльбрусы чызг Малкӕйы кӕй аскъӕфта, уый тыххӕй. Чызджы мӕстджын фыд фондз дихы фӕкодта Бештауы. Сӕна ӕмӕ Эльбрус лӕгӕй-лӕгмӕ куы фембӕлдысты карз тохы, уӕд та уыцы-иу рӕстӕг цирхъыты цӕфтӕй се ‘фсӕн худтӕ лыстӕг муртӕ баисты. Уӕдӕй нырмӕ Сӕна ӕмӕ Эльбрусы дыууӕсӕрон бӕрзӕндтӕ ӕмӕ фондзсӕрон Бештау ӕдзӕмӕй лӕууынц Кавказы урс хӕхты, рӕсугъд Малкӕ та ӕнусты дӕргъы йӕ цӕссыгтӕ калы йе ‘намонд уарзондзинады тыххӕй.

Дзугаты Аслӕнбег,

географийы ахуыргӕнӕг

ОСТАВЬТЕ ОТВЕТ

Please enter your comment!
Please enter your name here