Хӕст цыдис нӕ къӕсӕрыл

0
24

Фыдыбӕстӕйы Стыр хӕсты тыххӕй бирӕ чингуытӕ фыст ӕрцыд. Сӕ автортӕ уыдысты историктӕ, хӕсты архайджытӕ, мемуартӕ чи фыста, уыдон. Фӕлӕ абон дӕр, 75 азы фӕстӕ, уыцы ӕвирхъау хӕсты хабӕрттӕ фыст нӕма фесты, стӕй рӕхджы нӕ фӕуыдзысты.

Ӕрӕджы республикӕйы Ветеранты хӕдзары уыдис Национ музейы хайады сӕргълӕууӕг Гадзиаты Фузӕйы чиныг «Война у порога»-йы презентаци. Амыдта йӕ Ветеранты советы сӕрдар Къаболаты Солтан. Уый, куыд ӕфсӕддон адӕймаг, афтӕ йӕ зӕрдӕмӕ ӕввахс айста чиныджы фыст хабӕрттӕ. Фузӕйы ног чиныджы тыххӕй ма сӕ хъуыдытӕ загътой советы сӕрдары хӕдивджытӕ Бедойты Руслан, Сабеты Виктор, ахуыргонд Сергей Плахтий ӕмӕ иннӕтӕ.

Ӕхсызгон хабар уыд, презентацимӕ хуынд кӕй ӕрцыдысты «хӕсты сывӕллӕттӕ», 21-ӕм ӕмӕ 13-ӕм скъолаты ахуырдзаутӕ, уыдон тынг зӕрдиагӕй хъуыстой нӕ Ирыстоны кадджын хистӕрты раныхӕстӕм, радзырдтой ӕмдзӕвгӕтӕ. Фӕстагмӕ ныхасы бар радтой чиныджы авторӕн, кӕцы йӕ хӕсыл банымадта нӕ абоны ӕмӕ райсомы фӕлтӕртӕн бӕлвырдӕй радзурын, 1942 азы Ирыстоны зӕххыл цы тугкалӕн хӕстытӕ цыдис, уыдоны тыххӕй, куыд сыстадысты алы адӕмыхӕттытӕ иу тымбылкъухау знаджы ныхмӕ, куыд ӕххуыс кодтой фронтӕн сылгоймӕгтӕ ӕмӕ сывӕллӕттӕ. Иуварс нӕ лӕууыдысты, хӕстӕй сахъатӕй чи сыздӕхт, уыцы нӕлгоймӕгтӕ дӕр. Мӕхи фыд дӕр, хӕстон адӕймаг, бирӕ диссӕгты фӕстӕ сыздӕхт йӕ райгуырӕн хъӕу Хъахъхъӕдурмӕ, кӕд ын иу къах нӕ уыдис, уӕддӕр тынг фыдӕбонджын адӕймаг уыд. Схаста 6 сывӕллоны, радта нын уӕлдӕр ахуырад. Ӕз дзы мӕ сӕр бӕрзонд хастон ӕмӕ хӕссын абон дӕр.

Фузӕ йӕхӕдӕг куыд радзырдта, афтӕмӕй тынг бузныг у нӕ республикӕйы Сӕргълӕууӕг Битарты Вячеславӕй, Къаболаты Солтанӕй, Бедойты Русланӕй, Сабеты Викторӕй ӕмӕ иннӕтӕй, чиныг рауадзынмӕ йын чи баххуыс кодта, уыдонӕй. Тынг зӕрдиаг куыст бакодта архивы ӕрмӕджытӕй, уӕды рӕстӕджы ист къамтӕй. Иу ныхасӕй, чиныг у ӕнцонкӕсӕн ӕмӕ ӕмбарӕн, уымӕн ӕмӕ хицӕн сӕргӕндтӕй арӕзт у, стӕй дзы алы адӕймаджы тыххӕй дӕр цыбырӕй бӕлвырд фыст ис. Иннӕмӕй та у тынг зын кӕсӕн, уымӕн ӕмӕ йӕ ӕнӕ цӕссыг ӕрӕппаргӕйӕ кӕсӕн нӕй. Рухсаг уӕнт, уыцы тугуарӕн хӕсты чи архайдта ӕмӕ чи нал ис, уыдон. Сӕ ӕрыгон цард рауӕлдай кодтой, цӕмӕй, сӕ фӕстӕ чи баззад, уыдон сӕрибарӕй цӕрой сӕ Райгуырӕн бӕстӕйы.

Джерапты-Белеккаты Иринӕ,

ӕхсӕнадон уацхӕссӕг

ОСТАВЬТЕ ОТВЕТ

Please enter your comment!
Please enter your name here