Рӕстӕгимӕ — ӕмдзу…

0
12

Ӕрмӕстдӕр 18 ӕнусы райдайӕны, уырыссаг паддзах Петр I уынаффӕйӕ, дунейы рухс федта газет «Ведомости». Уый уыдис 1703 азы 13 январы, уӕдмӕ уырыссаг ӕвзагыл газеттӕ ӕмӕ журналтӕ нӕ уыд. Ацы историон хъуыддагимӕ баст у Мыхуыры бон.

Рӕстӕгимӕ Уӕрӕсейы фылдӕр кӕнын райдыдтой мыхуыры фӕрӕзтӕ, 19 ӕнусы уыдысты сӕдӕгӕйттӕ. Газеттӕй уӕлдай уагътой наукон-публицистон, литературон альманахтӕ, ӕхсӕнадон-политикон, экономикон ӕмӕ техникон журналтӕ.

Адӕмы царды газеттӕ ӕмӕ журналтӕ бацахстой ахсджиаг бынат, 1913 азмӕ Уӕрӕсейы уыдис 400 ӕрвылбон цӕуӕг мыхуырон фӕрӕзы. Сӕ тиражтӕ дӕр уыдысты хуызӕнӕн, суанг ма дӕс ӕппӕтуӕрӕсеон газеты цыдысты бон дыууӕ хатты. Уый ӕвдисы уӕды Уӕрӕсейы размӕцыд, ӕхсӕнады хъуыдыкӕнынад. Советон Цӕдисы мыхуыры фӕрӕзты профессионалон бӕрӕгбон фыццаг хатт фидаргонд ӕрцыд 5 майы. Уый баст уыдис, газет «Правда» 1912 азы мыхуыры кӕй рацыд, уыимӕ. «Правда» уыдис Советон Цӕдисы сӕйрагдӕр газет.

Уӕрӕсейы Мыхуыры бон бӕрӕг кӕнынц 1991 азы 13 январӕй фӕстӕмӕ. Нырыккон журналистикӕ у бирӕвӕрсыг ӕмӕ мидисджын, уыцы къабазы кусы милуангай адӕймӕгтӕ. 2011 азы райдайӕны нӕ бӕстӕйы уыдис 40 мин мыхуырон фӕрӕзы. Кӕд ӕмӕ Интернеты, информацион технологиты гӕнӕнтӕ размӕ цӕуынц, хъомысджындӕр кӕнынц, уӕддӕр газеттӕ ӕмӕ журналты ахадындзинад къаддӕр нӕ кӕны. Бӕрӕггӕнӕнтӕм гӕсгӕ, алы бон дӕр уӕрӕсейӕгтӕ посты бастдзинады фӕрцы райсынц 20 милуан экземпляры газеттӕ, журналтӕ, альманахтӕ ӕмӕ ӕндӕр фӕрӕзтӕ.

Кӕд искӕмӕ афтӕ кӕсы, ӕмӕ мыхуыргонд ныхасы ахадындзинад фӕкъаддӕр, агуырд нал цӕуы, уӕд уый рӕдийы. Паддзахадон реестры бӕрӕггӕнӕнтӕм гӕсгӕ, 2014 азы райдайӕны регистрацигонд ӕрцыд 88 мин алыхуызон мыхуырон фӕрӕзы. Цӕгат Ирыстоны цӕрджытӕ дӕр ӕмхиц сты газеттӕ ӕмӕ журналтӕ кӕсынмӕ. Ныр 97 азмӕ ‘ввахс ирон аив дзырдӕн зӕрдиагӕй лӕггад кӕны газет «Рӕстдзинад». Алы рӕстӕг дӕр редакцийы куыстой курдиатджын уацхӕсджытӕ, уыдонӕн ирон ӕвзаг уыдис мады ӕхсырау адджын, никуы йыл сӕхи атигъ кодтой. «Рӕстдзинад» цы хорз традицитӕ ӕмӕ фӕткыл хӕст у, уыдӕттӕ сфидар сты ӕцӕг дӕсны журналистты удуӕлдай фӕллойы фӕрцы. Абон дӕр уыцы рӕсугъд фӕтк ӕмӕ ӕгъдауӕй редакцийы кусджытӕ иуварс нӕ хизынц, ирон ӕвзагӕн рӕстӕгӕй-рӕстӕгмӕ нӕ, фӕлӕ алы бон дӕр кад кӕнынц, йӕ ахадындзинад ын цудын нӕ уадзынц.

Ӕнӕмӕнг, Уӕрӕсейы Мыхуыры бон хъуысдзысты зӕрдӕбын арфӕтӕ ацы къабазы кусджытӕн, уыдон хауынц «Рӕстдзинад»-ы коллективмӕ дӕр.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here