Арфӕтӕ — прокуратурӕйы кусджытӕн

0
20

12 январы уыд Уӕрӕсейы Федерацийы прокуратурӕйы кусджыты профессион бӕрӕгбон. Уый кадӕн ӕмбырд уыд Цӕгат Ирыстоны прокуратурӕйы. Ӕмбырды архайдтой республикӕйы разамынд, тыхы ӕмӕ барадхъахъхъӕнӕг оргӕнты бӕрнон кусджытӕ, прокуратурӕйы ветерантӕ.

Прокуратурӕйы кусджытӕн сӕ бӕрӕгбоны фӕдыл зӕрдиаг арфӕ ракодта РЦИ-Аланийы Сӕргълӕууӕг Битарты Вячеслав. Республикӕйы разамонӕджы ныхасмӕ гӕсгӕ, закъонӕвӕрынадон ӕмӕ барадон фӕтк хъахъхъӕныны хъуыддаджы уӕлдай бӕрнон хӕстӕ ис прокуратурӕйы кусджыты размӕ.

«Ахӕм ахсджиаг ӕмӕ зын куыст сымахӕй домы бӕрзонд профессион дӕсныйад ӕмӕ удуӕлдай архайд. Адӕймаджы бартӕ хъахъхъӕнын у бӕрнон хъуыддаг. Республикӕйы закъонӕвӕрынадон бындуртӕ ӕмӕ барадон фӕтк хъахъхъӕныны хъуыддаг комкоммӕ сымахӕй аразгӕ у», — фӕнысан кодта Битары-фырт.

Цӕгат Ирыстоны Сӕргълӕууӕг куыд бафиппайдта, афтӕмӕй йӕ зӕрдӕ дары, республикӕйы прокурорӕй Александр Морозов нысангонд кӕй ӕрцыд, уыцы ӕууӕл адӕймаджы бартӕ хъахъхъӕныны, барадон фӕтк нывылдӕр кӕныны, стӕй фыдракӕндтимӕ тохы куыст зынгӕ кӕй фӕахадгӕдӕр кӕндзӕн, ууыл.

Ӕмбырды доклад скодта республикӕйы прокурор Александр Морозов. Уый республикӕйы разамындӕн бузныг загъта, ведомствӕйы архайдмӕ иудадзыг лӕмбынӕг цӕстдард кӕй ис, уый тыххӕй. Александр Морозов зӕрдӕ бавӕрдта, прокуратурӕйы кусджытӕ ӕппӕт республикон ведомствӕтимӕ дӕр ӕнгом ӕмархайд кӕй кӕндзысты, уымӕй.

Уый фӕстӕ бӕрӕггонд ӕрцыдысты республикӕйы прокуратурӕйы дӕсныдӕр ӕмӕ ӕнтыстджындӕр кусджытӕ — уыдонӕн саккаг кодтой паддзахадон ӕмӕ ведомствӕйон хӕрзиуджытӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here