Фӕлмӕнзӕрдӕ ӕмӕ цӕстуарзон

0
46

Адӕймаджы зӕрдӕ фӕлмӕн ӕмӕ рӕсугъд куы уа, уӕд, хурау, йе сныхасӕй, йӕ мидбылхудтӕй фӕрӕвдауы, йӕ алыварс чи ис, уыдоны дӕр. Уыцы ӕппӕт хӕрзтӕм ма цӕстуарзондзинад, дардмӕ уынаг зонд куы бафты, уӕд ма уымӕй хуыздӕр цы уа.

Ахӕм адӕймаг ӕмӕ ӕмкусӕг у газет «Рӕстдзинад»-ы корректор, РЦИ-Аланийы культурӕйы сгуыхт кусӕг Дзоцъиты Тамарӕ. Немӕ кусы 30 азӕй фылдӕр. Ӕмӕ уыцы рӕстӕгмӕ йӕ уды хъармӕй чи нӕ фӕхайджын, ахӕм адӕймаг зын ссарӕн у. Хистӕрӕй-кӕстӕрӕй нӕ алчидӕр Тамарӕйӕ иу зул цӕстӕнгас дӕр нӕ зоны. Царды йыл цы хӕс ис, куыд ныййарӕг, ӕмкусӕг, уыдон хӕссы кад ӕмӕ радимӕ. Ӕппынӕдзухдӕр вӕййы хъӕлдзӕг ӕмӕ цардбӕллон.

Тамарӕ райгуырд Алагиры. Схъомыл кадджын ӕмӕ нымад бинонты ӕхсӕн. Йӕ фыд Иван уыд Уӕлладжыры комы дзырддзӕугӕ хистӕртӕй иу. Бирӕ азты фӕзминагӕй фӕкуыста Алагиры районы партион бӕрнон бынӕтты. Адӕмы миддуне зонынмӕ йӕм уыд Хуыцауӕй лӕвӕрд хъомыс. Уыцы зын рӕстӕджыты йе ‘мхъӕуккӕгтӕн, зонгӕтӕн ӕмӕ хӕлӕрттӕн ӕххуыс кӕнынӕй дарддӕр, сӕ тӕригъӕды никуы ницӕмӕй бацыд.

Тамарӕ астӕуккаг скъола ӕнтыстджынӕй каст куы фӕци, уӕд йӕ йӕ царды фӕндӕгтӕ ахуыдтой ЦИПУ-йы фӕсарӕйнаг ӕвзӕгты факультетмӕ. Ам райдыдта ахуыр кӕнын немыцаг ӕвзаджы хайады. Абон дӕр ма хорзӕй ӕрхъуыды кӕны, ам ын йӕ зонындзинӕдтӕ рӕдауӕй чи лӕвӕрдта, уыцы ахуыргӕнджытӕ ӕмӕ ахуыргӕндты. Фӕстӕдӕр, йӕ царды уавӕртӕм гӕсгӕ, йӕ ахуыр адарддӕр кӕнын бахъуыд Пятигорскы фӕсарӕйнаг ӕвзӕгты факультеты. Ам дӕр Тамарӕ йе ‘мбӕлттӕн фӕзминаг уыд йӕ ахуырӕй ӕмӕ ӕгъдауӕй. Уыцы азты ӕмӕ ныр дӕр ахӕм кады аккаг кӕй сси, уый йын йӕхиуыл фервӕссыны ӕфсон нӕ радта, фӕлӕ ма йӕ сразӕнгард кодта ноджы хуыздӕр ӕмӕ арфдӕр зонындзинӕдтӕ райсынӕн. Афтӕмӕй институт ӕнтыстджынӕй каст куы фӕци, уӕд куыста Бирӕгъзӕнджы астӕуккаг скъолайы немыцаг ӕвзаджы ахуыргӕнӕгӕй. Тамарӕ йӕ рӕсугъд, фӕлмӕн зӕрдӕйы фӕрцы, арф ӕмӕ бирӕвӕрсыг зонындзинӕдты руаджы немыцаг ӕвзаг ӕмӕ, ӕмткӕй, ахуыргӕнӕджы дӕсныйад бирӕ фӕсивӕдӕн бауарзын кодта.

Бирӕгъзӕнджы скъолайы къорд азы бакусыны фӕстӕ ма кад ӕмӕ радимӕ йӕ рухстауӕн хӕс ӕххӕст кодта Алагиры 4-ӕм астӕуккаг скъолайы. Ам дӕр бирӕ фӕсивӕды сӕвӕрдта раст фӕндагыл, йӕ зонд ӕмӕ узӕлаг фӕлмӕн зӕрдӕйы фӕрцы сын байгом кодта фӕндаг рӕсугъд ӕмӕ йӕхийау, бафӕзминаг цард кӕнынмӕ.

Царды денджыз алыхуызон у. Кӕм сабыр вӕййы, кӕм та — абухгӕ. Фӕлӕ дзы дӕхи куы сфӕлтӕрай, дӕ ном ӕмӕ дӕ кадыл фарн куы ӕфтауай, уӕд дӕм цард кӕддӕриддӕр йӕ мидбылты худдзӕн. Тамарӕ 1985 азы кусынмӕ ӕрбацыд газет «Рӕстдзинад»-мӕ корректорӕй. Редакцийы, кӕнӕ ӕхсӕнадон уацхӕссӕг ӕрмӕг куы ныффыссы, уӕд, цӕмӕй хӕрзарӕстӕй газеткӕсджытӕм фӕхӕццӕ уа, рӕдыд дзы ма аирвӕза, редакцийы ӕмӕ газеты фӕлгонцыл цӕмӕй аууон ма хауа, уый у корректорӕй аразгӕ. Уый хорз хаты Тамарӕ ӕмӕ йӕ куыст кӕддӕриддӕр ӕххӕст кӕны бӕрнонӕй ӕмӕ фӕзминагӕй. Газеты сӕйраг редакторӕй райдай ӕмӕ фӕу техникон кусджытӕй, Тамарӕ сӕ никуы никӕй зӕрдӕхудты бацыд. Се ‘ппӕтимӕ дӕр фӕдзуры мидбылхудгӕ. Кӕстӕртӕн ӕмӕ астӕуккаг кары кусджытӕй ӕмӕ уацхӕсджытӕй разӕнгардгӕнӕн ныхас кӕмӕн нӕ загъта, ахӕм адӕймаг нӕ разындзӕн.

Тамарӕ ссӕдз азӕй фылдӕр уыд редакцийы профцӕдисон комитеты сӕрдар. Ам дӕр йӕ хӕстӕ ӕххӕст кодта бӕрнонӕй ӕмӕ фӕзминагӕй. Фӕкӕсинаг кусджытӕн-иу ӕвӕстиатӕй баххуыс кодта куы ӕхцайӕ, куы та царды ӕндӕр фӕрӕзтӕй. Уыдонӕй абон бирӕтӕ бузныг сты Тамарӕйӕ. Уӕдӕ йӕ къухы бӕркадӕй, куыд профцӕдисон раздзог, афтӕ чи нӕ фӕхайджын Тамарӕйы бӕркадджын фынгтӕй. Ныр дӕр ма сӕ уыцы рӕстӕджытӕ редакцийы кусджытӕ арӕх ӕрхъуыды кӕнынц.

РЦИ-Аланийы культурӕйы сгуыхт кусӕг, нӕ редакцийы уарзон хистӕр, ӕмӕ дӕсны кусӕг Дзоцъиты Тамарӕйӕн ацы бонты у йӕ бӕрӕгбон. Нӕ зӕрдӕ йын зӕгъы фидар ӕнӕниздзинад, йӕ цоты хорздзинӕдтӕй йӕ зӕрдӕ рухс куыд уа, йӕ фӕлмӕн зӕрдӕйы рухсӕй, фӕлмӕн мидбылхудтӕй ма нӕ бирӕ азты куыд буц кӕна, уыцы хорзӕх ын нӕ цӕст уарзы!

Гасанты Валери

ОСТАВЬТЕ ОТВЕТ

Please enter your comment!
Please enter your name here