Хӕрзиуджытӕ — Якутийӕ

0
311

Республикӕ Саха-Якути ӕмӕ Ирыстоны ‘хсӕн фидар бастдзинӕдтӕ кӕй ис, уымӕн та ног ӕвдисӕн ссис дыууӕ республикӕйы Конституцион тӕрхондӕтты сӕрдарты фембӕлд.

Саха-Якутийы Конституцион тӕрхондоны сӕрдар Александр Ким-Кимэн знон уыд РЦИ-Аланийы Конституцион тӕрхондоны сӕрдар Къесаты Станиславы уазӕг. Сӕ фембӕлды ныхас цыди, дыууӕ республикӕйы ‘хсӕн цы бастдзинӕдтӕ ис, уыдон дарддӕр дӕр фидар кӕныны фарстытыл.

Александр Ким-Кимэн ӕмӕ Къесаты Станиславы фембӕлды ӕвдисӕнтӕ уыдысты, РЦИ-Аланийы Конституцион тӕрхондоны кусджытӕ ӕмӕ Республикӕ Саха-Якутийы бирӕ азты зӕрдиаг куыст чи фӕкодта, уыцы ирыстойнӕгтӕ цалдӕрӕй. Уыдонӕй иу у Республикӕ Саха-Якутийы сгуыхт дохтыр Хъуппеты Чермен.

Александр Ким-Кимэн Хъуппеты Черменыл сӕмбӕлын кодта Республикӕ Саха-Якутийы паддзахадон хӕрзиуӕг «Граждайнаг сгуыхтдзинад». Хӕрзиуӕг Чермены риуыл бакӕнгӕйӕ, Александр Николайы фырт загъта: «Саха-Якутийы ирон адӕмӕй чи царди ӕмӕ куыста, уыдон кӕдфӕнды дӕр уыдысты фӕзминаг, куыд сӕ куыстӕй, афтӕ сӕ адӕймагдзинадӕй, сӕ ӕгъдауӕй. Ацы ран сты, ӕз мӕхӕдӕг бирӕ хӕрзтӕ кӕмӕй зонын, уыдонӕй дыууӕ: Цӕмӕхъуаты Алыксандр ӕмӕ Хъуппеты Чермен. Цӕмӕхъуаты Алыксандр уыди нӕ республикӕйы фӕскомцӕдисы комитеты бӕрнон кусӕг, ӕмӕ дзы ӕз зонын ӕфсымӕры ӕххуыс мӕ куысты. Чермены тыххӕй куы дзурӕм, уӕд уый фондз ӕмӕ ссӕдз азы дысвӕлдӕхтӕй фӕкуыста нӕ республикӕйы ӕнӕниздзинад хъахъхъӕнынады. Мах Чермены хонӕм Якутийы патриот, уымӕн ӕмӕ йӕ ӕнувыд архайдӕй адӕмы зӕрдӕты ныууагъта арф фӕд. Фӕстаг азты Чермен ӕнтыстджынӕй разамынд дӕтты Саха-Якутийы номӕй, Геленджикы цы санатори «ӕрвгъуыз уылӕг» ис, уымӕн. Йӕ стыр лӕггӕдтӕ ӕмӕ ӕнтыстджын фыдӕбоны тыххӕй Хъуппеты Чермен Республикӕ Саха-Якутийы Сӕргълӕууӕджы номӕй хорзӕхджын ссис паддзахадон хӕрзиуӕг «Граждайнаг сгуыхтдзинад»-ӕй. Ӕз ацы хӕрзиуӕг уӕлдай ӕхсызгондӕрӕй ӕмбӕлын кӕнын Черменыл ам, Ирыстоны. Уырны мӕ нӕ дыууӕ республикӕйы ‘хсӕн ма нӕм ахӕм арфӕйаг фембӕлдтытӕ бирӕ хӕттыты кӕй уыдзӕн, уый».

Хъуппеты Чермен зӕрдиаг арфӕ ракодта Александр Ким-Кимэнӕн ӕмӕ Къесаты Станиславӕн, ахӕм кадджын уавӕры йыл кӕй сӕмбӕлын кодтой хӕрзиуӕг, уый тыххӕй.

Къесаты Станислав йе ‘мкусджыты номӕй зӕрдылдарӕн лӕвӕрттӕй схорзӕхджын кодта Александр Ким-Кимэн ӕмӕ йӕ бинойнаг Любовь Ибрагимы чызджы. Уый загъта: «Къорд азы размӕ нӕ дыууӕ республикӕйы Конституцион тӕрхондӕтты ‘хсӕн цы бастдзинӕдтӕ снысан кодтам, уыдон мах дарддӕр дӕр фидар кӕндзыстӕм ӕнӕгуырысхойӕ. Нӕхӕдӕг ӕй уынӕм, кӕд кӕрӕдзимӕ дӕрддзӕф цӕрӕм, уӕддӕр нӕм ис бирӕ иумӕйаг фарстытӕ, ӕмӕ уыдон та ӕмдыхӕй лыг кӕнын кӕдфӕнды дӕр ӕнцондӕр у».

Баскаты Уырызмӕг

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here