Ӕхсызгон фембӕлд

0
116

Зындгонд куыд у, афтӕмӕй Ног азы бӕрӕгбоны агъоммӕ ӕппӕт Уӕрӕсейы арӕзт ӕрцыд хӕрзаудӕн акци «Фӕндӕтты назбӕлас». Уыцы акци, фыццаджыдӕр, цы регионты ацыд, уыдонӕй иу — Цӕгат Ирыстон. Республикӕйы Хицауады хӕдзары Ног азмӕ цы назбӕлас арӕзт ӕрцыд, уым ауыгъд уыд 40 тымбыл хъазӕны, ӕмӕ дзы алкӕуыл дӕр фыст уыд сывӕллӕтты Ног азы фӕндӕттӕ. Уыдонӕй иу уыд 17-аздзыд Хъуппеты Викторияйы фӕндон.

Чызджы фӕндыд фӕмбӕлын ӕмӕ аныхас кӕнын республикӕйы Сӕргълӕууӕг Битарты Вячеславимӕ, ӕмӕ ацы бонты Викторияйы фӕндон сӕххӕст — чызджы йӕ мадимӕ ӕрбахуыдтой, афтӕ тынг цы фембӕлдмӕ ӕнхъӕлмӕ каст, уырдӕм. Республикӕйы Сӕргълӕууӕгӕй уӕлдай уыцы фембӕлды архайдтой Хицауады Сӕрдары хӕдивӕг Иринӕ Азимова ӕмӕ «Мечтай со мной», зӕгъгӕ, ацы федералон хӕрзаудӕн проекты регионалон разамонӕг Байцаты Нинӕ.

Битарты Вячеславимӕ ныхас кӕнгӕйӕ, Виктория радзырдта йӕ уӕззау хъысмӕты тыххӕй. 2014 азы чызджы скъуырдта машинӕ. Дзӕбӕх кӕнынмӕ йӕ уӕд арвыстой Мӕскуымӕ, уым ын скодтой 19 операцийы. Абон 17-аздзыд чызджы фӕнды сахуыр кӕнын ӕмӕ царды ссарын аккаг бынат. Виктория ныртӕккӕ иттӕг хорз ахуыр кӕны Беслӕны сӕрмагонд центры 11-ӕм къласы, йӕ ахуыры бӕрӕггӕнӕнтӕм гӕсгӕ хъуамӕ райса сыгъзӕрин майдан.

— Мӕ сӕйрагдӕр бӕллиц у тӕрхонгӕнӕг суӕвын ӕмӕ, царды цыдӕриддӕр ӕнӕраст ис, уый ныхмӕ кусын. Мӕ бӕллиц цӕмӕй сӕххӕст уа, ууыл тынг архайдзынӕн, — зӕгъы Виктория.

Битарты Вячеслав бабар кодта, чызгӕн йӕ бӕллиц цӕмӕй сӕххӕст уа, уымӕй йын ӕппӕтвӕрсыг ӕххуыс бакӕнын.

Уӕрӕсейаг акци «Фӕндӕтты назбӕлас»-ы Битарты Вячеслав ныр архайы дыккаг хатт. Акци аразӕг у хӕрзуадӕн проект «Мечтай со мной». Проекты фарс рахӕцыд Уӕрӕсейы Президент Владимир Путин. Ацы проекты фӕрцы ӕххӕстгонд цӕуынц сидзӕр кӕнӕ цыбыркъух бинонты сывӕллӕтты, стӕй, 60 азӕй уӕлӕмӕ кӕуыл цӕуы ӕмӕ се ‘нӕниздзинады уавӕрмӕ гӕсгӕ сӕ авналӕнтӕ цыбыр кӕмӕн сты, ахӕм ацӕргӕ адӕймӕгты фӕндӕттӕ ӕмӕ бӕллицтӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here