Куысты бӕрӕггӕнӕнтӕ

0
15

«Фарон нӕ размӕ лӕууыд экономикӕ ӕмӕ социалон къабазӕн баххуысы ӕмӕ рӕзты, бюджеты ӕмӕ ӕнӕбюджетон гуырӕнтӕй ӕхца ӕрбаздахыны, ӕхцайы кадавардзинад ӕвзаргӕйӕ, республикӕйы фидар рӕзтӕн фӕрӕзтӕ ссарыны хӕстӕ. Стыр куыст бакодтам, фӕлӕ ма баззад лыггӕнинаг фарстытӕ, уыдоныл нӕ дарддӕр хъӕудзӕн кусын», — ахӕм раныхасӕй экономикон рӕзты министр Томайты Хъазыбег байгом кодта ведомствӕйы ӕмбырд. Уырдӕм рахастӕуыд ивгъуыд азы куысты бӕрӕггӕнӕнтӕ.

Министр куыд бацамыдта, афтӕмӕй хъӕууонхӕдзарадон продукцийы бӕрц, 2018 азимӕ абаргӕйӕ, фӕцис 5,2 проценты фылдӕр, цӕрӕнуӕттӕ аразыны бӕрц та — 9,5 проценты, республикӕйы паддзахадон хӕс фӕкъаддӕр 9,07 миллиард сомӕй 8,67 миллиард соммӕ. Промышленнон куыстады индекс не схызт 94,8 процентӕй уӕлдӕр, сӕйраг аххосаг — «Электроцинк» ӕхгӕд кӕй ӕрцыд, уый йӕ фӕстӕ расайдта къуылымпытӕ металлургон ӕмӕ химион куыстады.

Фӕкъаддӕр хомаг куыстгӕнӕг ӕмӕ тынуафӕн къабӕзты продукцийы бӕрц.

Азы кӕронмӕ сӕйраг ӕхцайы фӕрӕзтӕм инвестициты бавӕрды бӕрц рауад 80 проценты. Зӕрӕмӕджы ГЭС-тӕ арӕзт кӕй фесты, уымӕ гӕсгӕ энергетикӕйы инвестициты бавӕрд 2 хатты къаддӕр фӕци. Томайы-фырты хъуыдымӕ гӕсгӕ, уавӕр банывыл кӕнид арӕзтады къабаз. Ныртӕккӕ фӕфылдӕр цӕрӕнуӕтты арӕзтад, паддзахадон программӕты архайд дӕр. Национ проекттӕ цы 67 федералон проектӕй конд сты, уыдонӕй Цӕгат Ирыстон архайы 48. Ивгъуыд аз сын радтой 7 миллиард сомы, куыстытӕ цыдысты 90 объектыл: фелсырон-акушерон пункттӕ, скъолатӕ, культурӕйы хӕдзӕрттӕ, спортивон инфраструктурон объекттӕ, рӕвдауӕндӕттӕм уӕлӕмхасӕн бӕстыхӕйттӕ.

Цӕгат Ирыстоны социалон-экономикон фарстытӕ алыг кӕнынӕн 2019 азы 17 федералон паддзахадон программӕйы фӕлгӕты ӕхцайы ӕппӕт гуырӕнтӕй республикӕмӕ ӕрбафтыд 15,3 миллиард сомы. Федералон бюджетӕй — 13,6 миллиард сомы, республикон — 0,9 миллиард сомы, ӕнӕбюджетон гуырӕнтӕй — 0,8 миллиард сомы. Абаргӕйӕ, 2016 азы федералон бюджет республикӕйӕн радих кодта 4,5 миллиард сомы. РЦИ-Аланийы разамынд Мӕздӕджы, Горӕтгӕрон ӕмӕ Рахизфарсы районты бынӕттон хиуынаффӕйады администрацитимӕ бацӕттӕ кодтой ӕмӕ федералон оргӕнтӕм арвыстой Горӕтгӕрон, Мӕздӕджы районты ӕмӕ Беслӕныхъӕуы 2019-2024 азтӕн социалон-экономикон рӕзтимӕ баст фӕндӕттӕ.

Хицӕнӕй Томайты Хъазыбег фӕбӕрӕг кодта туристон-рекреацион комплекс «Мамысон»-ы фӕзыл сӕрмагонд экономикон бынаты сарӕзт. Федералон хицауадӕн бацӕттӕ кодтой ӕхсӕз мин сыфы бацахсӕг ӕрмӕг, сфидар кодтой хъӕугӕ барадон акттӕ. Афтӕмӕй федералон центр сразы проектимӕ, ныридӕгӕн уал Уӕрӕсейы бюджетӕй радтой 100 милуан сомы проектон документтыл хардзӕн. Нӕхи бюджет дӕр дзы бавӕрдта 20 милуан сомы. Ацы аз курорты арӕзтадӕн ӕвӕрд ис 1 миллиард сомы.

«РЦИ-Аланийы инвестицион рӕзты корпораци»-йы разамонӕг Гугкаты Таймураз коллегийы ӕмбырды ӕрдзырдта, нӕ республикӕ Цӕгат Кавказы федералон зылды рӕзты паддзахадон программӕйы куыд архайы, уый тыххӕй. Ӕртӕ азмӕ царды рантыстысты, ныр дӕр ма ӕххӕстгонд цӕуынц фараст инвестицион проекты. Уый тыххӕй спайда кодтой 2,7 миллиард сомӕй, уыдонӕй 950 милуан сомы уыдысты федералон бюджетӕй. Корпораци ӕхцайӕ баххуыс кодта проекттӕ «Диг-Агро», «Владка», «Сигма Премиум», «СТК-59»-ӕн.

Фарон Цӕгат Кавказы хъуыддӕгты тыххӕй министрады ведомствӕты ‘хсӕн кусӕг къорд сразы ис цыппар цӕгатирыстойнаг инвестицион проектимӕ: «Фундук Алании», «Колос-2019», «Грин», «Объединенная строительная компания 21 век». Ацы аз дӕр зӕрдӕдарӕн ис, кӕй равзардзысты 8-10 проекты, фондзы тыххӕй уал ӕмбӕлгӕ ӕрмӕг арвыстой федералон министрадмӕ, иннӕтыл нырма кусынц.

Ӕмбырды ма фӕнысан кодтой 2020 азы куысты пълан.

Гуырдзыбеты Зӕринӕ

ОСТАВЬТЕ ОТВЕТ

Please enter your comment!
Please enter your name here