Кады грамотӕ — сывӕллӕтты уарзон тренерӕн

0
8

Лӕгӕй-лӕгмӕ тохты спортивон скъолайы къорд азы сывӕллӕтты тренерӕй зӕрдиагӕй кусы Букылты Руслан. Ӕрӕджы 80 азы кӕуыл сӕххӕст, уыцы адӕймаг у сывӕллӕтты уарзон ахуыргӕнӕг.

Букылы-фырт йӕхӕдӕг ӕрыгонӕй уыд самбойӕ ССР Цӕдисы спорты мастер. Къорд азы ӕнтыстджынӕй хъахъхъӕдта Цӕгат Ирыстоны спортивон кад самбойӕ ерысты. Мидхъуыддӕгты министрады оргӕнты кусгӕйӕ, майор Букылты Руслан уыдис Уӕрӕсейы спортивон ӕхсӕнад «Динамо»-йы чемпион.

Сывӕллӕтты тренерӕй кусын райдыдта 50-аздзыдӕй, пенсимӕ куы рацыд, уый фӕстӕ. Русланӕн стыр аргъ кӕнынц йӕ хъомылгӕнинӕгты ныййарджытӕ куыд зондджын, зӕрдӕхӕлар ӕмӕ дӕсны ахуыргӕнӕгӕн, сывӕллӕттӕ та йӕ уарзынц сӕхи дадайау.

Ӕрӕджы Букылты Русланы нӕ республикӕйы Сӕргълӕууӕг Битарты Вячеслав схорзӕхджын кодта РЦИ-Аланийы Кады грамотӕйӕ. Уыцы хӕрзиуӕг ын лӕвӕрд ӕрцыд спортивон залы йӕ ӕвзонг хъомылгӕнинӕгты раз. Ацы ӕхсызгон мадзалы архайдтой самбойӕ фӕсивӕды ‘хсӕн дунейы чемпион Гаситы Мурат, нӕ республикӕйы иугонд командӕйы сӕйраг тренер Гаситы Петр,   РЦИ-Аланийы самбойы федерацийы президент Фидараты Таймураз. Уыдон Битарты Вячеславы номӕй зӕрдиаг арфӕ ракодтой Букылты Русланӕн ӕмӕ йӕ схорзӕхджын кодтой РЦИ-Аланийы Кады грамотӕ ӕмӕ ӕхцайы лӕварӕй.

Руслан зӕрдиаг ныхӕстӕ загъта лӕвӕрттӕ ратджытӕн: «Стыр бузныг уе ‘рхъуыдыйӕ. Стыр бузныг зӕгъын нӕ республикӕйы Сӕргълӕууӕг Битарты Вячеславӕн, ахӕм хӕрзиуӕгӕй мӕ кӕй скадджын кодта, уый тыххӕй. Сывӕллӕттимӕ кусын мӕнӕн у мӕ рагон бӕллиц. Цалынмӕ Мидхъуыддӕгты министрады оргӕнты службӕ кодтон, уӕдмӕ мын фадат нӕ уыд тренеры куыст кӕнынӕн, фӕлӕ уый фӕстӕ мӕ мондӕгтӕ суагътон (худы). Абон дӕр ме ‘взонг ахуыргӕнинӕгтӕ мӕнӕн сты мӕ удлӕууӕн. Уыдон мын дӕттынц ныфс ӕмӕ хъару, ӕмӕ кусдзынӕн, цалынмӕ сын пайдайы хос уон, уӕдмӕ. Хорз кӕстӕртӕ нӕм ис, ӕмӕ уыдоны уынгӕйӕ, лӕджы йӕ азты уӕз дӕр ӕрбайрох вӕййы. Мӕ зӕрдӕ зӕгъы, нӕ Ирыстоны фӕсивӕдӕн ног ӕмӕ ног ӕнтыстытӕ ахуыры, куысты, спорты ӕмӕ царды иннӕ фӕзилӕнты. Ног аз Ирыстонӕн амӕндтӕ хӕссӕг аз рауайӕд!”

Баскаты Уырызмӕг

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here