Уӕзданӕй йӕ курдиат ӕвдыста

0
346

Ирыстон курдиаттӕй цух никуы уыд. Хуыцауӕй лӕвӕрд хорзӕхӕй — нываивадмӕ уарзтӕй хайджын уыд Бутаты Ефимы зӕрдӕ. Ӕмӕ йӕ уый уӕзданӕй лӕвар кодта йӕ адӕмӕн. Ӕрӕджы йӕ райгуырдыл сӕххӕст 80 азы.

Ефим райгуырд Алагиры. Каст фӕцис Ростовы Грековы номыл аивадон училищӕ. Уый фӕстӕ куыста Ростовы, Бирӕгъзӕнджы, Алагиры скъолаты. Суанг ма Бирӕгъзӕнджы скъолайы сарӕзта керамикӕ судзӕн пецтӕ, ӕмӕ сӕрмагонд ӕрмадзтӕ. Скъоладзауты зонгӕ кодта ныв кӕныны ӕмӕ фӕллойы сусӕгдзинӕдтимӕ, стӕй керамикӕимӕ куыд архайын хъӕуы, уыимӕ. Ефимы аивадон курдиат дисы ӕфтыдта аивадуарзджыты, аивады йын йӕхи сӕрмагонд ӕрмдзӕф кӕй ис, уымӕй. Йӕ конд скульптурӕтӕ-цыртдзӕвӕнтӕ сты нӕ республикӕйы хъӕуты, горӕтты ӕмӕ Ростовы алы рӕтты. Аив кӕнынц фӕзтӕ ӕмӕ уынгтӕ.

Уыдонӕн сӕ зынгӕдӕртӕ сты: Уӕлахизхӕссӕг Георгийы скульптурон композици, С. М. Кировы цыртдзӕвӕн (ис Ростовы), Хӕтӕлдоны цӕрджытӕй Фыдыбӕстӕйы Стыр хӕстӕй чи нал сыздӕхт, уыдоны номарӕн, Плиты Иссӕйы цыртдзӕвӕнтӕ ӕмӕ ӕндӕртӕ.

Ефимы райгуырдыл 80 азы кӕй сӕххӕст, уый фӕдыл йӕ номарӕн изӕр уыд Национ наукон библиотекӕйы. Уырдӕм ӕрбацыдысты сфӕлдыстадон интеллигенцийы ӕмӕ Бутаты мыггаджы минӕвӕрттӕ, Ефимы хиуӕттӕ ӕмӕ хӕстӕджытӕ, чиныгкӕсджытӕ. Ефимы курдиатыл дзургӕйӕ, уыдон бафиппайдтой, аивады йын йӕхи сӕрмагонд фӕндаг ӕмӕ ӕрмдзӕф кӕй уыд.

Ӕмхуызон хорз арӕхст графикон ӕмӕ скульптурон композицитӕ кӕнынмӕ. Цалынмӕ-иу ӕрмӕг бӕстон ӕмӕ бӕлвырдӕй нӕ сахуыр кодта, йӕ зӕрдӕйы арфыйӕ нӕ бахсыстаид, йӕ арф зонды йӕ йӕхицӕн не сфӕлтӕрдтаид, уӕдмӕ графикон, кӕнӕ скульптурон-композицион куыст кӕнынмӕ нӕ бавнӕлдтаид. Ныв ӕмӕ скульптурон композицитӕ кӕнынӕй уӕлдай ма Ефим йе ‘ргом здӕхта спортмӕ. Архайдта рог атлетикӕйӕ ерысты. Уӕдӕ йӕ зӕрдӕйӕн футбол дӕр хӕстӕг кӕй уыд, уымӕн ис алыхуызон хорз дӕнцӕгтӕ.

Номарӕн изӕры райдайӕны нывгӕнӕджы царды ӕмӕ сфӕлдыстадон фӕндаджы тыххӕй радзырдта зындгонд аивадиртасӕг, РЦИ-Аланийы аивӕдты сгуыхт архайӕг Гӕздӕнты Зарӕ.

— Ефим уыд ӕцӕг курдиаты хицау. Хуыцауӕй йыл йӕ адӕмы раз цы хӕс уыд, уый ӕххӕст кодта уӕздан ӕмӕ рӕсугъдӕй. Никуы никӕй зӕрдӕхудты бацыд. Ӕмхуызон хорз архайдта скульптурӕ ӕмӕ графикӕйы жанрты, фыста ӕмдзӕвгӕтӕ. Хорз уаид, ӕмӕ ахӕм адӕмӕн нӕ дзыллӕ афоныл, се ‘гасӕй аргъ куы кӕнид, — загъта Зарӕ.

Уый фӕстӕ фембӕлды архайджытӕ бакастысты Ефимы цард ӕмӕ сфӕлдыстадон фӕндагыл дзурӕг кинонывмӕ. Йӕ автор ӕмӕ режиссер, нӕ республикӕйы сгуыхт артисткӕ Сечъынаты Альбинӕ. Уый ма уыд изӕрамонӕг дӕр. Кинонывы Ефимӕн йе сфӕлдыстадон фӕндаг ӕвдыст ӕрцыд алывӕрсыгӕй. Уымӕ бакӕсыны фӕстӕ Альбинӕ бузныг загъта, йӕ сисынмӕ ӕмӕ сценари ныффыссынмӕ йӕм чи фӕкаст, уыдонӕн.

Сӕ мысинӕгтӕ ӕмӕ Ефимы сфӕлдыстады тыххӕй сӕ хъуыдытӕ загътой Мӕскуыйы цӕрӕг, ӕхсӕнадон архайӕг Бедойты Тамарӕ, РЦИ-Аланийы культурӕйы министры хӕдивӕг Дудайты Чермен, скульптортӕ Тадтаты Георги, Дзбойты Михал, Александр Липкович, нывгӕнӕджы тыххӕй йӕхи фыст ӕмдзӕвгӕ бакаст РЦИ-Аланийы культурӕйы сгуыхт кусӕг Къадзаты Станислав.

Сӕ аивад ирон зард ӕмӕ кафты равдыстой хореографион ансамбл «Мӕскуыйаг алантӕ»-йы архайджытӕ Наталья Корешкова, Гигкаты Максим, РЦИ-Аланийы сгуыхт артисткӕ Сечъынаты Элитӕ ӕмӕ ӕрыгон зарӕггӕнӕг Бутаты Заремӕ.

Номарӕн изӕр саразджытӕн ӕмӕ уазджытӕн мыггаджы номӕй арфӕ ракодтой Бутаты Константин, Таймураз ӕмӕ Арсен.

Библиотекӕйы фойейы та фенӕн уыд Ефимы графикон ӕмӕ скульптурон куыстыты равдыст.

Кӕд Бутаты Ефим не ‘хсӕн нал ис, уӕддӕр йӕ ном цӕргӕйӕ баззайдзӕн йӕхихуызон аивадыл ӕнувыд адӕмы зӕрдӕты.

Гасанты Валери

ОСТАВЬТЕ ОТВЕТ

Please enter your comment!
Please enter your name here