Битарты Вячеслав: “Дарддӕры размӕцыды нысантӕ”

0
57

Зындгонд куыд у, афтӕмӕй Уӕрӕсейы Президент Владимир Путин 15 январы раныхас кодта йӕ ӕрвылазон Ныстуанимӕ УФ-йы Федералон ӕмбырды раз.

Уыцы ӕмбырды архайдта Цӕгат Ирыстоны делегаци дӕр республикӕйы Сӕргълӕууӕг Битарты Вячеславы разамындӕй. Цӕгатирыстойнаг делегацийы ма уыдысты Парламенты Сӕрдар Алексей Мачнев ӕмӕ УФ-йы Федерацийы Советы уӕнг Фадзайты Арсен.

Владимир Путины Ныстуаны фӕдыл йӕ хъуыдытӕ дзургӕйӕ, Битарты Вячеслав куыд фӕнысан кодта, афтӕмӕй Уӕрӕсейы Президент радон хатт ӕргом аздӕхта, куыд ӕппӕт бӕстӕйы, афтӕ Цӕгат Ирыстоны цӕрджыты дӕр цы фарстытӕ тыхсын кӕны, уыдонмӕ: демографимӕ, экономикӕйы, ӕнӕниздзинад хъахъхъӕнынад ӕмӕ ахуырады райрӕзтмӕ… Битары-фырты ныхасмӕ гӕсгӕ, ӕппӕт уыцы хъуыддӕгты фӕдыл дӕр Президент фӕбӕлвырд кодта дарддӕры архайды фӕндӕгтӕ.

— Ныртӕккӕ нӕ сӕйрагдӕр хӕс у, Владимир Путин цы нысантӕ сӕвӕрдта, уыдоныл уӕхскуӕзӕй бакусын. Зӕгъӕм, демографийы фарстытӕ тыхстаг сты нӕ республикӕйӕн дӕр. Уыимӕ бастӕй, мӕнмӕ гӕсгӕ, уӕлдай ахсджиаг сты сывӕллонджын бинонтӕн паддзахадон ӕххуысы мадзӕлттӕ. Вазыгджын сты ахуыргӕнджыты мызды фарстытӕ дӕр. Ахуыргӕнджыты мызды фарст лыг кӕныны хъуыддагмӕ мах дӕр бавнӕлдтам ӕмӕ уыцы нысанӕн республикон бюджеты уӕлӕмхасӕн бавӕрдтам 300 милуан сомы бӕрц. Уыцы ӕууӕл, кӕй зӕгъын ӕй хъӕуы, хуыздӕрӕрдӕм фӕзындзӕн республикӕйы педагогон коллективты архайдыл, — бафиппайдта Битарты Вячеслав.

Дарддӕр Цӕгат Ирыстоны Сӕргълӕууӕг куыд радзырдта, афтӕмӕй республикӕ бавнӕлдта мӕгуырдзинадимӕ тохы фӕлварӕн программӕ ӕххӕст кӕнынмӕ дӕр. Программӕйы фыццаг къӕпхӕн ӕххӕстгонд цӕуы Раздзоджы хъӕуы дӕнцӕгыл. Уым бӕрнон ведомствӕты специалисттӕ фӕзылдысты хӕдзари-хӕдзар ӕмӕ сбӕлвырд кодтой ӕппӕт бинонты уавӕр дӕр. Ацы къӕпхӕныл уал хъӕуы цӕрджытӕн ӕххуысы хуызы байуардзысты стурвос. Ахӕм ӕххуысыл сразы сты 14 бинонтӕ. Уыдон сӕ царды уавӕртӕ фӕхуыздӕр кӕныны хъуыддаджы се ‘ргом аздӕхтой хи хӕдзарӕдты райрӕзтмӕ. Уымӕй уӕлдай, цыбыркъух бинонты уавӕр фӕхуыздӕр кӕныны нысанимӕ пайдагонд цӕудзӕн паддзахадон ӕххуысы ӕндӕр мадзӕлттӕй дӕр.

Цӕгат Ирыстоны Сӕргълӕууӕджы ныхасмӕ гӕсгӕ, ахӕм ӕххуысы программӕтӕ ӕххӕстгонд цӕудзысты республикӕйы иннӕ районты дӕр. Ныртӕккӕ уал ахӕм проекттӕ цӕттӕгонд цӕуынц Мӕздӕджы районы Комаровы ӕмӕ Горӕтгӕрон районы Дӕргъӕвсы хъӕутӕн.

Битарты Вячеслав йӕ раныхасы фӕбӕрӕг кодта ӕндӕр ахсджиаг фарстытӕ дӕр. Йӕ ныхасмӕ гӕсгӕ, Фыдыбӕстӕйы Стыр хӕсты Уӕлахизы юбилейон азмӕ Цӕгат Ирыстон бацӕттӕ кодта бирӕ ахсджиаг дзыллон ӕмӕ зӕрдылдарӕн мадзӕлттӕ. Уыцы мадзӕлттӕ ныридӕгӕн ӕххӕстгонд цӕуынц сӕрмагонд пъланы бындурыл.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here