Раскъӕфтой зӕронд усы

0
26

Нӕ фыдӕлтӕм цы ‘гъдӕуттӕ уыдис, уыдон иууыл ӕппӕлинаг хъуыддӕгтӕ нӕ уыдысты, зӕгъӕм: тугисын, чызг скъӕфын, цӕугӕ цард кӕнын ӕмӕ ноджы бирӕ ӕндӕр цыдӕртӕ. Уыдон-иу адӕмы зӕрдӕты ныууагътой арф фӕд хорзӕрдӕм дӕр ӕмӕ ӕвзӕрырдӕм дӕр.

Рӕсугъд фӕд ныууадзынӕн цыргъзонд адӕймаг хъӕуы, ӕмӕ уымӕй алчи хайджын нӕу. Куырыхон лӕгтӕ-иу кӕстӕртӕн амыдтой, цӕмӕй сӕхи хизой фыдбылызӕй ӕмӕ фӕрӕдийынӕй.

Астӕуккаг Ручъы Есеты хъӕуы цардис иу дзӕбӕх лӕг Никъолоз. Уыдис ын дыууӕ лӕппуйы ӕмӕ цыппар чызджы. Чызджытӕ куы бахъомыл сты, уӕд сӕм, кӕй зӕгъын ӕй хъӕуы, усгуртӕ минӕвӕрттӕ ӕрвыстой алырдыгӕй. Хистӕр чызг хуынди Уардо: сӕрӕн, рӕсугъд, стыр зонды хицау ӕмӕ ӕгъдауджын. Дзомагъы комӕй иу лӕппу уарзта ацы чызджы, фӕлӕ йын цыдӕр хъуыддӕгты тыххӕй не сразы сты ӕмӕ уӕд фидарӕй загъта: «Мӕлон-цӕрон, уӕддӕр ацы чызджы хъуамӕ аскъӕфон». Лӕппуйы бирӕ хъуыды кӕнын нӕ бахъуыд, ӕппындӕр нӕ фӕтыхст, фӕзы Дзомагъы хъӕуы лӕппуты рамбырд кодта, бӕхтыл абадтысты ӕмӕ Ручъы комы бамидӕг сты. Зонгӕты фӕрцы базыдтой, чызг цы ран хуыссы, ӕмӕ куыд хуыздӕр ӕмӕ ӕнцондӕр уыдзӕн йӕ раскъӕфын, уый.

Куыд рабӕрӕг, афтӕмӕй чызджы хуыссӕн уыдис дыккаг уӕладзыджы балкъоны. Лӕппутӕм тынг ӕнцон фӕкаст балкъонӕй раскъӕфын, ӕмӕ иу сабыр изӕрмӕ сӕхи бацӕттӕ кодтой.

Чызджы мадмӕ чидӕр хӕрзгӕнӕг фӕци, йӕ чызгмӕ йын уыцы ‘хсӕв скъӕфджытӕ кӕй уыдзӕн, уый тыххӕй. Бинонтӕ ницы зыдтой, фӕлӕ чызджы мад схуыссыди уыцы ‘хсӕв йӕ чызджы хуыссӕны. Раст ӕмбисӕхсӕв адӕм куы ӕрфынӕй сты, афтӕ сӕм фӕмидӕг сты, сау нымӕты атыгътой хуыссӕны хуыссӕг зӕронд усы. Ус барӕй хъыпп-сыпп дӕр не скодта, цалынмӕ дӕллаг Рукъмӕ нӕ ныххӕццӕ сты, уӕдмӕ. Ус уый куы базыдта, хӕдзарӕй дӕрддзӕф сты, уӕд йӕ хъӕлӕсы дзаг ныхъхъӕр кодта, нымӕты хуылфӕй: «Зӕронд усы кӕдӕм хӕссут!!!» Лӕппу фырмӕстӕй йӕ ехс фӕхъил кодта, ӕмӕ дзы усыл дзӕбӕх цӕфтӕ сӕмбӕлд. Хъӕумӕ фӕстӕмӕ бӕхыл стъӕбӕртт кодта ӕмӕ ӕхсын райдыдта. Хъӕу иууылдӕр хъӕр-ахст сси, адӕм сыстадысты чысылӕй-стырӕй. Тынг хъӕбатыр ӕмӕ уӕндонӕй ма арацагур-бацагур кодта чызджы, фӕлӕ йӕ цӕрджытӕ бамбӕхстой.

Плиты Ленӕ,

пенсиисӕг

ОСТАВЬТЕ ОТВЕТ

Please enter your comment!
Please enter your name here