Хорз лӕг адӕмӕй хӕс дары

0
377

Нӕ барӕвдыдта хъысмӕт мад ӕмӕ хъӕбулы, нӕ ауызта мад йӕ хъӕбулы йӕ хъарм хъӕбысы, йӕ риуы урс ӕхсырӕй йӕ нӕ бафсӕста — ӕгъатыр мӕлӕт ӕй йӕхимӕ ахаста, хъӕбул мады сурӕт зонынхъом нӕ фӕци.

Фӕлӕ хъысмӕты фыдӕнӕн ӕрдз йӕ хъӕбулӕн балӕвар кодта алывӕрсыг курдиат: поэт, нывгӕнӕг, прозаик, публицист, драматург, дзыллӕйы сӕрыл тохгӕнӕг, ӕнӕхӕсӕй йӕхи хӕсджын чи хуыдта, ахӕм ӕнӕмӕлгӕ адӕймаджы удыхъӕд.

Ницӕмӕ дардта Къоста сидзӕры фыдцард. Цыфӕнды ӕфхӕрдӕй дӕр-иу ныззарыд: дӕ-да-дӕй. Мысыд йӕ мады, архайдта, йӕ хуыз ын йӕ цӕстытыл ауайын кӕныныл ӕмӕ хиуӕтты-хӕстӕджыты дзырдӕрфыстӕй сныв кодта йӕ мады сурӕт. Чи-иу ӕй федта, уыдон-иу загътой: йӕ мады халдих у.

Къостайы ӕмдзӕвгӕтӕ адӕм зыдтой чиныгмӕ нӕ кӕсгӕйӕ, дзыхӕй-дзыхмӕ сӕ лӕвӕрдтой фӕлтӕрӕй-фӕлтӕрмӕ. Абон дӕр у афтӕ. Сывӕллон ӕрдӕгдзырдтӕ дзурын куы базоны, уӕд ӕй ӕцӕг ирон бинонтӕ ахуыр кӕнынц: «Гино,гино,гис!», «Скъолайы лӕппу», «Зӕрватыкк», «Кӕмӕн цы?”, «Фыдуаг», «Лӕгау» дзурыныл.

Ӕз мӕхи фарстон ӕмӕ фӕрсын ӕдзух: уӕддӕр цы хӕс дардта Къоста йӕ дзыллӕйӕ? Хъуыстон ӕмӕ хъусын: «Хорз лӕг адӕмӕй хӕс дары». Ӕнӕхӕсӕй у хӕсджын:

Ӕз дзыллӕйӕ къаддӕр куы дарин,

Куы бафидин искуы мӕ хӕс,

Уӕд афтӕ ӕнкъардӕй нӕ зарин,

Нӕ хъуысид мӕ кӕуын хъӕлӕс…

Ӕгӕр дӕр ма балӕггад кодта Къоста йӕ дзыллӕйӕн. Сӕ царды нывтӕ сын афтӕ цӕстуынгӕ ныффыста йӕ «Ирон фӕндыр»-ы, ӕмӕ сӕ тых нӕ къаддӕр кӕны. Ницӕмӕ ӕрдардта йӕ уды зынтӕ. Нӕ бавзӕрста уды цардамонд, уӕддӕр йӕ мӕгуыр адӕм, йӕ мӕгуыр Ирыстоныл уыд йӕ сагъӕс, йӕ катай.

Ӕнӕдзуапп уарзондзинадӕн дӕр ныббыхста, фӕлӕ нӕ фӕрӕзта йӕ дзыллӕйы зындзинадӕн. Искуыцӕй -иу ӕм сӕрибары тын куы ферттывта, уӕддӕр ӕй йӕ адӕмӕн нывонд кодта сӕрибары охыл.

Ӕппӕт адӕмы уарзта, фӕлӕ йӕ мӕгуыр адӕмы уарзта фылдӕр. Кӕд цыфӕнды тыхст уыд, уӕддӕр йӕ курдиатӕй базар нӕ кодта, нӕ уӕй кодта йӕ дзырд ӕхцайыл: тох кодта адӕмы сӕрибарыл, хӕдбарыл!

Ӕмӕ кӕд хъӕр мӕрдтӕм дӕр хъуысы, уӕд дӕм фехъуысӕд, Къоста:

Зынгхуыст поэт, куы фенис абон:

Ӕмдзард дӕ адӕмимӕ дӕ,

Сырх уарди дидинтӕ зымӕгон

Дӕ ингӕныл. Уӕлӕуыл дӕ!

Куыд тынг бӕллыдтӕ, Иры фӕсивӕд ахуырмӕ куы тырныдтаиккой, ахуыры бар ӕмӕ фадат сын куы уыдаид. Цас фӕтох кодтай, сылгоймӕгты иунӕг скъола цӕмӕй ма сӕхгӕдтаиккой, ууыл. Ӕмӕ абон ирон адӕм зӕрондӕй-ногӕй сты чиныгджын, стыр ахуыргӕндтӕ кӕй сты, уый дӕм фехъуысӕд: наукӕйы, техникӕйы, аивады, литературӕйы сты раззагдӕрты ӕмрӕнхъ.

Дӕ бӕллиц бафтыд дӕ дзыллӕйы къухы. Иры лӕппутӕ ӕмӕ чызджытӕ тырнынц ахуыры бӕрзӕндтӕм, рухсмӕ ӕнӕзивӕг цӕуынц ӕзфӕраздӕронӕй.

Дӕ номыл, дӕ кадыл барынц сӕхи. Литературӕйы, аивады йе сфӕлдыстад адӕмы домӕнты аккаг кӕмӕн вӕййы, уый хорзӕхджын кӕнынц дӕ номӕй. Хызт у Ирыстон Цӕгатӕй Хуссармӕ ӕрцӕуӕг хӕддзу ӕлдарӕй. Нӕхи ирон лӕппутӕ сты Ирыстоны сӕргълӕуджытӕ.

Цӕры Ирыстон ӕнгом, йе ‘мдзард чи у, уыцы ӕндӕр адӕмыхӕттытимӕ. Дӕ номыл сты Цӕгатӕй Хуссармӕ стырдӕр хъӕутӕ, университеттӕ, уынгтӕ, скъолатӕ, музейтӕ.

Кӕмыты цардтӕ, уыцы рӕтты дӕ номыл сӕвӕрдтой номарӕн цыртдзӕвӕнтӕ. «Ирон фӕндыр» бирӕ адӕмтӕ ратӕлмац кодтой сӕхи ӕвзӕгтӕм, суанг дард фӕсарӕнты дӕр зӕлынц «Ирон фӕндыр»-ы зӕлтӕ:

Цӕгъддзӕн «Ирон фӕндыр» йӕ зарӕг,

Ӕнустӕ не сты йын цӕлхдур,

Ӕрвгӕрӕтты нӕрдзӕн йӕ кадӕг,

Йе стъалы ӕрттивдзӕнис уӕлхур!

Дӕ цыбыр ӕмдзӕвгӕты мидис у ахадгӕ, цӕстытыл нывӕфтыдӕй уайгӕ, фӕлӕ фурдӕй тыхджындӕр сты, уымӕн ӕмӕ сты дзыллӕйы цардӕрфыст.

Зӕрдӕ сӕм ӕнӕ фӕхудгӕ, ӕнӕ фӕкӕугӕ кӕм лӕууы? Дӕ кадджытӕм хъусынӕй чи фӕллайы?

Рӕстӕг аивта царды дарӕс, фӕлӕ нӕ рох кӕны хорздзинад, хӕс ӕмӕ фыддзинад дӕр. Нӕ фесты дзӕгъӕлы дӕ фыдӕбӕттӕ, зоны сӕ Ир, йӕхи уды разӕй дӕр дзыллӕйӕн чи лӕггад кодта, йӕ алы дзырд дӕр дзыллӕйы номыл йӕ зӕрдӕйӕ кӕмӕн гуырди, уый хӕрзтӕ. Ӕмӕ дӕ сыгъдӕг номы раз йӕхи хоны хӕсджын.

Кӕй бон у дӕу аккаг дзырдтӕ ссарын: фыссынц дыл ахуыргӕндтӕ, поэттӕ, нывгӕнджытӕ. Дӕ поэмӕ «Фатимӕ»-йыл ист киноныв тӕлмацгонд ӕрцыд ирон ӕвзагмӕ, ирон сценӕйы ӕвӕрд ӕрцыдис ӕртыккаг хатт. Уырыссаг театр та бацӕттӕ кодта дӕ пьесӕ «Дуня».

Цӕгат Ирыстоны наукон библиотекӕ дӕ райгуырды 160 азы юбилейы кадӕн бацӕттӕ кодта миниатюрон чиныг. Уым мыхуыргонд ӕрцыд де ‘мдзӕвгӕ «Ныстуан» 105 ӕвзагыл.

Нӕй кӕрон дӕ бирӕ сфӕлдыстадон ивылӕнтӕн:

Кӕдмӕ уа сау зӕххыл Ирыстон,

Уӕдмӕ «Ирон фӕндыр» цӕгъддзӕн,

Кӕмфӕнды уа ирон — ӕмбӕстон,

Къоста йӕ зӕрдӕйы цӕрдзӕн!

Рӕстуд поэт, хатыр кургӕйӕ дын арӕм дӕ сыгъдӕг ном. Дзӕнӕт уӕ бадӕн, мад ӕмӕ фырт, Дзӕм-дзӕмы дон фӕзмӕд «Ирон фӕндыр»-ы зӕлтӕ.

Хъӕцмӕзты Мӕдинӕ,

Дзӕуджыхъӕуы 42-ӕм скъолайы ирон ӕвзаг ӕмӕ литературӕйы ахуыргӕнӕг

ОСТАВЬТЕ ОТВЕТ

Please enter your comment!
Please enter your name here