“Ирыстоны сӕуӕхсид”

0
11

Цӕгат Ирыстоны промышленност ӕмӕ транспорты министр Хайдарбек Бутов бабӕрӕг кодта нырыккон рухсдиодон цырӕгътӕ уадзӕг куыстуат «Ирыстоны сӕуӕхсид».

Заводы рӕхджы байгом уыдзӕн ног цех. Йӕ фӕзуат уыдзӕн 2 мин квадратон метры. Цырӕгътӕ уӕйгӕнӕн офис фӕлхасгӕнджыты зонгӕ кӕны куыстуаты продукциимӕ.

— Регионмӕ инвесторты хоныны хъуыддаджы нӕ архайд кӕй фӕрӕстмӕ, уый бӕрӕг у «Ирыстоны сӕуӕхсид»-ы. Фарон Волжскы завод «Луч»-ы инвестицион проект ам ӕнӕкъуылымпыйӕ ӕххӕстгонд кӕй ӕрцыд, уый уынӕм нӕхи цӕстӕй. Нӕ завод кусын райдыдта ивгъуыд аз июны ӕмӕ афӕдзы ӕрдӕгмӕ рауагъта 50 милуан сомы аргъ продукци. Ныртӕккӕ дзы кусы 50 адӕймаджы ӕмӕ республикӕйы бюджетмӕ фидынц хъалонтӕ, — загъта министр.

Ацы завод нымад у Цӕгат Кавказы электрон тых фӕстауӕрцгӕнӕг кусӕнгӕрзтӕ уадзӕг фыццаг куыстуатыл. Иумӕйагӕй ӕмӕ сӕрмагондӕй кӕмӕй пайда кӕнынц, уыцы продукцийы хуызтӕ хӕццӕ кӕнынц дыууӕ минмӕ.

Рӕхджы заводы скусдзӕн ног цех, ӕмӕ ма йӕ продукцийы хуызтыл ноджыдӕр бафтдзӕн, фӕзындзӕн дзы ног кусӕн бынӕттӕ. Ныридӕгӕн ног цехӕн ифтонггӕрзты фылдӕр хай заводмӕ ӕрбафтыд. Куыстуаты продукцийӕ пайда кӕнынц канд цӕгатирыстойнӕгтӕ нӕ, фӕлӕ ма ӕндӕр регионты цӕрджытӕ дӕр.

«Бином»-ы уӕгъд фӕзтыл баххӕст кӕнынмӕ хъавынц электроуартон ифтонггӕрзтӕ ӕмӕ зынгсирвӕзтытӕ хуыссын кӕнынӕн хъӕугӕ фӕрӕзтӕ уадзыны проекттӕ «Сӕуӕхсид электроуарт» ӕмӕ «Арт арсенал».

— Нӕ цырӕгътӕ рухс кӕнынц Дыгуры районы, ӕрыдоны ӕмӕ Беслӕны уынгтӕ, Дзӕуджыхъӕуы скъолатӕ, рынчындӕттӕ ӕмӕ Планетарий, стӕй Хӕзныдоны ног хид, — зӕгъы куыстуаты генералон директор Дмитрий Ураков.

Аннӕ КАТОЛЬЯНЦ

ОСТАВЬТЕ ОТВЕТ

Please enter your comment!
Please enter your name here