Ком уыдзӕн сыгъдӕгдӕр

0
56

Садоны раздӕры здыйы-цинчы комбинаты Фыййагдоны ӕрзӕтыссӕн фабрик ма куы куыста, уӕд йӕ бирӕ ӕппарӕццӕгтӕ ласт цыдысты Хӕныггомы дымӕгмӕ. Цалдӕр азмӕ уыдон милуангай тоннӕтӕм хӕццӕ кодтой ӕмӕ комбинаты бахъуыд цӕугӕдон Хӕныггомдонӕн тъунел акъӕртт кӕнын къӕдзӕхы хуылфы.

Фӕлӕ 2004 азы сӕрды Куырттаты комы хӕхбӕсты цы тыхджын тӕрккъӕвдатӕ ӕрцыд, уыдоны азарӕй Хӕныггомдон раивылд, тъунел фехгӕд алыхуызон ӕрмӕджытӕй ӕмӕ ивылд дӕттӕ йӕ иувӕрсты арф къанау айгӕрстой цӕугӕдон Фыййагдонмӕ. Уӕдӕ 2013 азы дӕр цы тыхджын уарынтӕ фӕцыд, уыдон дӕр чысыл знаггад не ‘рхастой Хӕныггомы ӕмбисонды алфамбылай ӕрдзӕн.

Уавӕр афтӕ уыд, ӕмӕ ӕрзӕтыссӕн фабричы ӕппарӕццӕгты сӕдӕгай мин тоннӕтӕ Хӕныггомдоны ивылд дӕттӕ балӕууын кодтой цӕугӕдон Фыййагдоны атагъайы. Уый республикӕйы ахуыргонд экологты хъуыдымӕ гӕсгӕ цӕугӕдоны удӕгас организмты тынг бахъыгдардта, суанг Хъаспы денджызы онг. Уымӕн ӕмӕ ӕппарӕццӕгтӕм алыхуызон мӕргтӕй уӕлдай хӕццӕ кӕнынц тӕссаг химион буаргъӕдтӕ дӕр. Ӕрдзон фыдбылызты фӕстӕ дӕр уавӕр чысыл нӕ тыхсын кодта цӕрӕн бынат Фыййагдон ӕмӕ йӕ алыварс хӕххон хъӕуты цӕрджыты, тыхджын дымгӕтӕ ӕппарӕццӕгты фӕйнӕрдӕм кӕй хастой, уый тыххӕй. Уымӕ гӕсгӕ дӕргъвӕтин рӕстӕг суанг бӕстӕйы уӕлдӕр паддзахадон оргӕнты раз фарст афтӕ ӕвӕрд цыдис, цӕмӕй зианхӕссӕг ӕппарӕццӕгтӕй ӕдасгонд ӕрцӕуа Куырттаты ком, ӕмӕ нӕ республикӕйы Хицауады, ахуыргонд экологты хъӕддых архайды руаджы хъуыддаг сырӕзт.

Куырттаты комы куы уыдыстӕм, уӕд Фыййагдоны хидмӕ нӕма бахӕццӕ стӕм, афтӕ галиуӕрдыгӕй бирӕ змӕлд баййӕфтам Хӕныггомы дымӕджы. Экскаватортӕ зӕхх къахтой, стыргуыффӕджын  «КамАЗ»-тӕ та-иу сыджыт фӕцӕйскъӕфтой арӕзтады ӕндӕр ранмӕ. Рагъӕй коммӕ цы дыууӕ ӕмраст къанауы ӕрцыд фахсыл Хӕныггомдоны уадзынӕн, уыдоны та цӕст дзӕбӕх ахста.

«Мах стӕм ӕнӕххӕст бӕрнондзинады ӕхсӕнад «Инжстройконтроль»-ы аразджытӕ, — загъта ацы куыстуаты хайады хицау Бӕззаты Нодар. — 2019 азы 1 августы бавнӕлдтам Фыййагдоны раздӕры ӕрзӕтыссӕн фабричы ӕппарӕццӕгтӕ ӕфснайӕн бынат ӕдасгӕнӕн куыстытӕм. Нӕ фарсмӕ ӕрбалӕууыдысты субподрядон организаци, ӕнӕххӕст бӕрнондзинады ӕхсӕнад «Ирстоун»-ы кусджытӕ дӕр, йӕ хицау Цӕллагты Руслан). Ӕмӕ нын иумӕйаг хъарутӕй хорз бантыст. Ныронг уал ӕппӕт арӕзтадон куыстытӕн фестӕм сӕ 99 проценты».

Дарддӕр хайады хицау куыд радзырдта, афтӕмӕй паддзахад ацы объект саразынӕн радих кодта 240 милуан сомы, ӕмӕ, дам, нӕ куыстмӕ акастыстӕм бӕрнон цӕстӕй. Уымӕн ӕмӕ арӕзтад иуӕй ахсджиаг ӕрдзхъахъхъӕнынадон объект у, иннӕмӕй та Куырттаты ком, уӕлдайдӕр Фыййагдон, у ӕнӕниздзинады алӕмӕты къуым, ӕмӕ, дам, хъуамӕ йӕ сыгъдӕгдзинад бахъахъхъӕнынмӕ мах дӕр нӕ фӕллойы хай бахӕссӕм, зӕгъгӕ, дзырдта Бӕззаты Нодар.

Ныхас кодтам арӕзтады прораб Калоты Славикимӕ дӕр. Арӕзтады райдайӕнӕй фӕстӕмӕ йӕ цӕст дардта ӕппӕт куыстыты хӕрзхъӕддзинадмӕ. Куыд радзырдта, афтӕмӕй ӕппарӕццӕгты уӕлӕ фӕлтӕргай ӕвӕрд ӕрцыд ӕлыг, писи, чъыр, цемент, сыджыт, саумӕр, стӕй ӕппӕт фӕзуаты дӕр кӕрдӕг тыд ӕрцӕудзӕн уалдзӕджы.

«Нӕ коллектив бирӕ тыхтӕ бахардз кодта донмарӕны, шлюзты, донуадзӕн къанӕутты арӕзтӕдтӕ ӕмӕ тъунел рӕвдзгӕнӕн куыстыты. Ӕппӕт фӕллойадон архайды дӕр сӕхи фӕзминагӕй равдыстой экскаватор ӕмӕ грейдерыл кусджытӕ Хынцӕгты Дзамболат ӕмӕ Фриаты Виктор, шофыртӕ Мӕхъиты Марат, Хуыгаты Гарсик, стӕй Хуыгаты Мӕир. Ног арӕзтады ахадындзинад та уым ис, ӕмӕ тыхджын къӕвдаты фӕстӕ Хӕныггомдон цыфӕнды тынг куы раивыла, уӕддӕр ног арӕзтадӕн ницы знаггад ракӕндзӕн. Уымӕн ӕмӕ шлюзты руаджы ивылд дӕттӕ уыцы-иу рӕстӕг ауадзӕн уыдзӕн, тъунелыл ӕмӕ хохы фахсыл цы дыууӕ къанауы арӕзт ӕрцыд, уыдоныл дӕр», — радзырдта Калоты Славик.

Хӕныггомы ӕрдзхъахъхъӕнынадон арӕзтады тыххӕй ӕрмӕг цӕттӕ уыд газеты рацӕуынмӕ, афтӕ нӕм прораб телефонӕй фехъусын кодта, зӕгъгӕ, объекты арӕзтад кӕронмӕ ахӕццӕ, лӕвӕрд ӕрцыд йӕ заказгӕнӕг РЦИ-Аланийы ӕрдзон фӕрӕзтӕ ӕмӕ экологийы министрадмӕ, ныртӕккӕ та, дам, нӕ техникӕ ардыгӕй ласӕм куыстуаты иудадзыгон бынатмӕ.

Тохсырты Къоста

ОСТАВЬТЕ ОТВЕТ

Please enter your comment!
Please enter your name here