Президенты ног ӕххӕстбарджын минӕвар — Юрий Чайка

0
16

27 январы горӕт Пятигорскы цы уӕрӕх ӕмбырд уыд, уым Цӕгат Кавказы субъектты разамонджыты базонгӕ кодтой Уӕрӕсейы Федерацийы Президенты ног ӕххӕстбарджын минӕвар Юрий Чайкаимӕ.

Цӕгат Ирыстонӕй уыцы фембӕлды архайдтой республикӕйы Сӕргълӕууӕг Битарты Вячеслав, сӕйраг федералон инспектор Челӕхсаты Владимир ӕмӕ Парламенты Сӕрдар Алексей Мачнев.

Зындгонд куыд у, афтӕмӕй 22 январы Владимир Путин цы Указ бафыста, уымӕй Цӕгат Кавказы федералон зылды УФ-йы Президенты ӕххӕстбарджын минӕварӕй нысангонд ӕрцыд Юрий Чайка.

Ӕмӕ ныр ацы ӕмбырды Цӕгат Кавказы субъектты разамонджытӕ ӕмӕ иннӕ бӕрнон кусджытӕн Юрий Чайкайы раздӕры архайд ӕмӕ фидӕны нысанты тыххӕй радзырдта УФ-йы Президенты Администрацийы разамонӕджы хӕдивӕг Владимир Островенко.

Фембӕлды раныхас кодта Президенты раздӕры ӕххӕстбарджын минӕвар Александр Матовников дӕр (зындгонд куыд у, афтӕмӕй уый ныр нысангонд ӕрцыд фистӕг ӕфсӕдты командӕгӕнӕджы хӕдивӕгӕй). Уый куыд фӕбӕрӕг кодта, афтӕмӕй йӕ зӕрдӕ дары, Юрий Чайкайы дӕсныдзинад ӕмӕ фӕлтӕрддзинад йӕ куысты ног бынаты ӕнтыстджын архайдӕн ахъаз кӕй уыдзысты, ууыл.

Александр Матовников регионты минӕвӕрттӕн бузныг загъта, фӕстаг дыууӕ азы дӕргъы Цӕгат Кавказы социалон-экономикон нывылдзинады фарстытыл иумӕйаг хъарутӕй зӕрдиагӕй кӕй куыстой, уый тыххӕй. «Нӕ размӕ цы ахсджиаг нысантӕ лӕууыд, уыдоныл ӕмхъаруйӕ куыстам. Ӕппӕты сӕйрагдӕр та уый у, ӕмӕ абон Цӕгат Кавказ у сабырцӕрӕг ӕмӕ ӕдас регион, барадхъахъхъӕнӕг оргӕнтӕ уавӕрмӕ лӕмбынӕг сӕ цӕст дарынц», — бафиппайдта Александр Матовников.

Фӕстӕдӕр ныхасы бар райста Юрий Чайка. Уый куыд фӕнысан кодта, афтӕмӕй Президенты ӕххӕстбарджын минӕварӕй нысангонд кӕй ӕрцыд, уый йӕхицӕн нымайы Владимир Путины уӕлдай ӕууӕнкыл. Уыцы ӕууӕл ыл ноджы бӕрнондӕр хӕстӕ ӕвӕры Цӕгат Кавказы регионты паддзахадон политикӕйы уагӕвӕрдтӕ ахадгӕдӕр хуызы ӕххӕст кӕныны хъуыддаджы. Юрий Чайка куыд фӕнысан кодта, афтӕмӕй фыццаградон ӕргом здӕхт цӕудзӕн национ проекттӕ ӕххӕст кӕнынмӕ, регионы адӕмы царды уавӕртӕ хуыздӕр кӕнынмӕ, инвесторты ӕргом Цӕгат Кавказмӕ раздахынмӕ, ног кусӕнбынӕттӕ гом кӕнынмӕ ӕмӕ афтӕ дарддӕр.

— Фӕстаг 10 азы дӕргъы Цӕгат Кавказы федералон зылды социалон-экономикон уавӕр фӕнывылдӕр кӕнынӕн бирӕ ахсджиаг хъуыддӕгтӕ арӕзт ӕрцыд. Фӕлӕ нырма нӕ размӕ бирӕ нысантӕ лӕууы, цӕмӕй регионы адӕмы цард хуыздӕрӕй-хуыздӕр кӕна, — загъта Юрий Чайка.

Президенты ӕххӕстбарджын минӕвар куыд фехъусын кодта, афтӕмӕй хӕстӕгдӕр рӕстӕг федералон зылды ӕппӕт субъекттӕ дӕр бабӕрӕг кӕндзӕн ӕмӕ регионты лыггӕнинаг фарстытыл бӕстондӕр ӕрдзурдзӕн бынӕттон разамонджытимӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here