Коронавирус ма ‘руадзыны мадзӕлттӕ

0
25

Коронавирус кӕцӕй равзӕрд, уый ахуыргӕндтӕ кӕронмӕ нӕма равзӕрстой. Фӕлӕ специалисттӕ иу хъуыддаг зонынц бӕлвырд — низ фӕзынд цӕрӕгойтӕй. Фыццаг куыд хъуыды кодтой, афтӕмӕй вирус ӕрбахастой хӕлынбыттыртӕ, фӕлӕ генетикон анализ куы скодтой ӕмӕ йӕ дыууӕсӕдӕ ӕндӕр вирусимӕ куы абарстой, уӕд ӕрцыдысты ӕндӕр хатдзӕгмӕ. Хъуамӕ коронавирус хӕсджытӕ уой кӕлмытӕ. Низ дунейыл ахӕлиу ис китайаг горӕт Уханӕй. Уым та уыцы рӕстӕг базары уӕй кодтой алыхуызон кӕлмытӕ.

Коронавирус иннӕ низтӕй цӕмӕй хицӕн кӕны, ахӕм ӕууӕлтӕ йын нӕй. Адӕймагыл куы бахӕцы, уӕд хуыфын ӕмӕ ӕхснырсын райдайы, улӕфт ын нал фӕфаг кӕны. Ныртӕккӕ куыд нымайынц, афтӕмӕй йӕ инкубацион рӕстӕг хӕццӕ кӕны дыууӕ бонӕй цыппӕрдӕс бонмӕ. Фӕлӕ уый кӕронбӕттӕн хатдзӕг нӕу. Низы ӕууӕлтӕ раиртасыныл ахуыргӕндтӕ кусынц дарддӕр.

Ног коронавирус ма ‘руадзыны мадзӕлттӕ дӕр сты иннӕ низтӕ ма ‘руадзыны хуызӕн, ӕмӕ сӕ ӕххӕст кӕнын хъӕуы иудадзыгдӕр:

— Уӕ къухтӕ дон ӕмӕ сапонӕй ӕхсут 20 секунды. Уӕ бон пайда кӕнын у дезинфекцигӕнӕн фӕрӕзтӕй.

— Ӕнӕхсад къухтӕй ма ‘вналут уӕ цӕстытӕм, фындзмӕ, дзыхмӕ.

— Чи фӕрынчын, уыдонмӕ хӕстӕг ма цӕут.

— Уӕхӕдӕг куы фӕрынчын уат, уӕд уӕ хӕдзӕрттӕй ӕддӕмӕ ма цӕут, ӕмӕ иннӕты ма фӕрынчын кӕнат.

— Кӕд хуыфут кӕнӕ ӕхснырсут, уӕд уӕхи ӕмбӕрзут къухсӕрфӕнӕй кӕнӕ рӕмбыныкъӕдзӕй, армытъӕпӕнӕй — нӕ.

— Кӕм стут, уым сӕрфут, арӕх цӕмӕ ӕвналут, уыцы бынӕттӕ.

Медицинон маскӕ дарын хъӕуы ӕви нӕ, уыцы фарст бӕлвырд-бӕрӕг нӕу. Адӕймаджы цавӕрфӕнды вирус «ӕрцахсынӕй» дӕр хъахъхъӕны, фӕлӕ йӕ хъӕуы сыгъдӕг дарын, ивын. Ацы мадзӕлттӕ тынг ӕххуыс сты, ӕмӕ сӕ хъӕуы ӕххӕст кӕнын.

Ӕнӕниз ут!

Медицинон профилактикӕйы республикон центр

ОСТАВЬТЕ ОТВЕТ

Please enter your comment!
Please enter your name here