Уӕлахизы майдан — хӕсты ветерантӕн

0
57

Фыдыбӕстӕйы Стыр хӕсты Уӕлахизыл ацы аз ӕххӕст кӕны 75 азы. Уый фӕдыл нӕ бӕстӕйы Президент бафыста Указ, 2020 аз банымайын Уӕлахизы ӕмӕ Намысы азыл. Президенты уынаффӕмӕ гӕсгӕ ма рацыд майдан «Уӕлахизы 75 азы» кадӕн дӕр.

Ацы майданӕй хорзӕхгонд цӕуынц, Фыдыбӕстӕйы Стыр хӕсты ветерантӕ, уыцы уӕззау азты Уӕлахиз хӕстӕгдӕр чи кодта уыцы архайджытӕ, фашисттӕ тыххӕй уацары алы лагерты кӕй дардтой, уыцы ӕнахъомтӕ, Советон ӕфсады национ къордты фашистон лӕгмарты ныхмӕ чи тох кодта, ахӕм ӕндӕрбӕстаг граждӕнтӕ.

Цӕгат Ирыстоны хӕсты ветеранты нымӕц азӕй-азмӕ къаддӕргӕнгӕ цӕуы. Фӕлӕ, абон не ‘хсӕн чи ис, уыдонмӕ нӕ бӕстӕйы ӕмӕ республикӕйы разамындырдыгӕй хорз цӕстдард цӕуы.

Знон РЦИ-Аланийы Сӕргълӕууӕг Битарты Вячеслав юбилейон майдан «Уӕлахизы 75 азы»-йӕ схорзӕхджын кодта, хӕсты цӕхӕры чи уыд, мӕлӕты цӕстытӕм комкоммӕ чи каст ӕмӕ удӕгасӕй чи баззад, уыцы ветеранты: Гулуты Хизиры, Василий Коротаевы, Валентинӕ Майоровайы, Магкӕты Исрафилы, Мамсыраты Исламы, Пагӕты Алыксандры ӕмӕ Арутюн Хачикяны.

Битары-фырт хӕсты ветерантӕй алкӕмӕ дӕр комкоммӕ бацыд ӕмӕ сын райста сӕ къухтӕ. Уый фӕстӕ сын ракодта зӕрдиаг арфӕтӕ:

— Нӕ зынаргъ хистӕртӕ, ветерантӕ! Нӕ бӕстӕйы Президенты бардзырд ӕххӕст кӕнгӕйӕ, сӕрыстыр дӕн, сымахӕй алкӕмӕн дӕр хӕрзиуӕг кӕй дӕттын, уымӕй. Уӕвгӕ, нӕ царды стырдӕр хӕрзиуӕг сымах фыдӕбон уыд. Ӕгъатыр знаджы къӕхты бынмӕ не ‘руагътат нӕ Райгуырӕн бӕстӕ, уе ‘мбӕлтты хӕсты быдырты «таугӕйӕ», уӕддӕр Уӕлахиз уӕ къухы бафтыд, цавӕр аргъӕй, уый нӕ алчидӕр зоны. Сымах хӕстӕн радтат уӕ ӕрыгон азтӕ, уе ‘взонгад, уӕ хъару ӕмӕ тыхтӕ, афтӕмӕй хӕстӕгдӕр кодтат Уӕлахиз. Хӕсты фӕстӕ дӕр уӕ хъӕдгӕмттӕй рыст уӕнгтӕн ӕнцойдзинад нӕ радтат, фӕлӕ ӕнгом ӕрлӕууыдыстут пырх бӕстӕ йӕ къӕхтыл слӕууын кӕнынмӕ. Абон стут нӕ буц хистӕртӕ, уӕддӕр уӕ архайд Фыдыбӕстӕйы хорзӕхӕн нӕ уадзут. Патриотон зондахастыл хъомыл кӕнут фӕзминаг кӕстӕрты, кӕддӕриддӕр стут нӕ фарсмӕ бахъуаджы сахат, ӕмӕ уын — бузныг. Махӕй, республикӕйы хицауадӕй, уӕ фӕрныгадӕн цы аразгӕ у, ууыл архайдзыстӕм ӕппӕт гӕнӕнтӕй дӕр. Чи уӕ цӕмӕй батыхса, табуафси, комкоммӕ мӕм-иу фӕдзурут, — загъта Битарты Вячеслав.

Хӕсты ветерантӕн ма арфӕтӕ ракодта нӕ республикӕйы Ветеранты советы  сӕрдар Къаболаты Солтан дӕр:

— Майы мӕй Уӕлахизы бон уӕ хъуамӕ алчидӕр ӕфсӕддон парадмӕ саккаг кӕна. Ӕнӕ сымахӕй бӕрӕгбон бӕрӕгбоны хуызӕн  нӕ уыдзӕн.

Юбилейон майдантӕй уӕлдай ма ӕппӕт ветерантӕн дӕр радтой лӕвӕрттӕ. Юбилейон майдан нӕ республикӕйы дарддӕр лӕвӕрд цӕудзӕн хӕсты  ветерантӕн ӕмӕ, йӕ категоримӕ чи хауы, уыцы ӕппӕт архайджытӕн.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here