Инвестицион программӕ. Социалон фарстытӕ. Приватизацийы бӕрӕггӕнӕнтӕ

0
50

«Ацы аз республикон нысанмӕ арӕзт инвестицион программӕ царды рауадзынӕн ратдзысты 384,2 милуан сомы. Республикӕйы Хицауады уынаффӕмӕ ныр бахӕсдзыстӕм ивддзинӕдтӕ. Уыдоны фӕрцы ӕхца лӕвӕрд ӕрцӕудзӕн социалон объекттӕн проектон документаци ӕмӕ экспертизӕ скӕнынӕн. Республикон программӕйӕн ис фӕстауӕрцгонд фӕрӕзтӕ. Уыдонӕй сисдзыстӕм хъӕугӕ ӕхца, афтӕмӕй бюджетон инвестициты иумӕйаг бӕрц нӕ фӕфылдӕр уыдзӕн», — знон экономикон рӕзты министры хӕдивӕг Дзоблаты Зураб Хицауады ӕмбырдмӕ рахаста ахсджиаг документ.

Ӕмбырд амыдта Хицауады Сӕрдар Тускъаты Таймураз.

Дзоблайы-фырты ныхасмӕ гӕсгӕ, проектон документаци бацӕттӕ кӕнын хъӕудзӕн паддзахадон архивы, Беслӕны ӕвзонг техникты, натуралистты станцӕты, Черменыхъӕуы скъолайы, Дзӕуджыхъӕуы дыууӕ рӕвдауӕндонмӕ уӕлӕмхасӕн бӕстыхӕйтты ӕмӕ ӕндӕр социалон объектты арӕзтӕдтӕн. Министры хӕдивӕг бацамыдта, алы хицӕн объекты документтӕн, фӕстӕдӕр та экспертизӕ скӕнынӕн цас ӕхца бахъӕудзӕн, уыдӕттӕ. Йе ‘ргом ма аздӕхта национ проект «ӕнӕниздзинад хъахъхъӕнынад»-ы фӕлгӕты 36 фелсырон-акушерон пункты арӕзтады ӕмӕ бындурон рацарӕзты нысантӕм.

Ӕмбырды архайджыты ма базонгӕ кодта иннӕ ахсджиаг бакӕнинаг хъуыддӕгтимӕ дӕр. Нысанмӕ арӕзт программӕйӕн фӕстауӕрцгонд ӕхцайӕ куы сисой, уӕд ма дзы баззайдзӕн 91,3 милуан сомы. Хицауады Сӕрдар Тускъаты Таймураз куыд загъта, афтӕмӕй ацы аз алыхуызон паддзахадон программӕтӕ ӕмӕ национ проектты фӕлгӕты сараздзысты, бындуронӕй рацараздзысты ӕмӕ сцалцӕг кӕндзысты 110 объекты.

Республикон нысанмӕ арӕзт инвестицион программӕ 2020 ӕмӕ 2021-2022 азтӕн фидаргонд ӕрцыд фарон декабры. Уымӕй размӕ министрадтӕ ӕмӕ ведомствӕтӕ барвыстой сӕ фӕндӕттӕ, документимӕ сразы сты муниципалон скондтӕ дӕр. Ацы аз программӕйӕн бахъӕудзӕн 384,2 милуан сомы, 2021 азы — 371 милуан сомы, 2022 азы — 274 милуан сомы. Ӕмбырды архайджытӕ сразы сты ӕппӕт ивддзинӕдтимӕ дӕр.

Фӕллой ӕмӕ социалон рӕзты министр Хуыбиаты Барис цы фарстытыл ӕрдзырдта, уыдонӕн сӕ фылдӕр баст уыдысты 2020 азы сывӕллӕтты фӕлладуадзыны ӕмӕ дзӕбӕх кӕныны нысантимӕ. Уый ранымадта, лӕвар балцӕгтӕ сывӕллӕтты кӕцы категоритӕн дӕтдзысты, сывӕллоны фӕлладуадзыны иу боны хӕрдзтӕ, ӕндӕр ахсджиаг фӕзилӕнтӕ. Хуыбиаты Барис куыд бацамыдта, афтӕмӕй ацы фарстыл ныридӕгӕн куыст цӕуы, ис ведомствӕты ‘хсӕн къамис, йӕ разамонӕг — Хицауады Сӕрдары хӕдивӕг Иринӕ Азимова.

Паддзахадон исбонад ӕмӕ зӕххы ахастдзинӕдты министр Тедеты Руслан ӕмбырдмӕ рахаста ивгъуыд азы приватизацийы бӕрӕггӕнӕнтӕ. Ӕдӕппӕтӕй приватизаци скодтой паддзахадон исбонады 7 ӕнӕзмӕлгӕ объекты ӕмӕ 1 змӕлгӕ объект. Сӕ иумӕйаг аргъ — 8 милуаны ӕмӕ 592 мин сомы. Уымӕй дарддӕр ма Тедейы-фырт фӕбӕрӕг кодта Дзӕуджыхъӕуы бынӕттон хиуынаффӕйады исбонмӕ, горӕты 4 рӕвдауӕндонмӕ (52, 60, 81, 96) цы уӕлӕмхасӕн бӕстыхӕйттӕ бафтыдтой, уыдон радтыны фарстытӕ. Ноджыдӕр ма иу объект — Беслӕны фыдбӕллӕхы хъыгдардбаййафӕг адӕмӕн цы хӕдзар аразын райдайдзысты, уымӕн йӕ коммуналон инфраструктурӕ у цӕттӕ, уымӕ гӕсгӕ йӕ паддзахадон исбонӕй дӕттынц Дзӕуджыхъӕуы исбонмӕ.

Хъӕууон хӕдзарад ӕмӕ хойраджы министр Уазиты Хъазыбег ӕмбырды куыд радзырдта, афтӕмӕй хъӕууон цӕрӕн бынӕтты рӕзтимӕ баст программӕтӕм гӕсгӕ хъуамӕ бындуронӕй рацаразой Хъӕдгӕроны, Джызӕлы, Ногиры, Уӕллаг ӕмӕ Дӕллаг Санибайы доны хызтӕ. Ӕдӕппӕтӕй сын бахъӕудзӕн 427 милуан сомы. Уымӕ гӕсгӕ сын хъуамӕ ӕмбӕлгӕ бюджетон ӕхца афойнадыл радих кӕной.

Ӕмбырды ма равзӕрстой ӕндӕр ахсджиаг фарстытӕ дӕр.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here