Кусын райдыдта Зӕрӕмӕджы ГЭС-ы 1 хай

0
63

4 февралы Цӕгат Ирыстоны кусын райдыдта Зӕрӕмӕджы ГЭС-ы 1 хай. Йӕ хъомысмӕ гӕсгӕ Цӕгат Кавказы ахсы ӕртыккаг бынат, нӕ республикӕйы та у ӕппӕты егъаудӕр ГЭС.

Йӕ гом кӕныны кадджын мадзалы архайдтой УФ-йы Хицауады Сӕрдары хӕдивӕг Юрий Борисов, УФ-йы энергетикӕйы министр Александр Новак, РусГидройы генералон директор — правленийы сӕрдар Николай Шульгинов ӕмӕ Республикӕ Цӕгат Ирыстон-Аланийы Сӕргълӕууӕг Битарты Вячеслав.

Цӕгат Ирыстоны Зӕрӕмӕджы ГЭС саразыны хъуыды фӕзынд 1976 азы. Йӕ саразынмӕ дӕр ын уӕд бавнӕлдтой, фӕлӕ, Советон паддзахад куы фехӕлд, уӕд бирӕ къуылымпыдзинӕдтӕ баййӕфта. Нал уыдис финансон фӕрӕзтӕ куыстытӕ дарддӕр ахӕццӕ кӕнынӕн.

Зӕрӕмӕджы ГЭС-ы 1 хай арӕзт ӕрцыд ӕрыдоны доныл. Йӕ хъомыс у 346 МВт, сахатмӕ электрон тых дӕтдзӕн 842 млн кВт.

ГЭС-ы 1 хайы ӕвӕрд ӕрцыд дыууӕ гидроагрегаты, алкӕмӕн дӕр дзы йӕ хъомыс у 173 МВт.

Зӕрӕмӕджы ГЭС Цӕгат Ирыстоны зӕххыл у ӕппӕты егъаудӕр инвестицион проект. Цӕгат Кавказы та нымад у тӕккӕ стырдӕр арӕзтадон комплексыл. Техникон бӕрӕггӕнӕнтӕм гӕсгӕ йын Уӕрӕсейы дӕр ӕмбал нӕй. Зӕххы бын йӕ дӕргъ у 20 километрӕй фылдӕр. Уымӕй уӕлдай ма у Уӕрӕсейы ӕппӕты бӕрзонддӕр донӕфсӕрӕн бынат (619) ӕппӕты стырдӕр турбинӕтимӕ.

Зӕрӕмӕджы ГЭС-ӕн йӕ фадӕттӕ амонынц йӕ хъомыс ивын, уымӕ гӕсгӕ йӕ бон уыдзӕн республикӕйы энергосистемӕмӕ фаг электрон тых дӕттын.

РусГидройы генералон директор — правленийы сӕрдар Николай Шульгинов куыд зӕгъы, афтӕмӕй Зӕрӕмӕджы ГЭС-ы 1 хай фӕахъаз уыдзӕн Цӕгат Ирыстоны ӕмӕ ӕппӕт регионы энергетикӕйӕн, зынгӕ фӕбӕрзонддӕр уыдзӕн йӕ хъомыс.

Нӕ республикӕйы Сӕргълӕууӕг арфӕ ракодта бӕрӕгбоны уазджытӕн ӕмӕ, ГЭС-ы 1 хай саразыныл чидӕриддӕр бафыдӕбон кодта, уыдонӕн.

— Ацы ГЭС-ы ахадындзинад стыр у. Нӕ республикӕйы ӕмӕ ӕппӕт регионы дӕр электрон тых фаг куы нӕ уа, уӕд хъомысджын экономикӕ саразӕн нӕй. Алы инвестор дӕр ӕрбацӕуыны размӕ базонгӕ вӕййы электрон ресурсты уавӕримӕ. Зӕрӕмӕджы ГЭС-ы 1 хай нын дӕтты ахӕм фадат, ӕмӕ нӕ республикӕйы экономикӕ сифтонг кӕндзӕн хъӕугӕ электрон тыхӕй. Уымӕ гӕсгӕ нӕ зӕрдӕ дардзыстӕм Зӕрӕмӕг-2 саразыныл дӕр. Уый нын фадат ратдзӕн республикӕйы экономикӕ электрон тыхӕй 100 % онг сифтонг кӕнынӕн, — загъта Битарты Вячеслав.

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here