Уыдзӕн нӕм нӕхи гагаринтӕ

0
249

Дыууӕ азы дӕргъы Ирыстоны цӕрджытӕ стыр ӕхсызгонӕй цы хъуыддагмӕ кастысты, уый ныл ӕрцыд — Дзӕуджыхъӕуы йӕ дуӕрттӕ байгом кодта, специалистты ныхасмӕ гӕсгӕ, ӕппӕт Уӕрӕсейы дӕр ӕмбал кӕмӕн нӕй, космонавтикӕйы ахӕм скъола, йӕ фарсмӕ та — планетарий. Уӕлӕмхасӕн ахуырады системӕйы дыккаг ахӕм скъола нӕй. Нырӕй фӕстӕмӕ ацы ран ахуыр ӕмӕ цӕттӕ кӕндзысты космосмӕ зӕрдӕргъӕвд лӕппутӕ ӕмӕ чызджыты.

Цӕмӕй ахуырдзаутӕ космосы сусӕгдзинӕдтӕ базоной, ууыл удуӕлдай куыст бакодта нӕ зындгонд ӕмзӕххон, космосы аппараттӕ аразӕг, конструктор, ССР Цӕдисы Паддзахадон премийы лауреат Къомайты Руслан. Цалынмӕ планетарийы цалцӕггӕнӕн ӕмӕ арӕзтадон куыстытӕ цыдысты, уӕдмӕ Русланӕн йӕ цуры кӕддӕриддӕр уыд ӕмӕ йын зӕрдиаг ӕххуыс кодта республикӕйы Сӕргълӕууӕг Битарты Вячеслав.

Космонавтикӕйы скъола гом кӕныны бӕрӕгбонмӕ Мӕскуыйӕ Дзӕуджыхъӕумӕ ссыдысты кадджын уазджытӕ — ССР Цӕдисы дыууӕ хатты Хъӕбатыр, космонавт Владимир Джанибеков ӕмӕ УФ-йы Хъӕбатыр, космонавт Александр Лазуткин.

Бӕрӕгбонмӕ ӕрбацӕуӕг адӕмӕн арфӕ кӕнгӕйӕ, Битарты Вячеслав загъта:

— Абон кадджын ӕмӕ зӕрдылдарӕн бон у канд Ирыстонӕн нӕ, фӕлӕ ӕппӕт Цӕгат Кавказӕн дӕр — Дзӕуджыхъӕуы фӕзынд космонавтикӕйы нырыккон скъола, ӕмӕ, йӕ цард космосимӕ сбӕттын кӕй бафӕнда, цъӕх арв ӕмӕ стъалытӕ йӕ фыны дӕр чи уыны, уыцы ӕрыгон чызджытӕ ӕмӕ лӕппутӕн фӕзынд сӕ фӕндтӕ царды рауадзынӕн замманай гӕнӕн. Космонавтикӕйы скъолайы ахуыр кӕнын сӕ бон уыдзӕн канд цӕгатирыстойнаг сывӕллӕттӕн нӕ, фӕлӕ Цӕгат Кавказы иннӕ республикӕты сывӕллӕттӕн дӕр. Ахӕм скъола нӕм цӕмӕй уа, уыцы хорз фӕнд рацыд нӕ хъуыстгонд ӕмзӕххон Къомайты Русланӕй. Проект кӕрӕй-кӕронмӕ ӕххӕстгӕнӕг дӕр уыд йӕхӕдӕг. Уыд ын ӕххуысгӕнджытӕ, кӕй зӕгъын ӕй хъӕуы, фӕлӕ Русланмӕ ацы хорз фӕндон куы нӕ разындаид ӕмӕ йӕ сӕххӕст кӕныныл ахӕм удуӕлдай куыст куы нӕ бакодтаид, уӕд хъуыддагӕй ницы рауадаид. Ӕмӕ, мӕнмӕ гӕсгӕ, скъола йӕ ном куы хӕсса, уӕд уый уыдзӕн раст. Арфӕ кӕнын нӕ мӕскуыйаг уазджытӕн, нӕ бӕрӕгбонмӕ нӕм кӕй ссыдысты ӕмӕ немӕ кӕй цин кӕнынц, уый тыххӕй, стӕй, ацы проект сӕххӕст кӕныныл чидӕриддӕр бафыдӕбон кодта, уыдонӕн се ‘ппӕтӕн дӕр. Уырны мӕ, планетарий нӕ горӕты цӕрджытӕн сӕ уарзондӕр бынӕттӕй иу кӕй суыдзӕн, уый. Рӕствӕндаг уӕд космонавтикӕйы скъола!

Космонавтикӕйы скъола Дзӕуджыхъӕуы кӕй фӕзынд, уый фӕдыл Ирыстоны цӕрджытӕн арфӕ ракодтой мӕскуыйаг уазджытӕ дӕр — Владимир Джанибеков ӕмӕ Александр Лазуткин. Дыккаг ӕрымысыд йӕ сабибонтӕ, йӕ ныййарджытӕ йӕ фыццаг хатт Мӕскуыйы планетаримӕ кӕй акодтой, ӕмӕ уый фӕстӕ гыццыл лӕппуйы зӕрдӕйы космосмӕ уарзондзинад кӕй фӕзынд, уый, ӕмӕ загъта:

— Сывӕллонмӕ бӕллиц куы уа, уӕд уымӕй хуыздӕр ницы ис, уыцы цӕстӕй акӕсгӕйӕ, ацы скъолайӕн аргъ нӕй.

Александр Лазуткин фехъусын кодта: скъола ис Уӕрӕсейы Космосы агентады бӕрны, ӕмӕ йӕм уый йӕ цӕст дардзӕн.

Къомайты Руслан куыд загъта, афтӕмӕй скъола байгом кӕныны цау у йӕ царды бонтӕн сӕ амондджындӕртӕй иу. Ӕмӕ куыннӕ! Мӕскуыйы йӕ куыст ныууадзгӕйӕ, дыууӕ азы дӕргъы, ӕхсӕв-бон нӕ нымайгӕйӕ, ӕнӕсцухӕй уыд аразджытӕн сӕ уӕлхъус ӕмӕ иунӕг куыст дӕр къуылымпы кӕнын нӕ бауагъта.

— Сывӕллӕттӕн космосы сусӕгдзинӕдтӕ амонын ӕмӕ сын сӕ зонындзинӕдтӕ фылдӕр кӕнын уыд мӕ рагон бӕллиц, ӕмӕ, абон кӕй сӕххӕст, уымӕй дӕн стыр амондджын. Хъуыддаг къухы нӕ бафтыдаид, республикӕйы разамынды ‘рдыгӕй мын зӕрдиаг ӕххуыстгӕнджытӕ куы нӕ уыдаид, уӕд. Скъола арӕзт кӕй ӕрцыд, ууыл республикон бюджетӕй иунӕг сом дӕр хардзгонд не ‘рцыд. Цыдӕриддӕр куыстытӕ бахъуыд, уыдонӕн сӕ 80 проценты ӕххӕстгонд ӕрцыдысты Битарты Вячеславӕн йӕхи хардзӕй, ӕмӕ йын зӕгъын стыр бузныг, — арфӕ кӕнгӕйӕ дзырдта Къомайты Руслан.

Космонавтикӕйы скъола нӕм цӕмӕй фӕзына, уымӕн республикӕйы Сӕргълӕууӕгӕй уӕлдай зӕрдиаг ӕххуыс бакодтой иннӕ бӕрнон адӕймӕгтӕ: РЦИ-Аланийы Парламенты Сӕрдары хӕдивӕг Билаонты Батрадз, Дзӕуджыхъӕуы муниципалон сконды сӕргълӕууӕг, горӕты минӕвӕртты ӕмбырды сӕрдар Икъаты Русланбег, Дзӕуджыхъӕуы бынӕттон хиуынаффӕйады сӕрдар Фӕрниаты Тамерлан, хӕххон-металлургон техникумы директор Бирӕгъты Давид, арӕзтадон техникумы директор Гуыриаты Георги, хӕххон-металлургон институты арӕзтадон факультеты декан Дзанайты Махарбег, Нывкӕнынады училищӕйы директор Фидараты Фидар, амалхъом адӕймӕгтӕ Дедегкаты Виктор, Хъыргъуты Алан ӕмӕ иннӕтӕ.

Нӕ зындгонд ӕмзӕххон ӕмӕ конструктор куыд зӕгъы, афтӕмӕй ахуырдзауты ‘рдыгӕй скъоламӕ уыдзӕн стыр цымыдисад, уый тыххӕй дзы ис алцыдӕр.

— Скъолайы мах сарӕзтам Хуры системӕйы макет, хуры цыдмӕ гӕсгӕ дзӕуджыхъӕуккаг рӕстӕг чи ӕвдисы, ахӕм сахат. Йӕ диаметр 7,5 метры кӕмӕн у, уыцы куполыл проекторы фӕрцы ӕвдыст цӕудзысты космосы темӕимӕ баст кинонывтӕ. Иннӕ проекторӕн йӕ формат у 3D, ацы технологийы фӕрцы уый ӕвдисы стъалытимӕ арв, — зӕгъы Къомайты Руслан.

Космонавтикӕйы скъолайы ӕвӕрд ӕрцыдысты космосы техникӕйы макеттӕ, уыимӕ, Къомайты Руслан йӕхи къухтӕй кӕй скодта, ахӕмтӕ дӕр. Уыдоныл ахуыр кӕндзысты космосмӕ зӕрдӕргъӕвд ахуырдзауты.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here