Ӕнӕ фыдӕбонӕй уӕлахиз нӕ вӕййы

0
19

Физкультурӕ ӕмӕ спорт нӕ рӕстӕджы ахсджиаг  кӕй сты, ууыл абон дызӕрдыг ничиуал кӕны. Спортивон ӕнтыстдзинӕдтӕ арӕх дзурӕг вӕййынц ӕнӕхъӕн бӕстӕты  цардхъомысыл. Уымӕ гӕсгӕ зӕххы къорийы алы кӕрӕтты минӕвӕрттӕ фӕтырнынц сӕхи дунеон ерысты ӕнтыстджынӕй равдисынмӕ ӕмӕ уымӕй сӕ бӕстӕтӕм ӕндӕр адӕмты ӕргом раздахынмӕ. Ахӕм тырнындзинад вӕййы хицӕн бӕстӕты горӕтты, облӕстты, республикӕты минӕвӕрттӕм дӕр. Уымӕ гӕсгӕ спортивон ерыстӕ свӕйынц цымыдисаг милуангай адӕмтӕн.

Цӕмӕй спорты дӕ къухы стыр ӕнтыстытӕ бафта, уый тыххӕй та  хъӕуы стыр ӕмӕ бындурон куыст кӕнын. Цӕгат Ирыстон ивгъуыд ӕнусы ӕмбисӕй фӕстӕмӕ уыцы хъуыддаджы нымад  у, нӕ бӕстӕйы спортивон куыст хуыздӕр ӕвӕрд кӕм у, уыдоныл. Уымӕн ӕвдисӕн сты нӕ ӕвзыгъд лӕппутӕ ӕмӕ чызджыты стыр ӕнтыстдзинӕдтӕ дунейы ӕппӕты бӕрнондӕр ерысты. Нӕ фӕсивӕды спортивон ӕнтыстдзинӕдтӕ ӕрвылаз фылдӕрӕй-фылдӕр кӕй кӕнынц, уый дызӕрдыггаг нӕу, фӕлӕ рӕстӕг куыд цӕуы, афтӕ йӕхи домӕнтӕ кӕны ӕмӕ абоны уӕлахизы фӕстӕ хи цӕттӕ кӕнын фӕхъӕуы райсомы фӕлварӕнмӕ.

Ӕппӕт уыдӕттыл  ныхас уыди РЦИ-Аланийы физкультурӕ ӕмӕ спорты министр, Олимпаг хъӕзтыты уӕлахиздзау Хуыгаты Аланимӕ.

— Нӕ республикӕйы ивгъуыд азы спортивон цардӕн цавӕр аргъ скӕнӕн ис?

— Ирыстон хъуыстгонд у, куыд спортивон республикӕ, афтӕ  ӕмӕ махӕн уыцы кадджын ном дӕлдӕр ӕруадзӕн нӕй. Ивгъуыд аз мах нӕ размӕ ӕвӕрдтам ахӕм хӕс: алы ерысты дӕр раззагдӕртимӕ уӕвын. Кӕй зӕгъын ӕй хъӕуы, алы хатт фыццаг уӕвын спорты бирӕ хуызты никӕмӕн ма бантыст, фӕлӕ, ӕмткӕй райсгӕйӕ, не спортсментӕ афӕдзы дӕргъы цы бирӕ ерысты архайдтой, уым рамбылдтой сӕдӕгай хӕрзиуджытӕ. Олимпаг хъӕзтыты программӕмӕ чи хауы, уыцы спорты хуызтӕй дунеон ӕмӕ европӕйаг чемпионатты ӕмӕ ӕндӕр бӕрнон ерысты Ирыстоны спортсментӕ  рамбылдтой 72 сыгъзӕрин хӕрзиуӕджы! Стыр ӕнтыстытӕ сӕ къухы бафтыд нӕ фӕсивӕдӕн, Олимпаг хъӕзтыты программӕмӕ чи нӕ хауы, уыцы спорты хуызтӕй дунеон ӕмӕ Европӕйы чемпионатты архайгӕйӕ. Уӕдӕ цы зӕгъӕн ис, се ‘нӕниздзинад хъыгдард кӕмӕн у, уыцы спортсментӕ Уӕрӕсейы, Европӕйы ӕмӕ дунеон чемпионатты сӕхи куыд сӕрӕнӕй равдыстой, уымӕй та? ӕрмӕст сыгъзӕрин майдантӕ  рамбылдтой 37! Не спортсментӕ афӕдзы дӕргъы Уӕрӕсейы, Европӕйы ӕмӕ дунейы алы рӕтты бӕрнондӕр ерысты цы хӕрзиуджытӕ рамбылдтой, уыдоны нымӕц ӕдӕппӕтӕй мины ‘рдӕгмӕ хӕццӕ кӕны.

Зӕгъын хъӕуы, ивгъуыд аз Ирыстоны къорд бӕрнон спортивон ерыстӕ кӕй ацыди, уый дӕр. Сӕ сӕйрагдӕртӕ уыдысты: Европӕйы чемпионат боксӕй 19-22 азы карӕн фӕсивӕды ‘хсӕн, Уӕрӕсейы чемпионат уӕгъдибар хъӕбысхӕстӕй фӕсивӕды (21 азы карӕнты) ‘хсӕн, Цӕгат Кавказы федералон зылды чемпионат шахмӕттӕй, Уӕрӕсейы фыццаг бынат бацахсыныл ерыстӕ теннисӕй ӕрыгӕтты ‘хсӕн, Уӕрӕсейы чемпионат мини-гольфӕй, ӕппӕтуӕрӕсеон турнир армрестлингӕй, Гусаты Юрийы ӕппӕтуӕрӕсеон  номарӕн турнир уӕгъдибар хъӕбысхӕстӕй, каратэйӕ Цӕгат Кавказы федералон зылды чемпионат, уӕгъдибар хъӕбысхӕстӕй Андиаты Сосланы номарӕн ӕппӕтуӕрӕсеон турнир, уӕгъдибар хъӕбысхӕстӕй  дунеон турнир «Алантӕ». Турнир «Алантӕ»-йӕн  азӕй-азмӕ йӕ кад кӕны уӕлдӕр. Нӕ зӕрды ис бацархайын, цӕмӕй ӕрлӕууа «Гран-при»-йы фарсмӕ.

Ног азы нӕ хъуыдытӕ баст сты Олимпаг хъӕзтытимӕ. Фӕнды нӕ, цӕмӕй нӕ бӕстӕйы Олимпаг командӕмӕ, куыд гӕнӕн ис, афтӕ фылдӕр ирыстойнаг спортсментӕ бахауа. Уыцы хъуыддаджы нын фыццаг ӕхсызгон хабар балӕвар кодтой нӕ уӕгъдибар хъӕбысӕйхӕцджытӕ. Уыдон Красноярскы дунеон турнир Гран-при «Иван Ярыгин»-ы сӕхи куыд хъомысджынӕй равдыстой, уый нын ныфс дӕтты, ацы аз сын бирӕ кӕй бантыстдзӕн, уымӕй. Нӕ лӕппутӕ Красноярскы хӕстӕг уыдысты ӕхсӕз сыгъзӕрин майданы рамбулынмӕ, фӕлӕ цыппарӕй кӕй систы  уӕлахиздзаутӕ, уый дӕр стыр ӕнтыстдзинад у.

Уӕгъдибар хъӕбысхӕстӕй уӕлдай Олимпаг хъӕзтытӕм балцӕгтӕ райсынмӕ нӕ зӕрдӕ дарӕм нӕ дзюдоисттыл, барджытыл, уӕззау атлеттыл ӕмӕ ма цалдӕр спорты хуызты минӕвӕрттыл. Не спортсментӕй Олимпаг хъӕзтытӕм балцӕгтӕ райсынмӕ чи тырны, уыдонӕн мах аразӕм ӕппӕт уавӕртӕ дӕр. Уӕрӕсейы командӕйы йӕхи тырысаимӕ куы нӕ бауадзой Олимпаг хъӕзтытӕм, уӕддӕр не спортсментӕ хъуамӕ цӕттӕ уой ӕппӕты бӕрзонддӕр бынӕттыл тох кӕнынмӕ. Кӕй зӕгъын ӕй хъӕуы, нӕ иннӕ спорты хуызтӕн дӕр мах хъуамӕ ӕххуыс кӕнӕм, нӕ гӕнӕнтӕ куыд амонынц, уый бӕрц.

— Футболуарзджытӕ тынг цымыдисӕй ӕнхъӕлмӕ кӕсынц нӕ командӕ «Алани» ацы аз 1-аг къордмӕ рацӕудзӕн ӕви нӕ, уымӕ. Куыд дӕм кӕсы, уыцы хорз хабар ацы аз ӕрцӕудзӕни?

— Спорты  алцыдӕр ӕрцӕуы, фӕлӕ абон нӕ футболон командӕимӕ цы куыст цӕуы, уый ныфс дӕтты, нӕ нысан нӕ къухы кӕй бафтдзӕн, уымӕй. Командӕимӕ кусынц ӕцӕг профессионалтӕ ӕмӕ ныридӕгӕн сӕ къухы гыццыл нӕ бафтыд. ФК «Алани»-йы сӕргълӕуджытӕ бавнӕлдтой дысвӕлдӕхтӕй ӕппӕт уавӕртӕ саразынмӕ, цӕмӕй нӕ командӕ йӕ кӕддӕры кадджын бынатмӕ схиза, уымӕн. Уырны нӕ, уыцы зӕрдиаг куыст дзӕгъӕлы кӕй нӕ уыдзӕн, уый. Клубы сӕргълӕуджытӕ бавнӕлдтой нӕ командӕйӕн йӕхи цӕттӕ кӕнынӕн, абоны домӕнтӕм гӕсгӕ ӕппӕт уавӕртӕ кӕм уыдзӕн, ахӕм бынат саразынмӕ. Уӕдӕ иннӕ хорз  хъуыддаг та уыдзӕн, нӕ сӕйраг стадион  ногӕй арӕзт кӕй ӕрцӕудзӕн, уый. Ахӕм фадат фӕзынд нӕ республикӕйы Сӕргълӕууӕг Битарты Вячеслав Уӕрӕсейы Президент Владимир Путинимӕ фембӕлды ацы фарст кӕй рахаста, уый фӕрцы. Стадионы рацарӕзты куыстытӕ райдайдзысты ацы бонты.

Футболы райрӕзтыл дзургӕйӕ, ӕнӕзӕгъгӕ нӕй нӕ иннӕ фӕндоны тыххӕй дӕр. Куыст цӕуы футболы академи саразыныл. Уый уыдзӕн, ӕппӕт уавӕртӕ дӕр кӕм уыдзӕн нӕ курдиатджын кӕстӕртӕн, ахӕм бынат. Хъуамӕ уым нӕ сывӕллӕттӕ ӕдыхстӕй цӕрой ӕмӕ сӕхиуыл кусой. Абон махмӕ уӕгъдибар хъӕбысхӕстӕй ис Хӕдарцаты ӕфсымӕрты академи ӕмӕ Таймазты ӕфсымӕрты сӕрмагонд скъола. Ныридӕгӕн уыдоны куыст тынг феххуыс нӕ фӕсивӕды рӕзтӕн ӕмӕ хъуамӕ футболы академийы ахадындзинад дӕр уыдонау фӕзына нӕ футболистты дӕсныдзинадыл. Мах фӕнды, цӕмӕй нӕ академиты цы кӕстӕртӕ уыдзӕн, уыдон скъолайы сӕ ахуырӕй дӕр фӕстӕзад ма уой, ӕмӕ сӕ домдзыстӕм, цӕмӕй футболӕй хъазынӕй уӕлдай ахуырмӕ дӕр се ‘ргом зӕрдиагӕй здахой. Уый хауы нӕ хъӕбысхӕсты академиты ахуырдзаутӕм дӕр.

Нӕ иннӕ фӕнд та у,  сывӕллӕттимӕ чи кусы, уыцы тренертӕ дӕр сӕ зонындзинӕдтӕ фылдӕр кӕныныл куыд архайой, ахӕм уавӕртӕ сын скӕнын. Тренер хъуамӕ уа зонынджын ахуыргӕнӕг. Советон рӕстӕджы-иу тренертӕ, сӕ хъомылгӕнинӕгтӕй скъолайы ахуырӕй чи фӕкъуылымпы ис, уыдоны тренировкӕтӕй уӕгъд кодтой ӕмӕ сын уый уыд ӕфхӕрдау.

— Алан, мах зонӕм нӕ республикӕйы а фӕстаг азты арӕзт цӕуынц, физкультурӕ ӕмӕ спортӕй кӕм архайой, ахӕм фӕзтӕ, фӕлӕ уӕддӕр нырма нӕ районтӕн сӕ фылдӕры ӕмбӕлгӕ уавӕртӕ нӕ фаг кӕны. Уый тыххӕй цавӕр куыст цӕудзӕн?

— Раст зӕгъыс, кӕнгӕ дӕр гыццыл не скодтам, фӕлӕ нӕм нырма ис тынг фӕкӕсынхъуаг  хъӕутӕ. Зӕгъӕм, ӕрыдоны абоны онг нӕй  спортивон комплекс. Нӕй дзы хъӕбысӕйхӕцӕн зал дӕр. Уый тыххӕй ныртӕккӕ мах кусӕм, спорты цалдӕр хуызӕй уыцы-иу рӕстӕг архайӕн кӕм уа, ахӕм спортивон комплексты проект саразыныл. Уый у тынг хъӕугӕ хъуыддаг. Нӕ иннӕ фӕнд та у, ленк кӕнӕн кӕм уа, ахӕм цалдӕр бассейны саразын. Уыцы хъуыды сӕххӕст кӕнын нӕ зӕрды ис 2022 азмӕ. Фарон ӕмӕ ӕндӕраз нӕ республикӕйы цалдӕр раны арӕзт ӕрцыдысты 16 бирӕвӕрсыг спортивон фӕзы. Уым алкӕй бон дӕр у йӕ физикон цӕттӕдзинад фӕхуыздӕр кӕныныл кӕдфӕнды дӕр бакусын. Ахӕм фӕзтӕ ма ацы аз дӕр байгом кӕнынмӕ хъавӕм цыппӕрдӕс. Дзыллон физикон культурӕ у стыр спорты бындур ӕмӕ ууыл узӕлын нӕ зӕрды ис дарддӕр дӕр. Ацы хъуыддаджы нын ӕххуысгӕнӕг сты нӕ республикӕйы Сӕргълӕууӕг ӕмӕ Хицауад дӕр. Нӕ  иумӕйаг хӕс у нӕ адӕмы ӕнӕниздзинад фидар кӕнын ӕмӕ уыцы хъуыддаджы мах хъуамӕ ӕмзондӕй архайӕм.

Ӕрмӕг бацӕттӕ кодта Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here