Цӕмӕн афтӕ рауад?

0
250

Фарон декабры  РЦИ-Аланийы ахуырад ӕмӕ наукӕйы министр Людмилӕ Башарина Хицауады ӕмбырды фехъусын кодта, ног, 2020 азӕй нӕ республикӕйы астӕуккаг скъолаты ӕмӕ училищӕты ахуыргӕнджытӕн сӕ мызды бӕрц кӕй сырӕздзӕн, уый тыххӕй. Цалдӕр боны размӕ Ирыстоны ахуыргӕнджытӕ райстой ног азы райдайӕны мызд ӕмӕ дзы разыйӕ нӕ баззадысты. Ивгъуыд азимӕ абаргӕйӕ, бирӕтӕн сӕ мызд фӕкъаддӕр. Ахуыргӕнджытӕ домынц, митингтӕ аразынц, цӕмӕй сын бамбарын кӕной бӕлвырд, цӕимӕ баст сты уыцы ивддзинӕдтӕ, уый.

Знон Людмилӕ Башарина сарӕзта пресс-конференци ӕмӕ уым  биноныг дзуаппытӕ радта журналисттӕн. Дзыллон хабархӕссӕг фӕрӕзты кусджытӕ министры бафарстой, уавӕр афтӕ цӕмӕн рауадис, уымӕй.

— Нӕ республикӕйы Сӕргълӕууӕг Битарты Вячеслав нӕ министрады раз сӕвӕрдта хӕс — уыцы ӕхца цыфӕндыйӕ дӕр ссарын. Фӕстаг рӕстӕг Битарты Вячеслав цы ӕмбырдты фембӕлы адӕмимӕ, уырдӕм, кӕй зӕгъын ӕй хъӕуы, ацӕуӕм мах дӕр. Ӕмӕ уым бирӕ ахуыргӕнджытӕ хъаст фӕкӕнынц, сӕ  мызды бӕрц ныллӕг кӕй у, уымӕй. Республикӕйы бюджетӕй дихгонд ӕрцыд 300 милуан сомы ахуыргӕнджыты мыздыл бафтауынӕн. Фарон ахуыргӕнджыты мызд уыдис 7,5 мин сомы, фӕлӕ ма сын фыст цыдис уӕлӕфтуантӕ  ӕмӕ, стимулирующийтӕ кӕй хонынц, ахӕм фиддонтӕ. Ацы аз январӕй фӕстӕмӕ,  7,5 мин сомы чи иста, уыцы ахуыргӕнджыты мызд сырӕзт 13.800 соммӕ. Ацы уавӕры аххосаг абон сты стимулирующийтӕ. Министрад сӕ нӕ фиды, фӕлӕ скъолаты разамонджытӕ. Стимулирующийтӕм гӕсгӕ бирӕ азты дӕргъы фыст цӕуы фӕллойадон системӕ. Уыдис ӕмӕ ныр дӕр ис, ацы ӕгъдау чи халы, стимулирующийтӕ раст уагыл фыст кӕм нӕ цӕуынц, ахӕм ахуырадон куыстуӕттӕ. 300 милуан сомы куы райстам, уӕд аивтам фӕллойадон мызд фидыны системӕ.

7,5 мин сомӕй куы ныууагътаиккам мызды бӕрц ӕмӕ стимулирующийтыл куы бафтыдтаиккам, уӕд ницы аивтаид ахуыргӕнджыты мызды. Фылдӕр стаж ӕмӕ фылдӕр стимулирующийтӕ уӕлӕфтуантимӕ  чи иста, уый та ацы хатт афтӕ истаид, ӕрыгон ахуыргӕнджытӕ та авд миныл баззадаиккой. Уӕлӕфтуан фиддонтӕ ацы аз фыст нал цӕудзысты кабинеттыл дзуапп дӕттыны тыххӕй, куысты стаж ӕмӕ методиугонды куысты тыххӕй. Хӕххон ӕмӕ хъӕууон ахуыргӕнджытӕй фӕстӕмӕ. Стаж бирӕ кӕмӕ ис, уыцы ахуыргӕнджытӕ разы не сты сӕ мыздӕй. Хъаст кӕнынц, райдайгӕ ӕрыгон ахуыргӕнджыты ӕмрӕнхъ сӕ кӕй банымадтам, уымӕй.

Стаж дӕр, кабинет дӕр ӕмӕ методиугонды куыстӕн уӕлӕфтуан фыст цыдис 2 мин сомы. Уыцы дыууӕ мины мах бынтон нӕ айстам, фӕлӕ сӕ бафтыдтам иумӕйаг мыздмӕ. Стажы тыххӕй дӕр зӕгъдзынӕн афтӕ. Бирӕ азты чи кусы, фӕлӕ йӕ куысты бӕрӕггӕнӕнтӕ ӕххӕст кӕмӕн не сты, уыцы ахуыргӕнӕджы куыд ис абарӕн, регионалон конкурстӕ ӕмӕ олимпиадӕты раззагдӕр бынӕттӕ чи бацахсы, уыцы ӕрыгон специалистимӕ? Кабинетыл дзуапп чи лӕвӕрдта, уыцы ахуыргӕнджытӕ уӕлӕфтуан фиддон истой, кабинет скъолайы ӕхсӕнадон царды уӕлдай функцитӕ куы ӕххӕст кодта, уӕд. Фароны онг фыстой ӕхца ахуыргӕнӕгӕн, кабинет ахъаз у, нӕу, уӕддӕр. Фӕлӕ ацы азӕй фӕстӕмӕ стажӕн ӕмӕ хицӕн кабинетӕн уӕлӕфтуан фиддонтӕ фыст нал цӕудзӕн. Мах хъӕуы бӕрӕггӕнӕн. Хорз куысты бӕрӕггӕнӕнтӕ та кӕддӕриддӕр нымайдзыстӕм. Ацы фарстытыл куы куыстам, уӕд ӕмбӕрстам, бирӕ ахуыргӕнджыты мыздыл кӕй фӕбӕрӕг уыдзӕн, уый. Раздӕр се ‘ппӕтӕн дӕр уӕлӕфтуан фиддонтӕ цыдис, ныр та нымад цӕудзысты ахуыргӕнӕджы бӕрӕггӕнӕнтӕм гӕсгӕ. Къласӕн разамынд чи дӕтты, уыдонӕн баззад сӕ уӕлӕфтуан — 2 мин сомы. Фӕлӕ ма сыл ацы аз бафтдзӕнис ноджыдӕр 5 мины федералон бюджетӕй.Стимулирующийтӕ  фиды скъолайы директор. Директоры хӕс у, кӕцы ахуыргӕнӕгӕн цас хъӕуы бафидын, уый зонын. Министрад та ахуыргӕнӕджы мыздӕй айста стаж ӕмӕ хицӕн кабинеттыл фиддонтӕ.

Январы мыздӕй разы кӕй не сты, уым бирӕ аххосӕгтӕ ис. Чи зоны, скъолайы бухгалтеры рӕдыд уыдис, кӕнӕ та ӕндӕр аххосаг, мах ӕй нӕ зонӕм. Фӕлӕ нӕм ис ахуыргӕнджыты куысты фӕдыл дӕр бухгалтери, бӕрӕггӕнӕнтӕ. Мах цӕттӕ стӕм скъолатӕм ацӕуынмӕ ӕмӕ хъуыддаг уым равзарынмӕ. Иутӕн фылдӕр фӕци сӕ мызд, иннӕтӕн та — къаддӕр. Цӕмӕн рауад афтӕ?

Кӕй фӕнды базонын хабӕрттӕ бӕлвырддӕр, уыцы ахуыргӕнджытӕ, табуафси, ӕрбадзурӕнт министрадмӕ мӕнӕ ацы телефонӕй: 29-15-15. Алкӕмӕн дӕр дзуапп ратдзыстӕм. Зӕгъын ма мӕ фӕнды иу хъуыддаджы тыххӕй: кадджын нӕмттӕ лӕвӕрд цы ахуыргӕнджытӕн  ӕрцыдис, уыдоны уӕлӕфтуан фиддонтӕ дӕр ӕнӕивдӕй баззадысты, — загъта министр.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here