Конкурсы уӕлахиздзаутӕ

0
112

Цӕгат Ирыстоны паддзахадон университеты фармацийы кафедрӕйы доцент Мӕхъиты Маринӕ наукӕйы фӕндаг равзӕрста, студент ма куы уыдис, уӕд. Йӕ ныхасмӕ гӕсгӕ, ӕрыгӕттӕн алы фадӕттӕ дӕр уыдис се ‘ргом наукӕмӕ аздахынӕн. Маринӕ цы къабаз равзӕрста, уый у вазыгджын, домы бирӕвӕрсыг ӕмӕ бӕрнон ахаст. Йӕ къухы бафтыд наукон куыст бахъахъхъӕнын, кӕддӕр ӕй уыцы хъуыддагмӕ чи аздӕхта, уыдонӕй у разы. Абон йӕхӕдӕг рӕзгӕ фӕлтӕримӕ кусы, архайы, цӕмӕй сын наукӕ уа ахсджиаг.

Знон РЦИ-Аланийы Сӕргълӕууӕг Битарты Вячеслав фембӕлд ӕмӕ хӕрзиуджытӕ радта наукӕ ӕмӕ техникӕйы къабазы ӕнтыстдзинӕдтӕ равдисӕг ӕрыгон ахуыргӕндтӕ ӕмӕ специалисттӕн. Фембӕлды ма архайдтой Хицауады Сӕрдары хӕдивӕг Иринӕ Азимова ӕмӕ фӕсивӕды хъуыддӕгты комитеты сӕрдар Джусойты Руслан.

«Нӕ паддзахады фидӕны цавӕр ӕнтыстдзинӕдтӕ ӕрцӕудзӕн, уый аразгӕ у ӕрыгон лӕппутӕ ӕмӕ чызджытӕй. Мах хъӕуы ног технологитӕ, рӕстӕджы домӕнтӕн дзуапдӕттӕг нырыккон иртасӕнтӕ — уыдоны фӕрцы бӕстӕ размӕ акъахдзӕф кӕндзӕн. Хъуамӕ ӕрыгон ахуыргӕндты тырнындзинад наукон диссертаци бахъахъхъӕныныл ма банцайа, уӕ къухы цы ногдзинӕдтӕ, арф иртасӕнтӕ бафта, уыдонӕй хъуамӕ нӕ бон уа спайда кӕнын», — загъта Битарты Вячеслав.

Уый фембӕлды архайджыты зӕрдыл ӕрлӕууын кодта, Уӕрӕсейы Президент цы стыр нысан сӕвӕрдта, уый: хъуамӕ нӕ бӕстӕ хаст ӕрцӕуа бӕрзонд наукон ӕмвӕзадимӕ фондз паддзахады хыгъдмӕ. Хъуамӕ уыцы ран наукон ӕмӕхсӕнад йӕхи равдиса. «Куыд уынут, афтӕмӕй мах архайӕм, цӕмӕй скъоладзаутӕн ӕппӕт фадӕттӕ дӕр уа наукон фӕндагмӕ бахизынӕн, сарӕзтам «Кванториум», байгом кодтам планетари, ӕндӕр мадзӕлттӕ дӕр конд цӕуынц», — бафиппайдта республикӕйы Сӕргълӕууӕг. Уый ма Иринӕ Азимовайӕн бафӕдзӕхста, цӕмӕй бацӕттӕ кӕной наукӕмӕ ӕмхиц фӕсивӕдӕн ӕххуысы сӕрмагонд программӕ.

Битарты Вячеслав ма ӕрхаста, скъоладзаутӕ ӕмӕ фӕсивӕды наукон архайдӕн цы фадӕттӕ конд цӕуы, ахӕм дӕнцӕгтӕ, ӕмбырды архайджыты бафарста сӕ фӕндиӕгтӕй. Зӕгъӕн ис, ӕмӕ се ‘хсӕн рауадис ӕргом ныхас, наукӕйы фыццаг къахдзӕфтӕ чи кӕны, уыдон фӕбӕрӕг кодтой, уавӕр фӕхуыздӕр кӕнынӕн цы мадзӕлттӕм ӕнхъӕлмӕ кӕсынц, уыдон. Зындгонд куыд у, афтӕмӕй ӕрыгон ахуыргӕндтӕн 2010 азы фидаргонд ӕрцыд РЦИ-Аланийы Сӕргълӕууӕджы сӕрмагонд хӕрзиуӕг наукон иртасӕнты ӕмӕ ӕндӕр ӕнтыстдзинӕдты тыххӕй. Битарты Вячеслав хуыздӕр наукон куыстыты автортӕн арфӕ ракодта ӕмӕ сын радта ӕхцайы премитӕ, кады нысантӕ.

Хуыздӕр куыстыты автортӕ уыдысты Магкоты Рамазан, Кокойты Леонид, Имран Сеидов, Дзӕгъиаты Алан, Дмитрий Поляков. Ӕдӕппӕтӕй конкурсмӕ балӕвӕрдтой 13 куысты (ӕрыгон ахуыргӕндтӕ ӕмӕ специалисттӕ — 8 ӕмӕ иумӕйагахуырадон скъолайы ахуырдзаутӕ — 5). Республикӕйы Сӕргълӕууӕг арфӕ ракодта уӕлахиздзаутӕн, конкурсы ӕппӕт архайджытӕн, бафӕдзӕхста сын, цӕмӕй, цы фӕндаг равзӕрстой, ууыл фидар къахдзӕфтӕ кӕной. Зӕрдӕ сын бавӕрдта разамонджытӕй цы аразгӕ у, уымӕй.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here