Медицинон специалисттӕ цӕттӕ кӕнынӕн

0
5

Проектон офисы радон ӕмбырды РЦИ-Аланийы Сӕргълӕууӕг Битарты Вячеслав бахӕс кодта, дыууӕ къуырийы ӕмгъуыдмӕ медицинон кусджытӕ цӕттӕ кӕныны, сӕ зонындзинӕдтӕ сын фылдӕр кӕныны программӕ саразын.

Боны фӕткы цы фарстытӕ уыд, уыдоныл ма ӕрныхас кодтой РЦИ-Аланийы Хицауады Сӕрдары хӕдивджытӕ Сӕбӕтхъуаты Ӕхсарбег, Иринӕ Азимова, Кӕсӕбиты Игор,  Фадзайты Ӕхсарбег, министрадты разамонджытӕ, республикӕйы Рӕзты агентады бӕрнон кусджытӕ. Республикӕйы разамонӕджы ныхасмӕ гӕсгӕ, хъуамӕ ӕнӕниздзинад хъахъхъӕнынады министрад ӕмӕ Рӕзты агентад равзарой сӕрӕндӕр, хъӕппӕрисджындӕр дохтырты ӕмӕ сӕ Уӕрӕсейы раззагдӕр клиникӕтӕм арвитой ахуырмӕ.

«Фидӕны дзӕбӕх специалист кӕмӕй рауайдзӕн, уый хъуамӕ фӕхӕст уа размӕцыддӕр технологитыл, медицинӕйы нырыккон авналӕнтыл. Цалынмӕ ӕрыгон специалист бӕстӕйы хуыздӕр дохтырты фӕлтӕрддзинадыл ахуыр кӕны, уӕдмӕ мах хъуамӕ балхӕнӕм нырыккон ифтонггӕрзтӕ, цӕмӕй сыл, ахуырӕй сыздӕхгӕйӕ, специалист кусын райдайа, уый тыххӕй. Стыр ӕргом нӕ аздахын хъӕуы алыхуызон наукон-практикон конференцитӕ аразынмӕ: уырдӕм хъуамӕ хонӕм федералон ӕмвӕзады зындгонд специалистты. Нӕхи дохтыртӕм цы арӕхстдзинад ӕмӕ фӕлтӕрддзинад ис, уыдӕттӕ дӕр хъуамӕ ӕвдисӕм, зонгӕ кӕнӕм иннӕ регионты кусджыты», — фӕнысан кодта Битарты Вячеслав.

Ныртӕккӕ дӕр республикӕйы ис медицинон ахуырады сӕрмагонд программӕ, Проектон офисы ныхас цы ахуырадон хъуыддӕгтыл цыдис, уыдон хъуамӕ иумӕйагӕй фӕахъаз уой ӕнӕниздзинад хъахъхъӕнынадӕн специалисттӕ цӕттӕ кӕнынӕн. Республикӕйы Сӕргълӕууӕг программӕ «ӕнӕниздзинад хъахъхъӕнынад»-ы разамонӕг Туаты Ирмӕ ӕмӕ ӕнӕниздзинад хъахъхъӕнынады министры хӕдивӕг Цгъойты Светланӕйы ӕргом аздӕхта “Дадзинты низтӕ дзӕбӕхгӕнӕн центр” специалисттӕй сифтонг кӕныны хъуыддагмӕ.

Фӕстаг ӕртӕ азы дӕргъы медицинон кусӕндӕтты материалон техникон бындуртӕ зынгӕ фӕхъӕздыгдӕр сты, фӕзынд нӕм ног дзӕбӕхгӕнӕндӕттӕ, уӕдӕ бирӕ рынчындӕттӕ ӕмӕ поликлиникӕтӕ бындуронӕй рацарӕзтой, сцалцӕг кодтой. Специалисттӕн фадатджын уавӕртӕ кӕнынц, фӕлӕ хицӕн дӕсныйӕдты дохтыртӕ нӕ фаг кӕнынц, зӕгъӕм, Мӕздӕджы районы. Битарты Вячеслав бахӕс кодта Кӕсӕбиты Игорӕн, ӕнӕниздзинад хъахъхъӕнынады министрадӕн ӕмӕ Мӕздӕджы районы бынӕттон хиуынаффӕйады администрацийӕн, цӕмӕй Луковскы станицӕйы цӕрӕн хӕдзар саразыны тыххӕй бацӕттӕ кӕной фӕндӕттӕ.

Республикӕйы Сӕргълӕууӕг куыд бацамыдта, афтӕмӕй саразын хъӕуы цӕрӕн хӕдзӕрттӕ ӕмӕ районы рынчындон хъуагдзинӕдтӕ цы специалисттӕй ӕййафы, уыдонӕн дзы фатертӕ радих кӕнын. Уый ма ӕмбырды архайджыты ӕргом аздӕхта программӕ «Хъӕуккаг дохтыр» ӕххӕст кӕнынмӕ. Уымӕн йӕ нысан у медико-санитарон фыццаградон ӕххуысы кусӕндӕттӕ специалисттӕй сифтонг кӕнын.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here