Уарзон бинонтау аудынц хистӕртыл

0
30

Адӕймагыл азтӕ сӕ уӕз куы ӕруадзынц, уӕд ын уӕлдай ӕхсызгондӕр вӕййы паддзахадӕй, йӕ кӕстӕртӕй ӕмӕ хионтӕй хӕрзаудындзинад банкъарын. Бирӕ зындзинӕдтӕ бавзӕрстой хистӕртӕ, ӕмӕ сын зӕрдӕйӕ цӕугӕ рӕвдыд ӕвдадзы хос у. Карджын адӕймаг йӕ царды бонтӕ цӕмӕй активонӕй арвита, йӕ азты уӕз ма ӕмбара, фӕлӕ зӕрдӕрухсӕй, цардбӕллонӕй кӕса йӕ алфамбылай дунемӕ, ууыл кусы социалон лӕггӕдты паддзахадон куыстуат «Республикон геронтологон центр»-ы коллектив. Стационары уавӕрты дзы кӕнынц алывӕрсыг медицинон ӕмӕ хиирхӕфсӕн лӕггӕдтӕ.

— Ирыстоны горӕтты ӕмӕ хъӕуты цӕрӕг пенсиисджытӕ сӕ районты социалон службӕты райсынц балцӕгтӕ центрмӕ. Нӕ рӕстӕгмӕйы уазджытыл хи бинонтау аудӕм. Уый нӕ хӕс дӕр у, стӕй нӕ зӕрдӕйы фӕндон дӕр. Алы хуызы гӕнӕнтӕй пайда кӕнгӕйӕ, архайӕм нӕ уазджыты ӕнӕниз цардыуагмӕ раздахыныл. Алывӕрсыг ӕххуыс нын кӕны нӕ республикӕйы Фӕллой ӕмӕ социалон лӕггӕдты министрад, — зӕгъы центры директоры хӕдивӕг Тлаттаты Эльбрус.

Фехъусынӕй фенын хуыздӕр у, ӕмӕ иумӕ ӕрзылдыстӕм дыууӕуӕладзыгон бӕстыхайыл. Йӕ алы къуым дӕр у сыгъдӕг ӕмӕ райдзаст, фӕлмӕн дивантыл адӕм сӕ фӕллад уадзынц. Ныридӕгӕн конд фесты дохтыры амынд ӕппӕт медицинон процедурӕтӕ, алкӕмӕн дӕр сӕ ис дзӕбӕх кӕныны хицӕн программӕ. Уазджытӕ сӕ фысымтӕй разы кӕй сты, уый бамбӕрстон.

— Ӕрмӕст стыр бузныг зӕгъын у мӕ бон ацы диссаджы коллективӕн. Карджын, рынчын адӕймагӕн чи лӕггад кӕны, уыдон Хуыцауы хорздзинӕдтӕй хайджын уӕнт, — зӕгъы рассветыхъӕуккаг Гаппуаты Чермен.

— Кӕсынц нын не ‘нӕниздзинадмӕ, фӕлмӕнӕй, мидбылхудгӕйӕ нӕм дзурынц. Бирӕ рынчындӕтты уыдтӕн, суанг ӕндӕр регионты дӕр, фӕлӕ ахӕм хорз уавӕртыл никуы сӕмбӕлдтӕн. Бахъуаджы рӕстӕг, ӕхсӕвӕй-бонӕй, дохтыр дӕ уӕлхъус алӕудзӕн, хъӕугӕ хостӕ дын ратдзӕн, бамбарын дын кӕндзӕн, ӕнӕниздзинадӕн цы пайдадӕр у, уый.

— Ӕз фыццаг хатт дӕн ацы центры. Мӕ низмӕ гӕсгӕ уыдтӕн алыхуызон курортты, фӕлӕ мӕ ардыгӕй мӕ къах нал хӕссы. Ме ‘нӕниздзинад мын фӕфидар кодтой, ӕнкъард кӕнын нӕ нӕ уадзынц, — зӕгъы беслӕйнаг Дзаттиаты Мурат.

93-аздзыд Гӕбӕраты-Битарты Тебро у хӕсты ӕмӕ фӕллойы ветеран.

— Афтӕ нӕ рӕвдауынц, дохтырӕй, медицинон хойӕ, суанг ӕфснайӕгӕй, раст цыма сабитӕ стӕм. Адоны руаджы ирвӕзын, уый ӕнӕсайд ныхас у, — зӕгъы Тебро.

Ӕрыдойнаг Бӕцойты Розӕ дыккаг хатт ӕрбацыд центрмӕ. Йӕ зӕрдӕмӕ афтӕ фӕцыд, ӕмӕ ма йӕ хо Ритӕйы дӕр сразӕнгард кодта.

— Фыццаг ӕрбакъахдзӕфӕй дӕр ӕй бамбарӕн ис, куыд дзӕбӕх адӕм дзы кусы уый, ӕцӕг профессионалтӕ. Алы рынчынмӕ дӕр лӕмбынӕг байхъусынц, хъӕугӕ процедурӕтӕ йын рафыссынц, пайда кӕнынц нырыккон технологитӕй. Искӕмӕн хорздзинад скӕнгӕйӕ, йӕхи амондджын чи хоны, ахӕм адӕм кусы ацы центры. Цы хуыздӕр бахӕрӕм, ууыл архайынц. Хъӕлдзӕг нӕ дарынц ӕмӕ сын бузныг, — зӕгъы Розӕ.

— Уӕлдай рӕсугъд дзы сӕрдыгон вӕййы, зонын ӕй, уымӕн ӕмӕ мӕ ныр цыппӕрӕм хатт суазӕг кодтой. Буц ӕмӕ сӕ рӕвдыд дӕн, мӕхицӕн дзы ног зонгӕтӕ ссарын, карджын адӕймаджы та ныхасӕмбал хъӕуы, йӕ зӕрдӕйы ӕнкъарӕнтӕ, йӕ ӕхсызгон мысинӕгтӕм ын чи байхъуса. Фӕлмӕн ныхас, зӕрдӕйы аудындзинад та бирӕйы аргъ сты, — загъта Ногиры цӕрӕг Дзӕгъойты Зӕирӕ.

Ныр цалдӕр азы ацы райдзаст хӕдзар уарзон ссис бирӕ адӕмӕн. Цӕмӕй сӕ царды фӕззӕг рӕсугъдӕй ӕрвитой, ууыл архайынц центры кусджытӕ иууылдӕр, сӕ сӕргъы директор Дзуццаты Азӕ. Арфӕйы ныхӕсты аккаг сты дохтыртӕ Гобаты Аланӕ, Санахъоты Маринӕ, Дзебойты Беллӕ, Хӕмыцаты Дианӕ, Гаджиты Зӕлинӕ, Белыккаты Георги. Сӕ куыст зонынц ӕмӕ уарзынц медицинон хотӕ Чеджемты Зӕлинӕ, Зассеты Беллӕ ӕмӕ Галинӕ Сарапулова. Ӕрмӕстдӕр бузныджы ныхӕстӕ хъусынц сӕ рынчынтӕй массажгӕнӕг Рустам Меджидов, психолог Суанты Анджелӕ, социалон кусджытӕ Светланӕ Алексеева, Цопанаты Альбинӕ ӕмӕ иннӕтӕ. Наташӕ Решетникова та дзӕбӕхгӕнӕн физкультурӕ амоны. Уӕдӕ ӕнӕ зӕгъгӕ нӕй, ӕрвылбон центры уазджыты зӕрдӕтӕ чи бахъӕлдзӕг кӕны, сӕ азтӕ сын чи айрох кӕнын кӕны, уый тыххӕй. Зындгонд ӕмӕ уарзон зарӕггӕнӕг Персаты Тамарӕ дӕр у центры кусӕг.

Нӕ буц хистӕртӕ, бирӕ азты ма хайджын ут царды хорздзинӕдтӕй!

Гугкаты Жаннӕ

Къамтӕ систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here