Фӕсхӕсты фыццаг ӕвзӕрстытӕ

0
38

1946 азы 10 февралы ӕвзӕрстытӕ ахсынц сӕрмагонд бынат Советон рӕстӕджы ӕвзӕрстыты историйы. ССР Цӕдисы уыдон уыдысты фыццаг ӕвзӕрстытӕ Дыккаг дунеон хӕсты фӕудӕй афӕдзы ӕмбисӕй къаддӕры фӕстӕ. Хӕсты фӕстиуджытӕ ӕвзӕрӕрдӕм зындысты бӕстӕйы социалон-экономикон ӕмӕ культурон цардыл. Ӕвзарӕн къамистӕ ӕмбӕлдысты ӕнӕкӕрон бирӕ цӕлхдуртыл. Уыдон баст уыдысты ӕвзӕрстытӕм цӕттӕ кӕнынимӕ, ӕвзарджыты нымайын, ӕвзарӕн зылдтӕ аразын ӕмӕ ӕвзӕрстыты бӕрӕггӕнӕн хъӕлӕстӕ нымайынимӕ.

ССР Цӕдисы Сӕйраг Советы фыццаг равзӕрсты фыццаг комкоммӕ ӕвзӕрстытӕ (1917 азы фӕстӕ) уыдысты 1937 азы 12 декабры, ССР Цӕдисы Сӕйраг Советы фыццаг ӕмбырд та арӕзт ӕрцыд 1938 азы 12-19 январы. Уый фӕстӕйы азты уӕлӕмхасӕн ӕвзӕрстытӕ иу ӕмӕ дыууӕ хатты нӕ уыдысты: 1940 азы мартъи ӕмӕ июны, 1941 азы январ ӕмӕ февралы. Уӕлӕмхасӕн ӕвзӕрстытӕ арӕзт цыдысты, ССР Цӕдис стырдӕр кӕй кодта, стӕй политикон репресситы азарӕй чи басыгъд, уыдоны бынӕттӕм ног депутаттӕ кӕй хъуыд, уый тыххӕй. Фыдыбӕстӕйы Стыр хӕст кӕй райдыдта, уымӕ гӕсгӕ ССР Цӕдисы Сӕйраг Советы Президиумы уынаффӕйӕ 1941 азы 5 декабры ӕвзӕрстытӕ ӕргъӕвд ӕрцыдысты иу аз, дарддӕр ССР Цӕдисы Сӕйраг Советы ӕххӕстбартӕ ӕргъӕвд цыдысты иу азӕй иннӕмӕ (1942 азы 9 декабры, 1943 азы 16 декабры, 1944 азы 14 декабры уынаффӕтӕй). Уыдонмӕ гӕсгӕ ӕргъӕвд цыдысты дӕлдӕр Советты ӕххӕстбартӕ дӕр. Афтӕмӕй Сӕйраг Советы фыццаг равзӕрсты депутаттӕн сӕ бартӕ цыппар азы бӕсты ахастой аст азӕй фылдӕр.

ССР Цӕдисы Сӕйраг Советы дыккаг равзӕрсты ӕвзӕрстыты рӕстӕг арӕзт ӕрцыд 26 сӕрмагонд ӕвзарӕн зылды ӕмӕ дзы сӕвзӕрстой ССР Цӕдисы Сӕйраг Советы 52 депутаты. Уыдон уыдысты Стыр Уӕлахизы ӕфсӕддон разамонджытӕ, Уӕрӕсейы ӕфсад ӕмӕ фронтты хуыздӕр командӕгӕнджытӕ. Уыдоны ‘хсӕн Советон Цӕдисы маршӕлтӕ Г.К. Жуков, И.С. Конев, К.А. Мерецков, К.К. Рокоссовский, Ф.И. Толбухин, Советон Цӕдисы фидӕны маршӕлтӕ С.С. Бирюзов, В.И. Чуйков, В.Д. Соколовский, авиацийы сӕйраг маршӕлтӕ А.Е. Голованов ӕмӕ А.А. Новиков, артиллерийы сӕйраг маршӕл Н.Н. Воронов, танчы ӕфсӕдты маршӕлтӕ П.С. Рыбалко ӕмӕ Я.Н. Федоренко, артиллерийы маршӕл Н.Д. Яковлев, ӕфсады номдзыд командӕгӕнджытӕ А.В. Горбунов, А.С. Жадов, Д.Д. Лелюшенко ӕмӕ иннӕтӕ.

Афтӕ уӕлахиздзау ӕфсад хъӕлӕс кодта йе ‘фсӕддон разамонджытыл. Цӕмӕй хъӕлӕсгӕнджыты нымӕц фылдӕр уа, уый тыххӕй ӕвзарджыты хицӕн къордтӕн арӕзт цыд уӕлӕмхасӕн фадӕттӕ.

Сырх ӕфсады чысыл къордтӕ ӕмӕ, НКВД-йы ӕфсӕдтӕй арӕнтыл чи лӕууыд, Дард Цӕгаты ӕмӕ цӕугӕцардгӕнӕг бынӕтты арӕзт ӕрцыд, 25-50 ӕвзарӕджы онг кӕм уыд, ахӕм ӕвзарӕн зылдтӕ. Ӕвзарӕн зылдтӕ арӕзт цыд денджызон наутӕ ӕмӕ дардмӕцӕуӕг поездты. Полярон станцӕты зымӕгиуатгӕнджытӕн барлӕвӕрд уыд хъӕлӕсты бӕрӕггӕнӕнтӕ радиобастдзинадӕй фехъусын кӕнынӕн.

Советон ӕппӕт ӕвзӕрстыты куыд уыд, афтӕ 1946 азы ӕвзӕрстыты дӕр хъӕлӕс кодтой ӕрмӕст иу кандидатыл. Уыцы ӕвзӕрстытӕ 1937 азы ӕвзӕрстытимӕ бындур сӕвӕрдтой Советон Цӕдисы ӕрмӕст иу кандидатыл хъӕлӕс кӕнынӕн ӕмӕ ахӕццӕ суанг 1980-ӕм азты кӕронмӕ.

РЦИ-Аланийы ЦӕКъ-ы пресс-службӕ

ОСТАВЬТЕ ОТВЕТ

Please enter your comment!
Please enter your name here