Фыдӕлтыккон хъама — музейӕн

0
11

Сунжӕйы хъӕуы цӕрӕг, ӕрыгон лӕппу Козаты Дауыт нӕ республикӕйы Национ музейӕн балӕвар кодта историон зынаргъ экспонат — йӕ фыды фыдыфыд Георгийы ӕвзист хъама.

Козаты Георги уыдис дунеон хӕсты архайӕг. Ивгъуыд ӕнусы ӕвдайӕм азты ахицӕн йӕ цардӕй, фӕлӕ хъӕбатыр хӕстон йӕ фӕстӕ рӕсугъд ном ныууагъта йӕ кӕстӕртӕн, йӕ хъӕубӕстӕн ӕмӕ Ирыстонӕн. Георгийы дзаумӕттӕ бинонтӕ зӕрдылдарынӕн ӕфснайдӕй дарынц. Фӕлӕ сӕ бафӕндыд, сӕ кадджын хистӕр, хӕстон лӕджы хъама музейӕн балӕвар кӕнын.

— Афтӕмӕй, нӕ дадайы ном сӕнусон кӕнын уыдис нӕ фӕнд. Музейы йӕ бирӕ адӕм уындзысты, ӕмӕ уый нӕ мыггагӕн кады хос у, — загъта хӕстоны кӕстӕр Дауыт.

— Махӕн ацы хъама ӕвӕджиауы лӕвар у. Уымӕн ӕмӕ йӕ хицау хӕстон фӕндӕгтыл фӕцыд. Уӕй чи фӕкӕны йӕ хӕдзары рагон дзаумӕттӕ, ахӕмтӕ дӕр нӕм бирӕ ӕрбацӕуы, фӕлӕ фылдӕр хатт сӕ историон дзаумӕттӕн ахӕм аргъ скӕнынц, ӕмӕ нӕ фадат нӕ фӕамоны сӕ балхӕнын. Козаты мыггаджы кӕстӕр цы фӕзминаг хъуыддаг равдыста, уый йӕ рӕсугъд миниуджытыл дзурӕг у. Ахӕм хъӕппӕрис куы ӕвдисиккой иннӕтӕ дӕр, уӕд мах историйӕ хъӕздыгдӕр никӕй къӕбиц уаид, — загъта Национ музейы директор Цогойты Батрадз.

Уӕвгӕ Ирыстоны алы хъӕуты ӕмӕ кӕмтты цӕрджыты хӕдзӕртты дӕр ис рагон дзаумӕттӕ, сӕ сараты ӕмӕ цӕхӕрадӕтты къуымты кӕмӕн рахау-бахау кӕнынц. Федтон мӕхӕдӕг ахӕм цаутӕ цалдӕр. Хуыздӕр нӕ уаид, тӕдзынджытӕ ӕмӕ уымӕл къуымты сӕ дарыны бӕсты Национ музейӕн балӕвар кӕнын? Уыцы дзаумӕттӕ — фыдӕлты истори сты, ӕмӕ сӕ бахъахъхъӕнын кӕстӕр фӕлтӕртӕн ахъаззаг хъуыддаг у. Козаты Дауыты хуызӕн патриоттӕ фылдӕр разынӕд не ‘хсӕн, ӕмӕ сӕ алчидӕр йе ‘вӕрӕн бахӕссӕд нӕ адӕмы историйы къӕбицмӕ.

Саутӕты Тамилӕ

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here