Хохы цъупмӕ схиздзысты

0
90

Ӕрбахӕццӕ кӕны стыр бӕрӕгбон. Ӕппӕт Уӕрӕсеимӕ Цӕгат Ирыстон дӕр йӕхи рӕвдз кӕны Уӕлахизы 75 азы кадджын бӕрӕгбонмӕ.

Ныридӕгӕн нӕ республикӕйы райдыдтой уыцы бонимӕ баст фембӕлдтытӕ ӕмӕ ӕндӕр мадзӕлттӕ.

Знон Ветеранты советы хӕдзары ӕрбамбырд сты, Уӕлахизы 75 азы бонмӕ цы хорз ӕмӕ цымыдисаг хъуыддаг цӕттӕ кӕнынц, уый фӕдыл организацион комитет ӕмӕ кусӕг къорды уӕнгтӕ. Комитеты сӕрдар, фонд «Арт-Кавказы» разамонӕг Николай Хлынцов куыд загъта, афтӕмӕй Уӕлахизы кадӕн, нӕ хъӕбатыр хӕстонты ном хъуыды кӕнгӕйӕ, цӕттӕ кӕнынц цъупп «Аланыстон»-ы сӕрмӕ схызт. Ирыстоны «ӕнӕмӕлгӕ полкъ»-ы уӕнгтӕ хохы цъупмӕ схиздзысты. 2 майы хуымӕтӕджы нӕ уыдзӕн, — уыцы бон 1945 азы Рейхстаджы сӕрмӕ сфӕйлыдта Уӕлахизы тырыса.

Не ‘мзӕххонтӕй 79 адӕймагӕн лӕвӕрд ӕрцыд уӕлдӕр хӕстон хӕрзиуӕг — Советон Цӕдисы Хъӕбатыры Стъалы. Уыдоны хуызистытимӕ акцийы архайджытӕ схиздзысты цъупмӕ. Ӕдӕппӕтӕй 100 адӕймаджы бӕрц. Уыдоныл ма бафтдзысты Волгоград ӕмӕ Хъырымы цӕрӕг ирон адӕмы диаспорӕты минӕвӕрттӕ. Хохы цъупп «Аланыстон» ис Цӕгат ӕмӕ Хуссар Ирыстоны арӕнтыл. Ивгъуыд аз ӕм фыццаг хатт схызтысты альпинисттӕ ӕмӕ йын ном дӕр уӕд радтой. 3532 метры бӕрзӕндыл уыцы бон сӕмбӕлдзысты дыууӕ Ирыстоны «ӕнӕмӕлгӕ полкъ»-ы архайджытӕ.

Сараздзысты дзы митинг, сӕвӕрдзысты дзы номарӕн къӕй, ӕрсадздзысты дзы Уӕлахизы тырысайы халдих.

Хохы цъупмӕ схизыны хъӕппӕрис равдисӕг сты фонд «Арт-Кавказ», республикӕйы Ветеранты совет, Альпинизмы федераци ӕмӕ “ӕвзонгӕфсад”-ы уӕнгтӕ. Ныртӕккӕ цӕттӕ кӕнынц архайджыты номхыгъд.

— Схызт цӕудзӕн ӕрдзон зын уавӕрты рӕстӕг — майы райдиан цъуппыл вӕййы уазал ӕмӕ бирӕ мит, — зӕгъы Николай Хлынцов.

Ӕмбырды архайдтой республикӕйы Ветеранты советы сӕрдар Къаболаты Солтан, йӕ хӕдивӕг Бедойты Руслан, ӕндӕр бӕрнон кусджытӕ.

Гугкаты Жаннӕ

Къам систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here