Уарзон адӕймаг

0
110

Бирӕтӕ ӕнӕзонгӕ нӕ уыдзысты, Цӕгат Ирыстоны республикон ӕхсӕнадон змӕлд «Иудзинад»-ы фӕлгӕты ӕрӕгӕй нырмӕ кусын кӕй райдыдта сфӕлдыстадон къорд «Малусӕг», уый. Ныр йӕ уӕнгтӕ рӕстӕгӕй-рӕстӕгмӕ ныхас кӕндзысты ӕмдзӕвгӕтӕ, радзырдтӕ, ӕндӕр литературон уацмыстӕ фыссыныл чи архайы, уыдоны сфӕлдыстадыл. Ивгъуыд къуырийы та уыдис поэтессӕ, зарӕггӕнӕг, фӕндырдзӕгъдӕг, ӕндӕр алывӕрсыг курдиаты хицау Гӕджынон-Хабӕты Риммӕйы сфӕлдыстадон изӕр «Ирыстон — мӕ уарзондӕр зарӕг».

Ардӕм хуынд ӕрцыдысты ӕппӕтдунеон ӕхсӕнадон змӕлд «Иры Стыр Ныхас»-ы ӕмӕ горӕты ахуырадон кусӕндӕтты минӕвӕрттӕ. Сфӕлдыстадон изӕр байгом кодтой ӕхсӕнад «Иудзинад»-ы советы уӕнг Токты Валодя ӕмӕ Дзӕуджыхъӕуы 42-ӕм скъолайы ирон ӕвзаг ӕмӕ литературӕйы ахуыргӕнӕг Хъӕцмӕзты Мӕдинӕ. Куыд радзырдтой, афтӕмӕй Гӕджынон-Хабӕты Риммӕ у нӕ республикӕйы сгуыхт ахуыргӕнӕг, поэтессӕ, ӕхсӕнадон архайӕг.

» Риммӕ дӕргъвӕтин рӕстӕг кӕстӕр фӕлтӕримӕ кусы, ӕмӕ хайджын сты йӕ курдиат ӕмӕ йӕ фарнӕй. Дарддӕр йӕ къухы ӕнтыстдзинӕдтӕ куыд ӕфтой, уыцы амонд ӕй уӕд», — раарфӕ йын кодта «Иры Стыр Ныхас»-ы сӕрдары хӕдивӕг Еналдыты Хъазыбег.

Ахӕм зӕрдӕбын ныхӕстӕ йын загъта «Иры Стыр Ныхас»-ы сылгоймӕгты комитеты сӕргълӕууӕг Махъоты Иринӕ дӕр: «Риммӕ цы алывӕрсыг архайд кӕны, уымӕй уӕлдай йӕхи фӕзминагӕй ӕвдисы сылгоймӕгты комитеты куысты дӕр». Цӕгат Ирыстоны Фысджыты цӕдисы сӕрдары хӕдивӕг Скъодтаты Эльбрус дзырдта: «Риммӕйы ӕмдзӕвгӕтӕ фыст вӕййынц хуымӕтӕг ӕвзагӕй. Журнал «Ирӕф»-ы мыхуыргонд ӕрцыдысты ӕмӕ тынг фӕцыдысты журналкӕсджыты зӕрдӕмӕ».

Бирӕ арфӕйы ныхӕстӕ Риммӕйы тыххӕй загътой Хӕххон-металлургон техникумы директоры хӕдивӕг Челдыты Илитӕ, Дзӕуджыхъӕуы базарадон-экономикон техникумы разамонӕг ӕбиты Валери, рауагъдад «Ир»-ы сӕйраг редактор Тъехты Тамерлан, зарӕггӕнджытӕ Дауыраты Эдуард ӕмӕ Джимиты Артур, Хъӕбӕлоты Билары номыл Сывӕллӕтты республикон галуаны кусӕг Гутнаты Иринӕ ӕмӕ бирӕ ӕндӕртӕ.

Токты Валодя ӕмӕ Хъӕцмӕзты Мӕдинӕ сфӕлдыстадон изӕры архайджытӕн радзырдтой Риммӕйы цард ӕмӕ сфӕлдыстады тыххӕй: «Кӕд Ирыстоны сылгоймӕгтӕй исчи йӕ цард снывонд кодта ӕнӕхъӕнӕй дӕр йӕ Райгуырӕн бӕстӕйы хорздзинадӕн, уӕд уый у Риммӕ. Куырыхон, ӕгъдауджын, ӕфсармджын сылгоймаг, уарзӕгой мад, фӕлмӕнтӕ дзураг нана, ӕнӕхин кусӕг».

Гъе, ахӕмӕй зонынц Ирыстоны адӕм Риммӕйы. Уый скъолайы ахуыргӕнӕгӕй сырӕзт Цӕгат Ирыстоны Ахуырад ӕмӕ наукӕйы министрады сӕйраг специалисты онг. Бирӕ лӕггад кӕны ирон ӕвзаджы рӕзтӕн. Республикӕйы Сывӕллӕтты сфӕлдыстады галуаны кусгӕйӕ, йӕ программӕ «Ирон аив дзырды дӕсны» хорз зонгӕ у, сывӕллӕттимӕ ахуырадон ӕмӕ хъомыладон куыст чи кӕны, уыдонӕн.

Риммӕйы хъомылгӕнинӕгтӕ систы республикон ӕмӕ ӕппӕтуӕрӕсеон ерысты уӕлахиздзаутӕ. Уыцы сабитимӕ уый хъазуатон куыст кӕны ӕрвылбон. Зӕрдӕйӕ сын бауарзын кӕны мадӕлон ӕвзаг, хоны сӕ поэзийы бӕрзӕндтӕм.

Ныр та Риммӕйы хъомылгӕнинӕгтӕ Дзӕуджыхъӕуы 21-ӕм скъолайы ахуырдзау Мамиаты Марат, Санибайы астӕуккаг скъолайы ахуырдзау Гагиаты Кристинӕ ӕмӕ иннӕтӕ аив кастысты сӕ ахуыргӕнӕджы фыст ӕмдзӕвгӕтӕ. Сфӕлдыстадон изӕры архайджытӕ сӕ цӕст уӕлдай тынгдӕр ӕрӕвӕрдтой ӕппӕтуӕрӕсеон ӕркасты Гран-при ӕмӕ фыццаг къӕпхӕны диплом аив кӕсынӕй рамбулӕг — Алагиры 5-ӕм скъолайы 5-ӕм къласы ахуырдзау Саулохты Сӕрмӕты арӕхстдзинадыл.

Раст куы зӕгъӕм, уӕд Риммӕ канд кӕстӕр фӕлтӕры хъомылгӕнӕг нӕу. Къорд азы размӕ Турчы цӕрӕг ирон адӕмы фӕндонмӕ гӕсгӕ, куыд фӕлтӕрдджын ирон ӕвзаджы ахуыргӕнӕг, афтӕ хуынд ӕрцыд Стамбулмӕ. Ӕвзаджы ахуыргӕнӕгӕй уӕлдай ма уыдис ирон кӕфтытӕ ӕвӕрӕг, фӕндырӕй цӕгъдыны ахуыргӕнӕг дӕр. Ирон фӕсивӕдимӕ зӕрдиагӕй кӕй бакуыста, хорз фӕд кӕй ныууагъта Турчы зӕххыл, уый тыххӕй йын бирӕ арфӕтӕ фӕкодтой Турчы цӕрӕг ирон адӕм.

Риммӕйы ӕмдзӕвгӕтӕ аив, рӕсугъд ӕмӕ мидисджын кӕй сты, уый тыххӕй сӕ бындурыл арӕзт ӕрцӕуы диссаджы зӕрдӕмӕхъаргӕ ирон зарджытӕ. Сфӕлдыстадон изӕры сӕ зарыдысты Уалыты Альберт, Томайты Миланӕ ӕмӕ нӕ иннӕ зарӕггӕнджытӕ. Риммӕ йе ‘мдзӕвгӕтӕн фыссы музыкӕ дӕр. Композитор Евгений Воложанинимӕ ирон сывӕллӕттӕн цы зарджыты чиныг рауагътой, уым ын ис 20 зарӕгӕй фылдӕр.

Риммӕ йӕ цардӕмбалимӕ цы кӕстӕрты схъомыл кодта (Хъазыбег ӕмӕ Сослан), уыдон сты хӕрзӕгъдау ӕмӕ ӕфсармджын, царды хорз миниуджытӕй хайджын. Хистӕрты хуызӕн ирон ӕгъдауыл хӕст сты йӕ хъӕбулты хъӕбултӕ Замирӕт, Каролинӕ, Владислав ӕмӕ Аннӕ дӕр.

Риммӕ нӕ мадӕлон ӕвзаджы кад дӕлӕмӕ кӕй нӕ уадзы, уый тыххӕй йӕ «Иудзинад»-ы советы уӕнгтӕ Дзуццаты Феликс, Токты Валодя ӕмӕ Байсонгъуырты Мухтар схорзӕхджын кодтой ӕхсӕнады хӕрзиуӕг «Кады нысан»-ӕй. Сфӕлдыстадон изӕры кӕрон Гӕджынон-Хабӕты Риммӕ хуынд адӕмӕн стыр арфӕ ракодта, поэзийы бӕрӕгбонмӕ кӕй саккаг кодтой, уый тыххӕй.

Тохсырты Къоста

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here