Луковскы станицӕйы ног рӕвдауӕндон

0
15

Мӕздӕджы районы Луковскы станицӕйы ӕрцыд ӕхсызгон цау — байгом дзы, 150 сывӕллонӕн бынат кӕм ис, ахӕм ног рӕвдауӕндон. Иу ахӕм рӕвдауӕндон ма, ӕрмӕст 100 сывӕллонӕн бынат кӕм ис, станицӕйы байгом фарон. Афтӕмӕй, сӕ сабитӕн рӕвдауӕндоны бынатмӕ ӕнхъӕлмӕгӕсӕг ныййарджытӕ станицӕйы нал ис.

Равдауӕндон байгом кӕнын Луковскы станицӕйы цӕрджытӕн уыд бӕрӕгбонау, уымӕ гӕсгӕ йӕм ӕрхуыдтой республикӕйы Сӕргълӕууӕг Битарты Вячеславы. Йемӕ уыдысты республикӕйы Хицауады Сӕрдарды хӕдивӕг Иринӕ Азимова, ахуырад ӕмӕ наукӕйы министр Людмилӕ Башарина ӕмӕ Мӕздӕджы районы разамонджытӕ.

Уазджыты размӕ станицӕйы цӕрджытӕ рацыдысты цӕхх ӕмӕ кӕрдзынимӕ ӕмӕ Битарты Вячеславӕн стыр арфӕ ракодтой, республикӕйы разамынды ‘рдыгӕй а фӕстӕг рӕстӕг Мӕздӕджы районмӕ стыр ӕргом здӕхт кӕй цӕуы, уый фӕдыл.

— Ӕхсызгон мын у уемӕ уӕ бӕрӕгбоныл бацин кӕнын. Уӕлдай ӕхсызгон та мын у, сывӕллӕтты рӕвдауӕндонмӕ рады кӕй нал лӕудзысты ӕмӕ рӕвдауӕндӕттӕ фаг кӕй ис, уый. Уыдон районы арӕзт цӕуынц «Мӕздӕджы районы социалон-экономикон райрӕзт»-ы программӕйы фӕлгӕты. Ӕмӕ уыцы программӕ ӕххӕст кӕнгӕйӕ, дарддӕр дӕр Мӕздӕджы горӕты ӕмӕ районы хъӕутӕ ӕмӕ станицӕты араздзыстӕм ӕнӕниздзинад хъахъхъӕнынады, культурӕ ӕмӕ социалон къабазы ӕндӕр объекттӕ, стӕй фӕндӕгтӕ. Фӕнды нӕ, цӕмӕй канд Луковскы станицӕйы нӕ, фӕлӕ ӕппӕт Мӕздӕджы районы цӕрджытӕн сӕ нымӕц фылдӕр кӕна, мах та сын араздзыстӕм цӕрынӕн ӕппӕт уавӕртӕ дӕр, — загъта Битарты Вячеслав.

Уымӕй уӕлдай, республикӕйы Сӕргълӕууӕг арфӕ ракодта аразджытӕн, уымӕн ӕмӕ рӕвдауӕндон сарӕзтой хӕрзцыбыр рӕстӕгмӕ — аст мӕймӕ, уыимӕ, куыстыты хӕрзхъӕддзинадмӕ фау ӕрхӕссӕн нӕй. Аразджытӕ пайда кодтой нырыккон ӕмӕ хӕрзхъӕд арӕзтадон ӕрмӕгӕй. Йӕ гӕнӕнтӕм гӕсгӕ, райдай хӕдзары дзаумайӕ ӕмӕ фӕу медицинон пунктӕй, хӕрӕндонӕй —рӕвдауӕндон дзуапп дӕтты ӕппӕт нырыккон домӕнтӕн. Ис дзы сабитӕн ленкгӕнӕн бассейн ӕмӕ гӕрзтӕхсӕн нырыккондӕр ифтонггӕрзтӕй ӕххӕст.

Мӕздӕджы районы ахуырады управленийы разамонӕг Нелли Гаспарянц куыд радзырдта, афтӕмӕй рӕвдауӕндоны хъомылгӕнджытӕ ныридӕгӕн сты аст къорды, уыдонӕй дыууӕ къорды сты, хӕрзгыццыл сывӕллӕттӕ кӕм ис, ахӕмтӕ. Ӕмӕ канд Луковскы станицӕйы цӕрджыты сывӕллӕттӕ не сты, фӕлӕ ӕфсӕддон хӕйтты службӕгӕнӕг бинонты сывӕллӕттӕ дӕр.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here