Парижы рамбылдта бронзӕ майдан

0
59

Нӕ рӕстӕджы дзюдойӕ Олимпиаг хъӕзтытӕм бахауынмӕ чи хъавы, уыцы бӕстӕты нымӕц хӕццӕ кӕны 190-мӕ. Уымӕ гӕсгӕ, Олимпиаг хъӕзтытӕм алы уӕзы дӕр цы 32 дзюдоисты хъуамӕ хӕцой, уыдон афӕдз ӕмӕ ӕрдӕджы дӕргъы ӕвзӕрст фӕцӕуынц континенталон ӕмӕ дунеон стырдӕр ерысты бӕрӕггӕнӕнтӕм гӕсгӕ. Уыцы бӕрнондӕр ерыстӕм хауынц дунеон турниртӕ «Стыр згъӕр худ» ӕмӕ Европӕйы чемпионат дӕр.

Ацы азы Олимпиаг хъӕзтытӕм рейтингон баллтӕ дзюдоисттӕ ӕмбырд кӕнын райдыдтой ивгъуыд азы райдиан. Ирыстойнаг спортсментӕй абонмӕ ахӕм рейтингон баллтӕ кӕй хыгъды ис, уыдон сты: Тасойты Инал (100+ кг), Хуыбецты Алан, Лӕппынӕгты Аслан, Елбачиты Георги (ӕртӕйӕ дӕр 81 кг).

Олимпиаг хъӕзтыты агъоммӕ ма цы 3-4 дунеон «Стыр згъӕр худ»-ы турниртӕ баззади, уым сбӕрӕг уыдзысты, фылдӕр баллтӕ чи ӕрӕмбырд кӕндзӕн ӕмӕ Японы олимпиаг гауызмӕ (татамимӕ) чи рацӕудзӕн, уыдоны нӕмттӕ. Абон уал нӕ лӕппутӕй ахӕм балцӕг райсынмӕ ӕппӕты хӕстӕгдӕр у нӕ уӕззаууӕзон дзюдоист Тасойты Инал. Уӕрӕсейаг дзюдоисттӕй ацы уӕзы Иналимӕ абоны онг ис ӕппӕты фылдӕр рейтингон баллтӕ.

Хӕрз ӕрӕджы Инал хорз рахӕцыд Францы сӕйраг горӕт Парижы цы «Стыр згъӕр худ»-ы турнир цыди, уым. Ӕдӕппӕт ерысты архайдтой 121 бӕстӕйы 740 дзюдоисты. Иналы уӕзы татамимӕ рацыдысты, дунейы тыхджындӕр уӕззаууӕзонтыл нымад чи у, уыцы богӕлттӕн сӕ фылдӕр.

Инал йӕ фыццаг фембӕлды фӕуӕлахиз Хъыргъызстаны минӕвар Краковецкийыл. Йӕ дыккаг ныхмӕлӕууӕг уыди фӕсивӕды ‘хсӕн Азийы чемпион, узбекаг уӕззаууӕзон дзюдоист Юсупов. Уый фарон япойнаг горӕт Осакайы «Стыр згъӕр худ»-ы турниры бацахста 3-аг бынат ӕмӕ ныр тырныдта Олимпиаг хъӕзтытӕм балцӕг рамбулынмӕ, фӕлӕ Иналы ныхмӕ фӕлӕууын йӕ бон нӕ баци. Тасойы-фырт Юсуповы ацахста ӕмӕ йӕ татамийы йе уӕнтыл авӕрдта. Ерысты 1/4 хайы Инал фембӕлд япойнаг тыхджын дзюдоист Кагеураимӕ.

Фарон Осакайы сӕ фембӕлд ахицӕн Иналы пайдайӕн ӕмӕ уӕд Тасойы-фырт сси «Стыр згъӕр худ»-ы уӕлахиздзау. Ацы фембӕлды дӕр Инал тырныдта уӕлахизмӕ, фӕлӕ Кагеура мадзӕлттӕ ссардта Иналы фӕсайынмӕ ӕмӕ йын бантыст фӕуӕлахиз уӕвын. Ацы фӕхӕрды фӕстӕ ма Иналӕн фадат уыди 3-аг бынат бацахсыныл ерыс кӕнын. Уый тыххӕй йӕ рамбулын хъуыди дыууӕ ныхмӕлӕууӕгӕй ӕмӕ уыдоныл Инал фӕуӕлахиз ӕнӕдызӕрдыгӕй.

Фыццаг Инал фембӕлди монгойлаг дзюдоист Улзибиарамы ӕмӕ йын риссаг ахст акодта йӕ къух. Уый та амыдта «сыгъдӕг уӕлахиз». 3-аг бынатыл ерысы йӕ ныхмӕлӕууӕг уыди фӕсивӕды ‘хсӕн дунейы чемпион, гуырдзиаг дзюдоист Заалишвили, ӕмӕ уымӕн дӕр йӕ бон нӕ баци Иналы цырд ӕмӕ домбай ныббырсты ныхмӕ фӕлӕууын. Инал бацахста 3-аг бынат, фӕлӕ ӕнӕмӕнг уыди хуыздӕры аккаг. 3-аг бынат кӕй бацахста, уый йын йӕ рейтингон баллтыл бафтыдта 700 баллы бӕрц, ӕмӕ уый дӕр ӕвзӕр бӕрӕггӕнӕн нӕу.

Йӕ тренертӕ Беккуызарты Алик ӕмӕ Айларты Ирбеджы уырны, сӕ хъомылгӕнинаг Олимпиаг балцӕг райсыны домӕнтӕ кӕй сӕххӕст кӕндзӕн, уый.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here