Ӕрыгон ахуыргӕндты иртӕстытӕ

0
100

Уӕрӕсейы Наукӕйы боны кадӕн Цӕгат Ирыстоны Хетӕгкаты Къостайы номыл паддзахадон университеты ацыд ӕрыгон ахуыргӕндты дунеон конференци. Йӕ темӕ у: «Кавказ. Ивгъуыд. Абон. Фидӕн. Истори. Археологи ӕмӕ культурӕ».

Архайдтой дзы, Цӕгат Кавказы республикӕты наукон куыстыл лӕуд чи у ӕмӕ сӕ иртасӕн куыстытӕн аргъгонд кӕмӕн ӕрцыд, ахӕм ӕрыгон ахуыргӕндтӕ.

Конференци байгом кодта ӕмӕ ӕппӕт архайджытӕн дӕр се ‘нтыстджын куысты тыххӕй арфӕйы ныхӕстӕ загъта Цӕгат Ирыстоны Абайты Васойы номыл социалон ӕмӕ гуманитарон иртасӕнты институты директор Хъаныхъуаты Зӕлинӕ.

— Институт хуымӕтӕджы нӕ кусы ӕрыгон ахуыргӕндтимӕ. Афӕдзы размӕ дӕр нӕ конференцийы сбӕрӕг кодтам ӕппӕты хуыздӕр наукон— иртасӕн куыстытӕ, ӕмӕ уыцы ӕрыгон ахуыргӕндтӕ абон сты нӕ институты аспиранттӕ. Уыдон уын ацы конференцийы куысты сараздзысты дӕсныйады ахуыртӕ. Байхъусдзыстут сӕм, фендзыстут сын сӕ куыстытӕ ӕмӕ уӕ алчидӕр йӕ иртасӕн куысты спайда кӕндзӕн уыцы ӕрмӕгӕй. Ӕрыгон ахуыргӕндтӕн хорз уавӕртӕ ӕмӕ фадӕттӕ аразы университет, цӕмӕй иумӕ ӕмзондӕй архайой ӕмӕ кусой нӕ бӕстӕйы фӕрныгадӕн, нӕ иумӕйаг хӕдзар — Цӕгат Кавказы рӕсугъд фидӕнӕн, — загъта институты директор.

ЦИПУ-йы ректор Огъуаты Алан та конференцийы архайджытӕн радзырдта, университетӕй цы бирӕ ахуыргонд фӕлтӕртӕ рацыд, стӕй ацы аз йӕ сӕдӕ азы юбилей кӕй бӕрӕг кӕндзӕн, уый тыххӕй.

Конференцийы ӕрыгон ахуыргӕндтӕ докладтӕ бацӕттӕ кодтой Цӕгат Кавказы рагон, астӕуккаг ӕмӕ XX ӕнусты социалон-политикон, ӕхсӕнадон рӕзты культурон процесс ӕвдисӕг темӕтыл. Наукон кусӕг Сокаты Дианӕ йӕ лекци: «Ирыстон ӕмӕ Иран: историон уидӕгтӕ ӕмӕ культурон иудзинӕдтӕ»-йӕ бацамыдта, не ‘хсӕн бирӕ хицӕндзинӕдтӕ кӕй нӕй, не ‘гъдӕутты ӕмӕ нӕ культурӕйы иу халдих миниуджытӕ бирӕ кӕй ис, уый.

Конференци дарддӕр куыста секциты фӕлгӕты.

Саутӕты Тамилӕ

Къамтӕ систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here