Цы фесты мӕргътӕ

0
95

Раздӕр азты алыхуызон мӕргътӕ арӕх уыдысты нӕ алыварс ӕрдзон бынӕтты. Сӕ цъӕхснаг зарджытӕм-иу адӕймаг хъусынӕй нал ӕфсӕст. Ныр та мӕргъты хъӕлӕс хатгай нал фӕхъуысы дыргъдӕттӕй дӕр. Ӕмӕ цы фесты нӕ базырджын хӕлӕрттӕ? ӕви зарын нал зонынц?

Ацы фарстытӕн дзуапп раттын зын нӕу. Уӕхӕдӕг ма ахъуыды кӕнут, алыхуызон культурӕты хуымтӕ маргджын химикаттӕй куыд арӕх пырхгонд цӕуынц, ууыл. Уӕдӕ дзы дыргъдӕттӕ дӕр хъуаг нӕ вӕййынц. Цалдӕр хатты бӕлас маргджын химикаттӕй куы бапырх кӕнай, уӕд ма йыл маргъ ахстон кӕд ӕмӕ кӕм скӕна? Ахстон дзы куы скӕны, уӕд та йӕ лӕппынтӕ цагъды фӕвӕййынц.

Иу ныхасӕй, пайдайы ӕнхъӕл нӕхиуыл зиантӕ уадзӕм. Мӕргътӕ алыхуызон зулчъытӕ ӕмӕ саскты цӕгъдынц, махӕй та сӕ хорздзинад ферох. Фӕстаг рӕстӕджы сауцъиу, булӕмӕргъ, дыгоппон, ӕндӕр цъиутӕ арӕх нал фендзынӕ хъӕдӕхгӕд рӕгътӕ ӕмӕ къуылдымты.

Уӕвгӕ мӕргътӕ канд хуымтӕ ӕмӕ дыргъдӕтты нӕ цагъды кӕнынц. Быдырты зымӕгон хӕринаг куы нал фӕарынц, уӕд сӕхи байсынц адӕмы цӕрӕнуӕттӕм. Иуӕй-иу мӕргътӕ, зӕгъӕм, сырддонцъиутӕ уӕлдай арӕхдӕр вӕййынц хордӕтты, хойраджы продуктты ӕмӕ промышленнон товарты скълӕдты.

Ацы бӕстыхӕйтты мыстыты, уырыты, ӕндӕр ӕхсынджыты марынӕн алы хатт дӕр ӕвӕрд цӕуы маргджын холлӕгтӕ. Мӕргътӕ дзы фӕхъӕстӕ вӕййынц ӕмӕ сыл цӕуы зиантӕ. Уӕдӕ иуӕй-иу ӕгӕнон цуанӕттӕ суанг къуырттафон дӕр нӕ ауӕрдынц бӕлӕттӕ, хиуатӕ, сырддонцъиутӕ, ӕндӕр мӕргътӕ цӕгъдыныл. Хъӕууон сывӕллӕттӕ арӕх фехалынц цъиуты ахстӕттӕ, сӕ лӕппынты та сын маргӕ акӕнынц.

Ахӕм фыдбылызтӕ раздӕр къаддӕр уыдысты. Уый нӕ, фӕлӕ ма-иу горӕттӕ ӕмӕ хъӕуты сывӕллӕттӕ цӕттӕ кодтой «Мӕргъты бон»-мӕ. Цъиутӕн-иу фӕйнӕджы гӕбӕзтӕй сарӕзтой ахстӕттӕ ӕмӕ ауыгъд цыдысты дыргъдӕтты.

Ныр ӕрдзыл аудыны ахсджиаг куыст бирӕ рӕтты рох кӕнын райдыдтам. Республикӕйы иумӕйаг ахуырады фылдӕр скъолаты, сывӕллӕтты экологон хъомылад нывыл ӕвӕрд кӕй нӕу, ууыл ныхас дӕр нӕй. Ӕз афтӕ хъуыды кӕнын ӕмӕ кӕд ӕрдзы хъахъхъӕныныл тыхсӕм, уӕд, фыццаджыдӕр, бацархайын хъӕуы нӕ базырджын хӕлӕртты ӕнӕниз цардыл.

Реуазты Сӕхӕм,

Республикӕ Цӕгат Ирыстоны-Аланийы цуанӕттӕ ӕмӕ кӕсагахсджыты ӕхсӕнады уӕнг

ОСТАВЬТЕ ОТВЕТ

Please enter your comment!
Please enter your name here