Бехъанмӕ зылд ӕрцӕудзӕн

0
43

Регионалон нысаниуӕджы ӕрдзы цыртдзӕвӕн Бехъаны цадмӕ рӕхджы зылд ӕрцӕудзӕн федералон проект «Сохранение уникальных водных объектов»-ы фӕлгӕты.

Уый тыххӕй РЦИ-Аланийы ӕрдзон фӕрӕзтӕ ӕмӕ экологийы министр Мамиаты Чермен ӕрӕджы фехъусын кодта республикӕйы дзыллон хабархӕссӕг фӕрӕзты кусджытӕн. Куыд загъта, афтӕмӕй, 2019 азы куысты бӕрӕггӕнӕнтӕ бахынцыны тыххӕй цы кӕронбӕттӕн коллеги арӕзт ӕрцыд, уый фӕстӕ, ӕндӕр рӕтты чи нӕй, уыцы цад бахастой, экологон ӕгъдауӕй базилын кӕмӕ хъӕуы, ахӕм доны объектты федералон номхыгъдмӕ.

Уавӕр афтӕ у, ӕмӕ доны ацы объект ӕмӕ Мӕздӕггаг цадмӕ дӕр хъӕуы ӕвӕстиатӕй базилын. Фыццаг у «ӕрдзон бынат Бехъан»-ы ахсджиаг хай, ӕмӕ йын ис стыр экологон, социалон-экономикон, стӕй фӕлладуагъды-эстетикон нысаниуӕг. Ӕрӕджы доны объект лӕвӕрд ӕрцыд Цӕгат Ирыстоны ӕрдзы министрадмӕ, ӕмӕ уый хъахъхъӕнынадон архайд нырӕй фӕстӕмӕ кӕндзӕн сӕрмагонд хъахъхъӕнинаг территорийы хуызы.

«Мах рагагъоммӕ бацӕттӕ кодтам проектон-хӕрдзты документтӕ, стӕй Бехъан паддзахадон экспертизӕйы дӕр ацыд. Дарддӕр та нӕ куырдиат ӕрвитын бахъуыд Уӕрӕсейы Федерацийы ӕрдзон фӕрӕзтӕ ӕмӕ экологийы министр Д.Н. Кобылкинмӕ, цӕмӕй ацы доны объекттӕ хаст ӕрцӕуой федералон проект «Сохранение уникальных водных объектов»-мӕ 2020 азы Бехъаны цадмӕ экологон ӕгъдауӕй базилыны тыххӕй. Ныр махӕн ӕхсызгон хъуыддаг у, федералон центр нӕ тыхст кӕй бамбӕрста ӕмӕ ацы фарста рӕстмӕ кӕй алыг кодта, уый. Ӕнхъӕл стӕм, рӕхджы ӕппӕт мадзӕлттӕ дӕр царды уагъд кӕй ӕрцӕудзысты, ӕмӕ уӕд нӕ къухы бафтдзӕн, ӕндӕр рӕтты чи нӕй, уыцы алӕмӕты доны объекттӕ бахъахъхъӕнын, сӕ пайда та фӕфылдӕр уыдзӕн», — радзырдта Мамиаты Чермен.

Уӕ зӕрдыл уын куы ‘рлӕууын кӕнӕм, уӕд Республикӕ Цӕгат Ирыстон-Аланийы ӕрдзон фӕрӕзтӕ ӕмӕ экологийы министрад хъӕугӕ ӕрмӕджытӕ бацӕттӕ кодта национ проект «Экологи»-йы архайыны тыххӕй дӕр, ӕмӕ ныр уыдонмӕ каст цӕуы, цӕмӕй хаст ӕрцӕуой федералон проекттӕ «Чистая страна», «Сохранение лесов» ӕмӕ «Сохранение уникальных водных объектов»-мӕ.

Дзыныхты Аленӕ

ОСТАВЬТЕ ОТВЕТ

Please enter your comment!
Please enter your name here