Богӕлттӕ ерыс кӕнынц Ромы

0
13

Италийы сӕйраг горӕт Ромы ацы бонты цӕуы Европӕйы чемпионат грекъаг-ромаг ӕмӕ уӕгъдибар хъӕбысхӕстӕй.

Фыццаг бонты бӕрӕггонд цыдысты уӕлахиздзаутӕ ӕмӕ призон бынӕттӕ бацахсджытӕ грекъаг-ромаг хъӕбысхӕстӕй.

Уӕрӕсейы богӕлттӕн ацы хатт нӕ бантыст Европӕйы чемпионаты сыгъзӕрин майдантӕ рамбулын. Уый тыххӕй нӕ бӕстӕйы иугонд командӕйы сӕйраг тренер Гоги Когуашвили загъта: «Мӕхӕдӕг дӕр дис кӕнын, нӕ богӕлттӕ ӕнӕ сыгъзӕрин хӕрзиуӕг кӕй баззадысты, ууыл. Раст зӕгъгӕйӕ, мах Роммӕ нӕ арвыстам нӕ тыхджындӕр богӕлттӕй Олимпаг хъӕзтытӕм лицензитӕ чи хъуамӕ райса, уыдоны, фӕлӕ хъуамӕ ӕнӕ уыдонӕй дӕр нӕ командӕ рамбылдтаид 2-3 фыццаг бынаты. Нӕ богӕлттӕ Назир Абдуллаев ӕмӕ Хъӕбӕлоты Витали хъуамӕ чемпионтӕ суыдаиккой, фӕлӕ сӕ дыууӕ дӕр рӕдыдтытӕ ӕруагътой ӕмӕ 2-аг бынӕттыл ӕрлӕууыдысты».

Хъӕбӕлоты Витали у Уӕрӕсейы ӕртӕ хатты чемпион ӕмӕ Европӕйы фароны чемпион. Нӕ 22-аздзыд курдиатджын ӕмбӕстаг ацы хатт дӕр бӕргӕ хорз райдыдта ерыстӕ. Витали фӕд-фӕдыл фӕуӕлахиз цыппар ныхмӕлӕууӕгыл. Уыдонӕй иу уыди фароны дунеон чемпион Нугзар Цурцумия. Кӕронбӕттӕны йӕ ныхмӕлӕууӕг уыди Олимпаг хъӕзтыты дыууӕ хатты уӕлахиздзау Армен Назаряны фырт Эдмонд Назарян. Ӕвӕццӕгӕн, Виталийы бахъыгдардта йӕ 18-аздзыд ныхмӕлӕууӕгӕй ӕнӕдызӕрдыгӕй кӕй рамбулдзӕни, уыцы хъуыды, ӕмӕ сӕ фембӕлды райдиан рӕдыд ӕруагъта. Уый фӕстӕ ма Витали бӕргӕ тындзыдта сӕ тохы цыд йӕхи пайдайӕн раздахыныл, фӕлӕ Назарян тынг къӕрцхъусӕй фӕлӕууыд Виталийы ныббырстыты ныхмӕ ӕмӕ фӕуӕлахиз 7:3 хыгъдӕй.

Грекъаг-ромаг хъӕбысхӕсты архайджыты раивтой сылгоймаг-богӕлттӕ, уыдоны фӕстӕ та абон 14 февралы гауызмӕ рацӕудзысты уӕгъдибар хъӕбысхӕсты богӕлттӕ. Уӕрӕсейы командӕйы цы ӕртӕ богалы хӕцдзӕн (Тускъаты Азӕмӕт, Найфонты Артур ӕмӕ Цӕкулаты Батырбег), уыдонӕй фыццаг гауызмӕ рацӕудзӕн Тускъаты Азӕмӕт. Уый абон ерыс кӕндзӕн 57 кг онг уӕзы кӕронбӕттӕнмӕ рацӕуыныл. Райсом та ерысы бацӕудзысты Найфонты Артур ӕмӕ Цӕкулаты Батырбег. Сӕ уӕлахизты хабӕрттӕ нӕм хъуысӕнт Италийы зӕххӕй!

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here