Кӕдӕм бахӕссын хъӕуы къамтӕ?

0
10

Уӕлахизы 75 азы бонмӕ мӕскуыйаг парк «Патриоты»-йы кӕронмӕ фӕхӕццӕ кӕны Уӕрӕсейы Гӕрзифтонг тыхты сӕйраг аргъуаны арӕзтад.

Мингай адӕймӕгтӕ нӕ бӕстӕйы алы рӕттӕй се ‘ххуысы хай ӕрвитынц. Байгом уыдзӕн 9 майы. Йӕ бӕрзӕндмӕ гӕсгӕ чырыстон дины аргъуанты ‘хсӕн ахсы ӕртыккаг бынат. Йӕ алыварс уыдзӕн музейон комплекс. 1418 къахдзӕфы дзы акӕнӕн уыдзӕн — уал боны цыдис историйы ӕппӕты стырдӕр тугкалӕн хӕст.

Уый фӕдыл Цӕгат Ирыстоны цы акци расидтысты, уый тыххӕй дзуры РЦИ-Аланийы ӕфсӕддон комиссары хӕстӕ рӕстӕгмӕ ӕххӕстгӕнӕг, дӕлбулкъон Абрил Абдуллаев:

— Фыдыбӕстӕйы Стыр хӕсты Уӕлахизмӕ Ирыстоны хъӕбатыр фырттӕ цы ӕвӕрӕн бахастой, уымӕн аргъ нӕй. Стыр куырдиат мӕм ис Ирыстоны цӕрӕг адӕммӕ. Сидын уӕм, уӕ хионтӕй, хӕстӕджытӕй хӕсты архайӕг чи уыдис, уыдоны хуызистытӕ районты, кӕнӕ Дзӕуджыхъӕуы ӕфсӕддон комиссарадтӕм бахӕссут, хӕстонӕн йӕ ном, мыггаг ӕмӕ фыды ном дзы бафыссут, кӕд ӕмӕ кӕм райгуырд, стӕй йӕм хӕстмӕ кӕцӕй фӕсидтысты, уый фӕнысан кӕнут. Хорз уаид йӕ хӕрзиуджыты тыххӕй радзурын, стӕй ӕндӕр хабӕрттӕ, зӕгъӕм, ацы къам кӕд ӕмӕ кӕм ист ӕрцыдис. Рохуаты хъуамӕ иу хъӕбатыр хӕстоны ном дӕр ма баззайа. Ӕфсӕддон комиссарадты уе ‘рбацыдмӕ ӕнхъӕлмӕ кӕсынц.

Уыцы бӕрӕггӕнӕнтӕ фыст ӕрцӕудзысты Уӕрӕсейы Гӕрзифтонг тыхты Сӕйраг аргъуаны музейон комплексы Кады чиныджы. Уыдзӕн электронон хуызы, бахъуаджы рӕстӕг, нырыккон технологиты фӕрцы, алкӕмӕн дӕр фадат уыдзӕн йӕ хион ӕдзард хӕстонты хуызистытӕ фенынӕн.

Ныхас ныффыста ГУГКАТЫ Жаннӕ

ОСТАВЬТЕ ОТВЕТ

Please enter your comment!
Please enter your name here