«Мӕн дӕр фӕнды космосмӕ»

0
107

Цӕмӕй ахуырдзаутӕ космосы сусӕгдзинӕдтӕ базоной, сӕ зонындзинӕдтӕ фылдӕр кӕной, уыцы стыр нысанимӕ Дзӕуджыхъӕуы, цалцӕггӕнӕн ӕмӕ арӕзтадон куыстыты фӕстӕ, байгом кодтой планетари ӕмӕ уый бындурыл космонавтикӕйы скъола.

Нырӕй фӕстӕмӕ ам цӕттӕ кӕндзысты наукӕмӕ зӕрдӕргъӕвд чызджытӕ ӕмӕ лӕппуты. Уӕларвон дуне цымыдисаг куыд нӕ у, ӕмӕ ныр рӕзгӕ фӕлтӕрӕн фӕзынд замманай гӕнӕнтӕ сӕ фӕндтӕ сӕххӕст кӕнынӕн.

— Алы бон дӕр нӕм вӕййы уазджытӕ, — зӕгъы планетарийы уӕлӕмхасӕн ахуырады педагог Хъараты Зӕлинӕ. — Нӕ зындгонд ӕмзӕххон, космосы аппараттӕ аразӕг, конструктор, ацы скъола саразыны хъӕппӕрис кӕмӕ разынд, уый у Къомайты Руслан. Ахуыр кодта Ногиры 1-ӕм скъолайы. Йе ‘мхъӕуккаг сабитӕн Руслан йӕхӕдӕг скодта зонынады урок.

Знон та космосы сусӕгдзинӕдтимӕ базонгӕ сты сывӕллӕтты хӕдзар «Хуры тын»-ы хъомылгӕнинӕгтӕ. Дзоблаты Родион ӕмӕ Дауыраты Сосланыл 14-гай азтӕ цӕуы. Космосимӕ баст темӕйӕ зыдтой ӕрмӕст Юрий Гагарин ӕмӕ Валентинӕ Терешковайы нӕмттӕ. Ныр та ма базонгӕ сты космосон техникӕ ӕмӕ Хуры системӕйы макеттимӕ, федтой цымыдисаг наукон киноныв. Лӕппутӕ сӕ уӕлӕ абарстой космонавты уӕлӕдарӕс дӕр.

— Планетари ныр уыдзӕн мӕ уарзон бынат. Арӕх фемдзаст вӕййын стъалыты тыгъдадмӕ, дисы мӕ ӕфтауынц, чингуыты дӕр фӕкӕсын, — зӕгъы «Хуры тын»-ы хъомылгӕнинаг Дианӕ Зинкина. — Фӕндид мӕ космосмӕ атӕхын, кӕд гыццыл тӕрсын, уӕддӕр.

Фехъусынӕй фенын хуыздӕр у. Сывӕллӕттӕн бар уыд къухӕй алы макетмӕ бавналын, сӕрмагонд пульты уӕлхъус абадын. Ахуырадон тренажерон центрӕй схызтысты космонавтикӕйы музеймӕ. Йӕ алы къуымы дӕр ис хицӕн экспозицитӕ, — алы азты космосы цы иртасӕн куыстытӕ цыд, ууыл дзурӕг, космосмӕ атӕхӕг аппараты хицӕн хӕйттӕ ӕмӕ ӕндӕртӕ. Экскурси амонӕгмӕ сывӕллӕттӕ цымыдисӕй хъуыстой. Равдыста сын ракетӕ «Восток»-ы макет дӕр. Ууыл фыццаг советон адӕймаг атахт космосмӕ.

— Космонавтикӕйы скъола кӕй фӕзынд Дзӕуджыхъӕуы, уый тыххӕй бузныг зӕгъӕм нӕ республикӕйы разамындӕн, йӕ саразджытӕн се ‘ппӕтӕн дӕр, нӕ сывӕллӕттӕн ахӕм хъӕугӕ лӕвар кӕй скодтой, уый тыххӕй, — зӕгъынц «Хуры тын»-ы хъомылгӕнджытӕ Гаглойты Зӕирӕ ӕмӕ Гиоты Светланӕ.

Куыд базыдтам, афтӕмӕй планетари кусы 10 сахатӕй 20 сахаты онг ӕрвылбон, къуырисӕрӕй фӕстӕмӕ. Сӕ куысты фӕткмӕ гӕсгӕ сӕм ис хицӕн экскурсион программӕтӕ.

Цӕгӕраты Жаннӕ

Къам систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here