Республикӕйы Сӕргълӕууӕджы балц Мӕздӕгмӕ

0
48

Зындгонд куыд у, афтӕмӕй 12 февралы РЦИ-Аланийы Сӕргълӕууӕг Битарты Вячеслав радон хатт кусӕг балцы уыд Мӕздӕджы районы. Уым Битары-фыртӕн уыд цалдӕр ахсджиаг фембӕлды бынӕттон цӕрджытӕ ӕмӕ районы бӕрнон кусджытимӕ. Уыцы бон республикӕйы разамонӕг архайдта Луковскы станицӕйы ног рӕвдауӕндон байгом кӕныны фӕдыл кадджын ӕмбырды дӕр.

Адӕмы куырдиӕттӕ

Районы администрацийы бӕстыхайы Цӕгат Ирыстоны Сӕргълӕууӕгӕн цы фембӕлдтытӕ уыд, уыцы ӕмбырдтӕй иуы архайдтой районы цӕрджытӕ — уыдон республикӕйы разамонӕгмӕ ӕрбацыдысты сӕ тыхстаг фарстытимӕ.

Зӕгъӕм, Хъызлары хъӕуы амалхъомты советы сӕрдар Руслан Халилюлин куыд радзырдта, афтӕмӕй 2021 азы сбӕрӕг кӕндзысты сӕ хъӕуы 270 азы юбилей ӕмӕ Битары-фыртмӕ бахатыд, цӕмӕй сӕм фӕкӕса цӕрӕнбынаты фӕлгонцадон куыстытӕ бакӕныны хъуыддаджы. Уыимӕ, Руслан Халилюлины ныхасмӕ гӕсгӕ, Хъызлары цӕрджытӕ сӕхӕдӕг дӕр зӕрдиагӕй архайынц сӕ хъӕуы фӕлгонцадыл. Афтӕ, бынӕттон адӕмы хъӕппӕрисӕй фондз азы размӕ хъӕуы фӕзынд Уӕлахизы парк. Ныронг дзы ныссагътой мин бӕлас ӕмӕ къутӕрӕй фылдӕр. Ныртӕккӕ та хъызлайрӕгтӕ фарст ӕвӕрынц, цӕмӕй парчы фӕзмӕ ногӕй базилой, курынц, цӕмӕй иумӕйаг фӕлладуадзӕн тӕлмы фарсмӕ сӕвӕрой сывӕллӕтты хиирхӕфсӕн ӕмӕ спортивон фӕзтӕ дӕр.

Республикӕйы Сӕргълӕууӕг, Хъызлары цӕрджыты куырдиатмӕ байхъусгӕйӕ, Хицауады бӕрнон кусджытӕн бахӕс кодта, цӕмӕй бацӕттӕ кӕной Уӕлахизы парчы фӕлгонцады проект. Йӕ ныхасмӕ гӕсгӕ, УФ-йы Хъӕууон хӕдзарады министрады нысанмӕарӕзт программӕтӕй иуы фӕрцы фӕлгонцадон куыстытӕ сӕххӕст кӕнын хъӕуы Хъызлары юбилейы агъоммӕ.

Хӕдзӕртты хицӕутты ӕмбалады минӕвар Рузаннӕ Григорянц та радзырдта, Гагарины уынджы бирӕфатерон хӕдзӕртты алыварс цы фӕлгонцадон куыстытӕ бакӕнын хъӕуы, уыдоны тыххӕй. Йӕ ныхасмӕ гӕсгӕ, цалцӕггӕнинаг у автомобилон фӕндаг дӕр.

Уыцы микрорайоны цӕрджыты куырдиӕттӕ йӕхимӕ фӕбӕрӕг кӕнгӕйӕ, Битарты Вячеслав куыд загъта, афтӕмӕй Гагарины уынджы цы сквер ис, уый рацарӕзты проект сӕххӕст кӕнӕн ис сӕрмагонд федералон программӕ «ӕппӕтфадатджын горӕтаг алфамбылай»-ы фӕлгӕты. Республикӕйы разамынд бацархайдзӕн, цӕмӕй уыцы куыстытӕ ӕххӕстгонд ӕрцӕуой 2021 азы. Тротуартӕ ӕмӕ автомобилон фӕндаджы нывылдзинадыл дзургӕйӕ та, республикӕйы разамонӕг зӕрдӕ бавӕрдта, уыцы куыстытӕ дӕр 2021 азы фӕндаггон фонды фӕрӕзтӕй кӕй сӕххӕст кӕндзысты, уымӕй.

Фембӕлдмӕ чи ӕрбацыд, уыцы адӕмӕй алкӕмӕндӕр ӕххуыс уыдзӕн. Адӕмы куырдиӕтты фӕдыл бӕлвырд амынддзинӕдтӕ лӕвӕрд ӕрцыд ӕнӕниздзинад хъахъхъӕнынады министрад ӕмӕ ӕндӕр профилон ведомствӕты разамонджытӕн.

Социалон-экономикон райрӕзты нысантӕ

2020 азы 1 мартъийы онг РЦИ-Аланийы Экономикон рӕзты министрад ӕмӕ районы муниципалитеттӕ иумӕ хъуамӕ бацӕттӕ кӕной 2020-2022 азтӕн Мӕздӕджы районы социалон-экономикон райрӕзты программӕйы проект. Ахӕм амынддзинад Битарты Вячеслав радта, Мӕздӕджы районы дарддӕры райрӕзты нысанты тыххӕй цы уӕрӕх ӕмбырд сарӕзта, уым.

— Программӕйы бӕлвырд бӕрӕггонд хъуамӕ ӕрцӕуой Мӕздӕджы районы ӕппӕт цӕрӕнбынӕтты тыхстагдӕр фарстытӕ, уыимӕ, документ цӕттӕ кӕнгӕйӕ, хъуамӕ бӕстон хыгъд ӕрцӕуой муниципалитетты разамонджыты фӕндӕттӕ дӕр. Программӕ сфидар кӕныны фӕстӕ ӕрвылмӕй дӕр каст цӕудзӕн, йӕ уагӕвӕрдтӕ куыд ӕххӕстгонд цӕуынц, уымӕ, — бафиппайдта Битарты Вячеслав.

Ӕмбырды архайджытӕ ӕркастысты ӕндӕр ахсджиаг фарстытӕм дӕр.

Зӕгъӕм, сӕрмагонд ӕргом аздӕхтӕуыд, район электрон тых ӕмӕ газӕй чи ифтонг кӕны, уыцы компаниты финансон-хӕдзарадон архайды фарстытӕм. Уыцы кусӕндӕтты архайд фӕхъомысджындӕр кӕныны фӕдыл, хардзгонд энергетикон фӕрӕзтӕн афойнадыл фидыны тыххӕй нысангонд ӕрцыдысты бӕлвырд фӕндӕттӕ.

Ӕмбырды архайджытӕ ӕрдзырдтой цалдӕр ахсджиаг социалон объекты рацарӕзт ӕмӕ цалцӕджы фарстыл дӕр. Мӕздӕджы парк, Хъызлары Культурӕйы хӕдзар ӕмӕ иннӕ объекттӕ банывыл кӕныны хъуыддаджы пайдагонд ӕрцӕудзӕн, куыд республикӕйы бюджеты фӕрӕзтӕй, афтӕ архайд дӕр цӕудзӕн, цӕмӕй федералон программӕты фӕрцы дӕр куыстыты иу хай сӕххӕст кӕной. Зӕгъӕм, хицаудзинады бынӕттон оргӕнтӕ бацӕттӕ кодтой ӕппӕт хъӕугӕ документтӕ ӕмӕ ацы аз архайдзысты чысыл горӕтты ӕппӕтуӕрӕсеон конкурсы. Уыцы конкурсы лауреаттӕн ӕрвылаз дӕр зынгӕ фӕрӕзтӕ радих кӕнынц горӕтаг алфамбылайы фӕлгонцадӕн, ӕмӕ уыцы ерысы дӕр хи бавзарын хъӕуы.

Притеречныйы хъӕуы астӕуккаг скъолайы уӕлӕмхасӕн бӕстыхайы арӕзтад, Черноярскы станицӕйы ног скъолайы проект — ацы ӕмӕ иннӕ хъуыддӕгтӕ дӕр уыдысты ӕмбырды боны фӕткы. Зӕгъӕм, бӕрнон адӕймӕгтӕ куыд радзырдтой, афтӕмӕй Черноярскы станицӕйы ног скъолайы арӕзтады фӕдыл ӕппӕт хъӕугӕ проектон-хӕрдзты документаци ныридӕгӕн цӕттӕ у. Куыд нысангонд цӕуы, афтӕмӕй арӕзтад райдайдзӕн 2021 азы. Скъолайы зӕронд агъуысты та фӕстӕдӕр ӕрбынӕттон уыдзӕн станицӕйы музей.

— Иу хатт ма лӕмбынӕг ӕркӕсын хъӕуы, ацы азы бюджеты, стӕй 2021-2022 азтӕн республикон бюджеты куыд ӕрцыдысты хыгъд, Мӕздӕджы районы цы ахсджиаг социалон объекттӕ саразынвӕнд кӕнӕм, уымӕ. Уыимӕ, ӕппӕт хъӕугӕ проектон-хӕрдзты документтӕ дӕр хъуамӕ уой ӕнаипп. Хъӕуты цӕрджытимӕ фембӕлдтыты рӕстӕг адӕм рӕгъмӕ рахӕссынц алы социалон объектты мӕгуырау уавӕр, ӕмӕ нӕ хӕс у, цӕмӕй уыцы фарстытӕ нӕ дарддӕры архайды бӕстон хыгъд цӕуой, — фӕнысан кодта Битарты Вячеслав.

Ӕмбырды архайджытӕ ӕркастысты ӕмӕ ӕмбӕлгӕ уынаффӕтӕ рахастой ӕндӕр фарстыты фӕдыл дӕр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here