Цӕгат Ирыстоны цӕрджыты ‘хсӕн нывыл ахастдзинӕдтӕ — сабырдзинады бындур

0
20

Ӕрӕджы уыд РЦИ-Аланийы Национ ахастдзинӕдты фарстыты фӕдыл министрады коллеги. Ныхас дзы цыд, 2019-2025 азтӕм «РЦИ-Аланийы национ ахастдзинӕдты райрӕзт»-ы РЦИ-Аланийы паддзахадон программӕ 2019 азы куыд ӕххӕстгонд цыд, ууыл.

Коллегийы уӕнгтӕ ӕрныхас кодтой ивгъуыд азы куыстыл ӕмӕ сбӕлвырд кодтой ацы азӕн сӕ ног хӕстӕ ӕмӕ нысантӕ. Куыд загътой, афтӕмӕй уыцы хӕстӕ ӕмӕ нысантӕ уӕлдай ахсджиагдӕр систы, Национ ахастдзинӕдты фарстыты фӕдыл советӕн ӕрӕджы Нылцыччы цы ӕмбырд уыд, уый фӕстӕ. Уыцы ӕмбырды Уӕрӕсейы Президент Владимир Путин куыд бафиппайдта, афтӕмӕй паддзахадон национ политикӕйы фарстытӕ домынц иудадзыг цӕстдард, уыцы цӕстдардӕн йӕ бындур у национ-культурон ӕхсӕнадон организациты архайд ӕмӕ хицауады ӕппӕт ӕмвӕзадты оргӕнтимӕ се ‘мгуыстад, райдай муниципалон ӕмӕ фӕу федералон оргӕнтӕй.

Уымӕй уӕлдай паддзахадон национ политикӕйы сӕйраг фӕзилӕнтӕ бӕлвырдгонд ӕрцыдысты «Уӕрӕсе: национ фарст», зӕгъгӕ, Уӕрӕсейы Федерацийы Президент Владимир Путины статьяйы.

Афтӕмӕй национ политикӕйы къабазы Уӕрӕсейы Федерацийы ӕмӕ РЦИ-Аланийы нормативон-барадон акттыл, Уӕрӕсейы Федерацийы Президенты фӕдзӕхстытыл ӕмӕ 2019 азы 12 мартъийы нӕ республикӕйы Сӕргълӕууӕджы Ныстуаныл ӕнцой кӕнгӕйӕ, ивгъуыд аз министрад куыста национ ахастдзинӕдтӕ нывыл кӕныныл, экстремизмы фӕзындтыты ныхмӕ мадзӕлттӕ карздӕр кӕныныл ӕмӕ, динтӕ ӕмӕ нациты ‘хсӕн нывыл ахастдзинӕдтӕ ӕппӕт паддзахадӕн, уыимӕ, Цӕгат Ирыстонӕн дӕр ахсджиаг кӕй сты, уыцы хъуыды республикӕйы цӕрджыты ‘хсӕн фидар кӕныныл. Ӕппӕт куыстытӕ дӕр арӕзт цыдысты, министрад кӕй ӕххӕст кӕны, уыцы паддзахадон программӕты фӕлгӕты.

Программӕтӕн сӕ иу у 2019-2025 азтӕм «РЦИ-Аланийы национ ахастдзинӕдты райрӕзт»-ы паддзахадон программӕ, ӕмӕ йын ис паддзахадон национ политикӕимӕ баст цалдӕр дӕлпрограммӕйы.

Фыццаг дӕлпрограммӕ «РЦИ-Аланийы адӕмты этнокультурон райрӕзт ӕмӕ ӕппӕтуӕрӕсейаг граждайнаг иудзинад». Ацы дӕлпрограммӕйы фӕлгӕты, национ ахастдзинӕдтыл чи архайы ӕмӕ бӕлвырд программӕтӕ ӕххӕст кӕныныл чи кусы, уыцы национ-культурон ӕхсӕнадтӕн ӕмӕ ӕхсӕнадон иугӕндтӕн субсидиты хуызы лӕвӕрд цыд паддзахадон ӕххуыс (республикӕйы ис 31 ахӕм национ-культурон ӕхсӕнады). Уымӕй уӕлдай Дунеон ӕхсӕнадон змӕлд «Ирӕтты Уӕлдӕр Совет» фӕдарынӕн республикӕйы бюджетӕй лӕвӕрд ӕрцыд финансон фӕрӕзтӕ.

Республикӕ рӕсугъдӕй сбӕрӕг кодта Цӕгат Ирыстоны адӕмыхӕттытӕн сӕ национ бӕрӕгбӕттӕ ӕмӕ фестивалтӕ, се ‘хсӕн: Цӕрвтӕкъахӕн, тӕтӕйраг «Сабантуй», гуырдзиаг «Ломисоба», пысылмӕтты «Хъуырман», дзуттӕгты «Ханука», бердзенты «Охийы бон» ӕмӕ иннӕтӕ. Министрад ӕмӕ йӕ дӕлбар кусӕндӕттӕ алыхуызон мадзӕлттӕ сарӕзтой 100-йӕ фылдӕр — семинартӕ, конкурстӕ, турниртӕ, цӕлхӕмбырдтӕ, социологон ӕрфарстытӕ, ӕрыгӕттимӕ куыст ӕмӕ ӕндӕртӕ.

Дӕлпрограммӕ «РЦИ-Аланийы хъазахъхъаг ӕхсӕнадтӕн паддзахадон ӕххуыс»-ы фӕлгӕты ацы ӕхсӕнадтӕн лӕвӕрд цыд материалон ӕххуыс, уыимӕ, федералон ӕхцатӕй дӕр. Паддзахадон ӕххуыс ын кӕй ис, уый фӕрцы куыстхъом у «Республикон зылды алайнаг хъазахъхъӕгты ӕхсӕнад». Уый хауы Терчы ӕфсӕддон хъазахъхъаг ӕхсӕнадмӕ, ӕмӕ дзы ис авд районы ӕмӕ иу горӕтаг (дзӕуджыхъӕуккаг) ӕхсӕнады. Йӕ уӕнгтӕ сты 2 021.

Ацы дӕлпрограммӕйы фӕлгӕты арӕзт ӕрцыдысты ӕфсӕддон-патриотон хъомыладимӕ, ахуырадимӕ, культурӕ ӕмӕ спортимӕ баст мадзӕлттӕ.

Дӕлпрограммӕ «РЦИ-Аланийы гуманитарон бастдзинӕдты райрӕзт ӕмӕ фӕсарӕнты цӕрӕг ӕмзӕххонтимӕ ӕмархайд»-ы фӕлгӕты ӕххӕстгонд цыд ӕрвылазон сӕрдыгон культурон-ахуырадон курс «Этнолагер». Йӕ архайджытӕ — фӕсарӕнты цӕрӕг не ‘мзӕххонтӕ. Ахуыртӕн сӕ нысан — фӕсарӕнты цӕрӕг не ‘мзӕххонты ӕрбаввахсдӕр кӕнын ирон адӕмы культурӕ ӕмӕ традицитӕм. Ивгъуыд аз лагер суазӕг кодта Ирландийы, Германы, Францы, Швейцарийы, Турчы, Сирийы, Гуырдзыйы, Таджикистаны, Казахстаны, Азербайджаны, Свердловскы облӕсты, Бетъырбухы, Ханты-Мансийскы автономон зылды ӕмӕ Хуссар Ирыстоны цӕрӕг ирӕтты. Стамбулы та августы уыд ирон культурӕйы ӕртыккаг дунеон фестивал. Йӕ саразынӕн баххуыс кодта турчы цӕрӕг ирӕтты ӕхсӕнад «Алан».

Ивгъуыд азы министрад суазӕг кодта гуманитарон бастдзинӕдтӕ сфидар кӕныны фӕдыл Цӕгат Ирыстонмӕ ссӕуӕг 20 делегацийӕ фылдӕр. Йӕхӕдӕг дӕр ахӕм нысанимӕ уыд Ханты-Мансийскы, Венгрийы горӕт Яскишеры, Хъӕрӕсе-Черкесты Республикӕйы гуманитарон бастдзинӕдтӕ сфидар кӕныны тыххӕй цы мадзӕлттӕ арӕзт цыд, уым.

Уӕлдай цӕстдард уыд дӕлпрограммӕ «РЦИ-Аланийы нацитӕ ӕмӕ динты бындурыл экстремизмы профилактикӕ» ӕххӕст кӕнынмӕ. Ацы куыстӕн хорз ӕххуысгӕнӕг уыдысты авд уынаффӕйадон оргӕны. Дӕлпрограммӕйы цы нысантӕ ис, уыдон сӕххӕст кӕнынӕн арӕзт ӕрцыд ӕхсӕнадон-политикон, уыимӕ, нацитӕ ӕмӕ динты ‘хсӕн ахастдзинӕдтӕм цӕстдарды системӕ. Арӕзт ӕрцыд социологон иртӕст «Дины ахастдзинӕдтимӕ баст уавӕр Дзӕуджыхъӕуы. Тӕссаг фӕзилӕнтӕ». Ацы куысты хатдзӕгтӕй пайдагонд ӕрцӕудзӕн ацы аз ӕмбӕлгӕ мадзӕлттӕ аразыны рӕстӕг.

Динтӕ ӕмӕ адӕмыхӕттыты ‘хсӕн нывыл ахастдзинӕдтӕ бахъахъхъӕныны, экстремизмӕн ӕмӕ радикалон фӕзындтытӕн ныхкъуырд дӕттыны фӕдыл мыхуыргонд ӕрцыд 100 ӕрмӕджы ӕмӕ хъусынгӕнинаджы. Дзӕуджыхъӕуы ӕмӕ районты ӕвӕрд ӕрцыд 133 баннеры ӕмӕ рекламӕйы ӕндӕр хуызтӕ.

Уӕлдай ӕргом здӕхт цыд ахуырадмӕ. Республикӕйы скъолаты, техникумтӕ ӕмӕ уӕлдӕр ахуыргӕнӕндӕтты арӕзт ӕрцыд ахуырадон семинартӕ, лекцитӕ, цӕлхӕмбырдтӕ, наукон-практикон конференцитӕ.

Уымӕй уӕлдай министрад ӕххӕст кӕны 2019-2023 азтӕм «Уӕрӕсейы Федерацийы терроризмы идеологийы ныхмӕ иумӕйаг пълан». Уымӕ гӕсгӕ ӕрвылаз дӕр ӕххӕстгонд цӕуынц, адӕмы ‘хсӕн сабырдзинадӕн ӕмӕ нывылдзинадӕн ахъазгӕнӕг хицаудзинад ӕххӕстгӕнӕг оргӕнты, барадхъахъхъӕнӕг оргӕнты, ӕмӕ ӕхсӕнадон организациты ӕмархайды мадзӕлттӕ.

Ахӕм сты 2019-2025 азтӕм «РЦИ-Аланийы нациты ‘хсӕн ахастдзинӕдты райрӕзт»-ы паддзахадон программӕйы бӕрӕггӕнӕнтӕ цыбырӕй.

Дедегкаты Зӕлинӕ

ОСТАВЬТЕ ОТВЕТ

Please enter your comment!
Please enter your name here